بابا عبداللہ جان جمالدینی

۔19 ستمبر 2020 بابا عبداللہ جان جمالدینی، منی مہروانیں پیرْک ئے مرگ ئے چارمی سالروچ اَت۔ بلوچستان سنڈے پارٹی او سنگت اکیڈمی آف سائنسز ئے وٹس ایپ گْروپاں بابا عبداللہ جان ئے زِند او کردئے سر ا ھر کس وتی مارشت و ھیالاں نِوشتہ کنان اَت، چیزے من ھم وتی اومان،واھگ او پْر مِہریں مارِشتاں درشان کَنان اَت اْن کہ ہمے وختا ڈاکٹر شاہ محمد مَری آ گْشت،آزات آتِنوکیں پوہ وزانت یا بلوچستان سنڈے پارٹی ئے مجلسا ترا بابا عبداللہ جانئے باروا 2 یا 3 پَنّ وانگی اِنت۔ منی پِکراں کمیں پدی کِنز اِت او دلا گْشت ءِے آزات گوں تو اے ڈَولیں لَوز نیست کہ تو وتی حیالاں بابا عبداللہ جانئے باروا دَرشان کْرت پِکن ئے۔ منی دلئے اے گپ راست ات۔ منی دل او زانت یک بے سِیمسریں دریابئے وڑ ا شہ بابا ئے یاتاں سَرریچ اَت اَنت۔ منی واھگ چو چلتن مِہردَر ئے کوہانی وڑا برز و پْرّ بہارگاہ اَت اَنت بلے گوں من لبز نہ ات کہ من وتی بے تاھیریں دل کرار بِداتین اْن او وتی ابّاجی (بابا عبداللہ جان) ئے بارو ا وتی دلی مارِشتاں درشان پِکْرتین اْن۔ شاہ محمد مری ئے اے کَلَہو ئے وانگا پَد من وتی دوست و سنگت او وتی گْلاہیں بابا، بابا عبداللہ جانئے یاتانی تہا کَپت اْن او منی چَمّ شہ ارساں پْر بوت اَنت۔ منی چم مْچ بوت اَنت۔

من یاتانی یک ہنچیں راہسرے آ شْت اْن کہ اود ا من ات اْن او منی ابّاجی اَت۔ من اومنی کسانی ئے ہما روچ یات آھت انت کہ بابا عبداللہ جان منا دروتا دات ءِے گْشت ءِے اے منی براس عبدالواحد جان اِنت،اے منی براس آزات اِنت، اے منی براس بَنگْل جان اِنت۔ آ ساعَتاں منی زانت کہ خیالانی وشنِمائیں لَڑاں بابا عبداللہ جانئے بارو ا بندگا اَت انت من نوشکے وتی لوگا ابّاجی ئے جِندئے کچّائیں کوٹی ئے تہا نِندوک ات اْن۔ اے ہَما کوٹی اِنت کہ بابا عبداللہ جان زِمستانئے گوریچی او سیاہ چِلّگیں شپاں تہئے نِشت او مہے کََہول ئے مْچ مردم، کسان و مَزن کاھت اَنت او ابّاجی ئے ِ گِرد نشت اَنت او ابّاجی گوں آوان مجلسہ کْرت ءِے او آوانی ذہنی رْدومہ کْرت ءِے۔ من ناگتا مار اِت اْن کہ کوٹی ئے نیاما اِسٹوپ ایر بوتہ او اِسٹوپ ئے راستیں نیمگا بابا عبداللہ جان نِندوک بوتہ او آئی ھَد ا آئی لوگ بانکا مئے مہروانیں بَلّک نِشتہ او آوانی نَزّینکاَ آوانی زھگ (منی مہروانیں تْرواوناکو کہ کسان بوتگ اَنت) نشتگ اَنت اوابّا پَر اِش بلوچی گیدی کِسّہاں گْشتگ ءِے۔ ہِلیل بِلیل کہ دو شِنکّانی کِسہ اِنت الّما مئے بَّلک پہ وتی زاھگاں گْشتگ ئے۔

منایقین اِنت کہ ابّاجی پہ وتی جنکاں یک بلوچ شیرزالیں Character بزاں کارِستے ئے کِسّہ آ الّماکْرتگ ءِے او آ Character کوہ تفتان ئے کَشّ وگورئے َ نِشتگیں کمانڈر شیرزالیں گْل بی بی بوتگ کہ انگریز سامراج او جنرل ڈائر ئے ِ خلافا سرین بستگ او پہ جنگاَ تیار بوتہ او ھِچبر پدی نہ کِنز اِتگ۔ ابّاجی ئے دوستیں شخصیتاں یکّے گْل بی بی ھم بوتگ۔ ابّاجی7 یا 8 سال ئے بوتہ کہ گْل بی بی آئی ناکو فقیرجان جمالدینی ئے گسا کَچّو آ آھتہ او سِلاہ بند بوتہ۔ آ اولی او گْڈی وار بوتگ کہ ابّاجی گْل بی بی را دِیست اَت ءِے۔

نوشکے آ چِلّگ ئے سارتیں روچاں ابّاجی وتی کتاباں زْرت ءِے، اوور کوٹ َ گورا َ کْرتئی اوْ مئے گسانی پْشتا َ زیبائیں ریکے نام ءِے پیتاپ اِنت، شْت وانت ءِے او نَوشتہ کْرت ءِے۔ بَرے بَرے بِہ اوتان ئے زیبا او بْرزیں ریک سر اھَم شْت او وتی زاھگ، براس زاھگ او گْہار زَاھگاں ھم گوں وترا ہمراہ کْرت ءِے۔ راہاابّاجی گوں آواں چو سنگت ئے وڑ ا مجلسہ کْرت ءِے۔ کَدی آواں کارل مارکس او لینن ئے باروا پہ آسانیں زبانا سَرپَدی دات ءِے، کدی شیکسپیئر،صدرالدّین عینی او شہ دگہ مزنیں ناماں سرپد کنائینت اِش اوکدی آرٹ و سائنسا پوہ اِش کنائینت۔ اے ڈولا ابّاجی وتی زاھگانی ذہنی رْدومہ کْرت ءِے۔

اوتان ئے راہ ئے سر ا ماہ گْل نامی ئیں جنکے ئے گْنبد بوتگ او ماہ گل ھما گنبد ئے تہا کَڈ بْوتہ۔ ابّاجی گوں وتی زاھگاں ماہ گْل ئے کسہ آ ھم کْرت ءِے۔ ماہ گل یک شَرّ رَنگ او زیبائیں جنکے بْوتہ۔ آئی مرد نبی بخش پہ دِگرانی بَستگیں دروگ و تْہمتاں آئی نازرکیں دلئے بنداں تِیر جَت ءِے او ْ شَرّ رنگیں ماہ گلاکْشت ءِے۔ مئے چاگِرد اَ دِگہ بازیں ماہ گل پہ غیرت ئے ناما کْشَگ بْوتگ اَنت او تَنِنگ بَیَگا اَنت۔ ماہ گل ئے باروا من ابّاجی ئے ھِچّیں نِوِشتانک نہ دیستگ اْن بلے منی دل اے مارِیت کہ ابّاجی پہ ماہ گل ئے کْشَگا سک دل پدرد بوتگ۔ نوں ہم ہر کدی کہ من شہ ماہ گل ئے سَرْونا گوزِین اے محسوس کنین کہ ماہ گل شہ من اے جْستا کنت، “منی قصور و رَدی چے اَت کہ منا اے ناروا او زوراکیں چاگرد ئے مردماں پہ بے دِلی کْشت او رْسواہ اِش کْرت؟؟؟

بابا عبداللہ جانا ھَنچش کہ ما آئی کتاب و نِوشتانکانی تہا گِنداں کہ مِہر و اِنسانیت ئے یک مزنیں چیدگے بوتگ۔ عَملی زند ا ھم آ ھمے وڑ بلکِن شِد و زیات پْر مِہر و انسان دوستیں مردمے بْوتگ۔ مناَ یات اِنت یک برے منی تْرو گْشت ءِے شہ نوشکے آ َ مئے وَستاکار ئے ِ جنین و زاھگ کوئٹہ آمئے گِسا آھت اَنت۔ گوں ابّاجی مئے کَہولئے یک دگہ مردمے نِندوک اَت۔ ابّاجی وستاکار ئے ِجنین و زھگاکہ دیست ئے باز وش بوت۔ پاد آھت دیم اَیش شْت او وش آھت کْرت اِش۔ زھگا بَڈ کْرت ئے او دروت دات ءِے۔ دَمے جوان گون اِش نِشت۔ آ مردم کہ گون اَبّاجی نِندوک اَت گْشت ءِے لالا تو اے وستاکار ئے زاھگ و جنینا ہَنچْش مِہر و عزت دات ءِے ھرکس گْشیت تہی گس ئے ِ مردم اَنت۔ ابّاجی گْشت ما مْچ مردم اَن گْڑا اے فرقا پرچے پکن اَن؟۔اگہ زند ئے ِ تہا مہر و عزت نہ بوت گڑا آ زند ئے چِے فائدگ۔ اِے منی مردْم اَنت او من ایشانی مردم اْن۔

بابا عبداللہ آ نہ تہنا پہ بزگر، خواری کَشّ، بگجت اوجَہل ئے ِکلاسئے مردمانی زِند اآ گَپ جت او نِوشتہ کرت بلکن وتی بیوروکریٹک زند ایلہ دات وعَملی وڑاگوں آوان یک جاہ بوت اوسنگت بوت۔ آوان وانینت ئے۔ بابا عبداللہ جان وآئی مزنین براس، بلوچی زبان ئے آشوبی شاعر آزات جمالدینی شہ وتی ڈگاراں بزّگیں مردماں مفتا دات اَنت کہ پہ وتا گس و جاگہ بہ بند اَنت۔ آوان وتی زند ئے تمامیں عیش و آرام یلہ دات انت اویک وختے ہَنچیں آھت کہ گِساپہ وَرَگا آوان نان ھم نہ ات۔ بلے زندمان ئے اے جَوریں وختاں پہ دلیری اوتمردی سَگ اِت اَنت اومدام پہ وتی اْستمان و راج ئے ِ شرتِریں زندئے سرا سوجان اَت اَنت۔ آوان 1958 آوتی ھَلک جمالدینی آ گوں وتی میتگ ئے مردماں مِیٹنگے کْرت۔ اے مِیٹنگ ئے تہا بلوچی زبان و لبزانک ئے ”رائٹ برادرز“ بزاں بابا آزات او عبداللہ جاناابید میر بلال خان جمالدینی، ملک عبدالصمد جمالدینی میر چندن خان جمالدینی، محمد حنیف جمالدینی او دگہ مردم ھم ساڑی ات انت۔ اے نندد او گند ئے تہااے فیصلہ کنگ بوت کہ ما وت پہ وترا سکول بندن او وتی زاھگاں وانین اَن اووتی ھلک ئے تہا پولٹری فارمے ھم جوڑکنن۔ اے کارانی واستااے دوئیں براساں وتی زمین دات انت۔ اے دْراہ سنگت وت خِشت بْرّاِت انت اوسکول ئے ِ بنیاتا ایر اِش کْرت۔ بلَے وھدے کہ اکتوبر 1958 آ مارشل لا لگ اِت بابا آزات و بابا عبداللہ جان گوں آدگہ سنگتاں ھوار دزگیر کنگ بوت انت اوبندی کنگ بوت اَنت۔ آوانی گسا حکومتاچاپہ ھم جت او بابا آزات ئے کتاب مستیں توار ئے سر اپابندی جَت۔ پرچے کہ اے کتابئے بنرہ بلوچستان اَت او بلوچستانئے خواری کَشّ او مْزّوراں شہ واباپاد کنگ اووَش حالیں زندے گوازینگئے سِکین دَیَگ ات۔ مزنیں مدتے آپد اے دوئیں براس یلہ بوت اَنت۔ 1963 آبابا آزات ایرانا شْت اوایرانی بلوچاں بلوچی لبزانک او زبانئے نیمگا دلگوش کنائینگ لوٹت ئے۔بلے ایرانی انٹیلجنس آئی پدآات او زوت دزگیر کْرت و بندی جاہابند کْرت۔ بابا عبداللہ جان اوھدآ پہ روزگار اکراچی آشْتگ ات۔اے تمامیں جاوراں آوانی ماس بی بی پری جاناسک دل پدرد کْرت ءِے۔ آ مْدام پہ وتی بَچکّاں گریت ءِے۔ بابا آزات ئے یاتانی تہا 10 سال مدام گریت ءِے اوگڈسراچم ءِے سیاہ آپ (کالا پانی) ئے شکار بوت اَنت اوبَلّی پری جانئے چمانی روشنائی شْت۔ آ گوں زہیرواریں اوسوھتگیں دِلے آوتی بَچّک عبدالواحد آزاتئے یاتانی تہاشہ اے دنیا آشْت۔

۔ زندئے روچ گوزان اَت انت ابّاجی وتی علم و زانتا تمامیں بلوچستانا تالان کنان ات۔ 1970 آ بلوچستان یونیورسٹی جوڑ کَنَگ بوت۔ بابا عبداللہ پاکستان سٹڈی سینٹرا لیکچرر ئے جَہتا کار ءِے کْرت۔ 1985 آ بلوچی ڈیپارٹمنٹ جوڑ کَنَگ بوت۔ بابا اسِٹنٹ پروفیسر بوت۔ آ وھدا َ ھر کس کہ بلوچی زبانئے سر اکار پکرتین آئی کِرّا اَلّما کات او بابا آواں کْمکاکْرت ءِے۔

بلوچستانا ابید دَری مردم ھم آئی ھَد ا آھت اَنت اوبلوچی وانت اَنت۔ ابّاجی آوان وتی اولاد ئے وڑاَ وانینتءِے اووتی گِسا جاگہ دات اِش۔ جوزف ایلفنبائن وڈاکٹر کارینہ جہانی کہ بلوچی زبانئے مزنیں نام اَنت، گوں بابا آئی گِسا ہَڈّ اِش کْرت او چو گس ئے مردمے ات انت۔ بزاں بابا عبداللہ جان علم ئے سرچمّگے اَت۔ ہرکس کات وشہ آئی علما سیرآپہ َ بوت۔

باباعبداللہ جان مہر و انسانیت ئے سفیرے ات ھرکس یک وارے آئی مجلسابہ نشتیں پدا تمامیں زند آئرا شہ دلہ نہ بْرت ءِے اوالماآئی ھَدّاَ کات۔ بابا عبداللہ جانئے مہرانی سبب ات کہ آئی زندئے تہا آھرا باز مِہر و عزت رست۔ مروچی ابّاجی گوں ما نہ اِنت بلے آئی یات و گْشتگیں پنت و نصیحت مدام مئے دل و دیدگانی تہا اَنت۔ گْڈسرا من ابّاجی ئے باروا ہمے گْش ایں۔

داں کْوچگا آسے بَلیت تو زندگ ئے

داں بْرزاَ استارے چمِیت تو زندگ ئے