شئیر

کو٘ہانی سرئے چِرکی٘ں راہ
ڈی٘رانی گوئرئے لَہڑئے چَر
شی٘فانی تہئے چُر و چانک
زرخی٘زیں ڈغار گوئرٹی٘ڑھ ئے
سیاہ آف وَہندائیں جو٘آنی
ہینژاف دیر سری٘ں کھؤرانی
آفبندی٘ں جُڑئے جُڑساھگ
گرند و چیلک و شَنز و گوار
ھؤراں شہ پھذی پُور و ہار
پُرّی٘ں کِیلغ و سی٘ریں بند
زررنگی٘ں کِشار گندیم ئے
نیتافاں ہلو٘ ہالو٘ شیک
مستی٘ں چی٘تراں سبزی٘ں کو٘ہ
سبزی٘ں کو٘ہسراں مال ئے جیذ
جیذا چھی٘ڑو٘ئے مالانی
مال ئے پھ دلے شاکارغ
کشّغ ڈیہی ئے شہدی٘ں چانگ
منجلس پُٹّری٘ں رندانی
ناڑی ئے نڑئے وشی٘ں زیل
شائر بستغی٘ں بھنگی٘ں گال
دل چھی٘کی٘ں توار سُرّی ئے
کؤرئے کندی ئے ری٘خی٘ں حاخ
حاخانی دلئے کانیخ ئے
شہد و شَکّلاں وشّی٘ں تھام
درنگانی بزی٘ں ساڑتی٘ں سا
درشکاں پکّغی٘ں سُہری٘ں بَر
وھاوآریں شف ئے خامو٘شی
برّاں بُڑز بِیغ تو٘لغ نُوک
نُوکاڑاں برے بندغ چِر
گیرارغ امُل ماہی٘ن ئے
پُرکئیفیں دل ئے بیئغ بِرّ
بانگہاں بانگو٘ئے بانگئے ٹؤک
مُرگانی درا شینزارغ
شیکغ ساڑتی٘ں بُلگارئے
بو٘ذآیئغ دل و ارواہ ئے
رو٘ش ئے رہنغا کشّغ سر
شہ لو٘غاں سڑدیئغ مالانی
زرچیڑی٘ں جنی٘ں زالانی
گڑدغ ولہرے کونجانی
کھٹغ مو٘سمے مونجانی
مستی ما کثہ کو٘ہاں عشق
کُوڑی ئا کثہ دامانی
سمّو٘ اشتغ ای٘ں کاہانی
ہر یادی دلا نشک ای٘ں مئے

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*