اے جہان نوں بدل کنئگ لوٹیت

اے جہان نوں بدل کنئگ لوٹیت
کہنیں دوداناں یل کنئگ لوٹیت

دانکہ اوستانی گؤرم سر لیٹیت
سنگے آپ ءَ چگل کنئگ لوٹیت

چوکہ من ھلکءِ مردماں گِنداں
نی کہیر برّ ءِ پَل کنئگ لوٹیت

اڈ کنیں لیبوئے پدا بیا اِت
کودکیں زِرد گل کنئگ لوٹیت

سِتکءُ ایمانءِ دہرءَ چکاس اِنت
ماہ پدا مرچی تل کنئگ لوٹیت

نیست دوزواہیں سنگتے دہر ءَ
وت وتارا بگل کنئگ لوٹیت

زیمراں لوٹیت نوکیں الہانے
پرشتگیں جوڑ نل کنئگ لوٹیت

نوکیں راہبندےشون دیاں زندءَ
نوکیں معنا بتل کنئگ لوٹیت

زور باسکانیں زندگ اِنت شوہاز
بھتءِ بیھ ءُ اجل کنئگ لوٹیت