غزل

نئیں نصیوا کہ گِندغا بیائے،تو وثی ڈیہئے مڑدمے دیم دئے
یا وثی جِیغ ئے زامریں پھلّے یا وثی دستئے چھَلّوے دیم دئے

ہر کَسے گِنداں زھرنیں مرشاں، دیم شہ دنزان و مُژاں گاریں
یا منی ڈیہہ ئے مڑدماں کھَندیں یا مناں دِیریں الکہے دیم دئے

درشک بے تاخاں،مال بے ھونیں،مں پریشاناں،ھاخ ھیرانیں
ڈیہہ منی ڈکّالاں جثہ بَرّیں شَکلیں آف بَندیں جھڑے دیم دئے

پَلوے گرمیں آھڑئے لکّاں ،پَلوے تھنائی کشغ اِنّوں
پہ دلا بیلی یے مقیمی اِیں ،پہ سراَ سبزیں کھوکھرے دیم دئے

ھِچ دمے آجوئی نہ دیثہ ما اژ غم و دڑدئے سیاہ گریں جیلا
یا ھذا دیم دئے تَنگویں روشے یا ھذا موژانی شفے دیم دئے

اَشکثَﺅں ملائِے دفاگوئشتئی، شئے نغن دیمی منزلا ایریں
کوٹغے پَرما ایرکَن دیما اے جہانا دِہ چیارکھے دیم دئے

اے جہاں زوراخاں بڑتہ زوری، مں گو اے ناترساں مِڑِغایاں
یا تہ تَو ایرکف بیا اشہّ درَنگا یا وثی رَنگیں سنگتے دیم دئے

چھو کہ پِیرانی بَچّ دِہ پِیراں، چوکہ سڑدارئے بَچّ سڑداریں
برّ مہ کھَن کمبیرئے کہولا تَو مں مِراں دومی شائرے دیم دئے