ہماں روشا۔۔۔

ھماں روشا کہ میرا بذ بُڑتہ شہیں مُریذئے راستیں ٹونکاں
مناں گیریں
دُراھیں شفچراں مُچی کثہ
گوئشتہ
ما دانا عاقلیں ، بینا
مئے فہم ئے لوغ دیما زیند موت ئے راز سجدہ کنت
مئے شاندا آزماں چری
زمیں لُڈی
زرانی چول ھامی بنت
نفا نُکسان ئے لیکوّ مئے درا بِندات بنت کُٹنت
مئے بخت ئے آزماں ہمروش کندان اِنت
(اسیلیں واجہاں گوں ہمسری چوں بی؟)
گِہیں کُلیں زباں بثّنت
گنوخانی چے بستاریں
غریب ئے قول چے کرزی
وفاداری، مڑاہداری وثی واندالغئے ٹونکنت
مناں گیریں
مُریذانا
وثی لوھیں کماں تیراں گوں پرّینتئی
وتن اِشتئی
گُشئے گوئشتئی
شئے دیذئے شہر بر باثنت
شئے کوہاں لبز رُلاثنت
شئے جیذاں گَرد ننداثنت
من ھیراناں
ناں رندانی گہیں پوہ بنت
نا ں شہہ ٹونکاں پذاگڑدی

ماہنامہ سنگت کوئٹہ