سَنیہا

اُٹھی سَئیݨ سُوہݨی
ذدا ڈیکھ تاں سہی
تیڈے چندربھاگے دے پاݨیاں وچ
ول رتول جھال پئی ڈیندی اے
ول عورت دا اتھاں قتل تھیا اے
ول مرد کوئی ازلی چُپ اچ ھن
ول وُسوں کوں کوئی نانگ لڑئے
ول دھی توں منہ لکیندے َپئین
ول عزت دے نانویں سولیاں ھن
ول رستیاں تے داڑھیل ودن
ول پہرے دار ھی جرمی ھن
ول ملاں قاضی مکری ھن
ول پیر تے میر وی ظلمی ھن
ول بھوئیں واسی بے وس ھن پئے
ول نویں کوک کوئی ماریں ھا
ول نویں وسوں اُساریں ھا
اٹھی سئیݨ سوہݨی
ذرا ڈیکھ تاں سہی
تیڈے چندر بھاگے دے پاݨیاں وچ
ول رتول جھال پئی ڈیندی ھے

٭سنیہا پیغام
٭٭سیئݨ سوہݨی رومانوی کردار
٭٭٭چندر ٻھاگا دریائے چناب دا اساطیری ناں
٭٭٭٭