شاھینہ شاھین ءِ جان ءِ زیان چنچو ارزان اَت

پدمنتگیں چاگردانی مزنیں المیہ ایش انت کہ جنیں آدم ءَ وتی گیرت ءُ ناموس وَ گوشگ بیت بلے جنین ءَ بستار ءُ ارزشت دیگ ءِ باریگ ءَ جاھے مردین ءِ انا ءُ وت واھی دیم ءَ کئیت جاھے آئ ءِ وت سریں ازّت ءُ ناموس ءُ جاھے آئ ءِ ھرس ءُ ھوس یا بدیں تب ءُ لوٹ۔ چُشیں چاگرداں جنین آدم اگں وتی بُنوکی ھک ءِ گپ ءَ بہ جَنت پھک ءَ ملامت اِنت۔ پدءَ اے تنگ نزریں جاورانی توک ءَ اگں جنینے ازمکاری ءِ نیمگ ءَ بئیت ءُ نامے بہ کش ایت ، آئ ءِ دیم ءَ آ سک باز ساڑاھگ بیت داں آ وتی گاماں مہ دارایت بلے باپُشت ءَ آئ ءَ بدءُ سد کنگ ءَ چک ءُ پد نہ بنت۔
شاھینہ شاھین ءِ رنگیں مئے بازیں کسان سالیں جنیں آدم انت کہ آ وتی زندگی ءَ دلوتانی رنگ ءَ گوازینگ ءِ جاہ ءَ زندگیں انسانانی وڑءَ گوازینگ لوٹ اَنت تاں پہ وتی جند ءُ وتی راج ءَ یک جوانیں تبے ودی کُت بہ کن انت بلے اے رُژنا پگریں جنین نہ زان انت نکاح ءِ کاگد تھنا پہ ھمائ ءَ بستار داریت کہ وت ءَ مسلمانے ءُ انسانے زانت ۔ زات ءُ زُریات ءُ وت واھی ءِ آماچیں مردین ءَ انچو ھاٹیگ کُج ءَ مان بیت انت کہ ترا وتی شرعی لوگ بانُک دنیا ءِ دیم ءَ پیش بہ داریت پرچا کہ آئ ءِ نگاہ ءَ تو یک جنسی لئیبوکے ءَ ابید ھچ یے نہ ئے ۔
شاھینہ شاھین ءِ کوش ءُ مرگ ءَ زھن ھچ منّگ ءَ رازیگ نہ اِنت کہ تربت یک مزنیں شھرے ءُ اِدءِ جنیں آدم چَہ مکران ءِ دگہ ھند ءُ دمگاں گیشتر آزات ءُ دیمروی کُتگین انت بلے چاگردی رسانکدراں شنگ بیتگیں ایف آئ آر ءِ کاگدءَ سرترگے دات کہ شائینہ ءِ ناکو امجدءَ پولیس ءِ گورءَ رپورٹ درج کنائینتگ کہ شاھینہ ءِ کُشوک مھراب گچکی نامی مردے ءُ اے مرد ءَ گوں شائینہ ءَ سیر کُتگ ۔
پدءَ دگہ یک پوسٹے چمانی دیم ءَ گوست کہ مردم گپّ ءَ ات انت کہ محراب گچکی نامیں مرداے سیر ءَ نہ منّگ ءَ ات ءُ سیمی پوسٹ ءَ پولیس ءِ کاروای ءَ نادراہ جاہ ءَ لاش ءِ یاروک ءُ دور دیوک ءِ نام ھم مھراب گچکی ءِ نشان کنگ بیتگ ۔
کُشگ ءِ کار ھرکسی بہ بیت ءُ ھر کد ءَ ایر جنگ بہ بیت کم اِنت تُری کُشوک کسے ھم بہ بیت ۔
شاھینہ تھنا یک بلوچ جنیں آدمے نہ بوتگ بلکیں آ وتی پدمنتگیں راج ءِ دیمروی ءِ واب گندوکیں، رُژنا پگریں انسانے ات ۔ اے کسانیں اُمر ءَ آئ ءَ پہ دیمروی ءَ ھمنچو تینزی ءَ گوں وتی گام دیم ءَ بران کُتگ ات انت کہ گمان اَت آ سک دیم ءَ روت ءُ بلوچ راج ءِ بُرز ءُ براھداریں نام ءُ پھرے جوڑ بیت بلے بژن گپے کہ اے رُژنائیں پگر تھاریانی دیمپان کنوک ھما انسان ات کہ آئ ءَ چَہ آ انسان ءَ گیشتر اوست ءُ اُمیت بستگ ات ۔ اوستانی پروشگ سک گران انت بلے پہ شاھینہ ءَ جان ءِ زیان جوڑ بوت ۔
اناللہ وانا الیہ راجعون
اللہ پاک شاھینہ ءَ وتی رھمتانی ساھگ ءَ جاہ بہ دَنت ءُ اے کوشار ءَ ھمے دنیا ءَ رُسوا ءُ سزاوار بہ کنات داں دگہ کسے چوشیں نازاکیں شاھینہ ھانی جان ءِ زیان ءَ ارزان مہ زانت ۔ ءُ شاھینہ ءِ لوگ ءِ مردماں اے گرانیں تاوان سگگ ءِ سبر ءُ ھاٹیگ بہ دیات ۔ آمین یا رب العالمین
گوں شاھینہ ءِ کول ءِ گمانی شریدار
باسک لبزانکی دیوان ءِ کارمستر گوں وتی کہول ءُ وتی کارگشادءَ باسکاں

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*