غزل

(یہ غزل  ہیمنگوئے  کے  مشہور ناول  دی اولڈ  مین  اینڈ  دی  سی‘  سے  متاثر  ہو  کر  لکھی ہے)

 

ارنسٹ  ہیمنگوئے  کے  لیے

دکھ  سکھ  دونوں  جھیل  چکے تھے  ،  بوڑھا  اور  سمندر

ساحل   پہ   اکثر    ملتے    تھے   ،    بوڑھا   اور  سمندر

وقت کی  کھڑکی  میں  بیٹھی تھیں حیرانی  کی  جل  پریاں

دو  شہزادے  ساتھ  کھڑے  تھے  ،  بوڑھا  اور  سمندر

ماتھے  پر  لہریں  تھیں  جیسے   اور  لکیریں   پانی  میں

دو   ملتے   جلتے   چہرے   تھے  ،   بوڑھا  اور  سمندر

سدا  بہار  جوانی   جانے  کب   لہروں  سے   نکلے  گی

سب حیرت سے سوچ رہے تھے ،  بوڑھا اور سمندر  !

سورج  اور  سیاروں  نے  جب  پہلی  پہلی  ہجرت  کی

اک  دوجے  میں  ڈوب  چکے  تھے ،  بوڑھا  اور  سمندر

صبح  سویرے   دونوں  مل   کر  اپنے  آنسو   پیتے   تھے

رات کے  سارے  دکھ سانجھے  تھے ،  بوڑھا  اور سمندر 

صدیوں  کی  رفتار  کو  اک  لمحے  کی  تھکن  نے  زیر  کیا

وقت سے ٹھوکر  کھا کے گرے تھے  ،  بوڑھا  اور سمندر

شام  کو  جب  طوفاں  تھما  تو  دیکھا  بستی  والوں  نے

ریت  پہ  دونوں مرے  پڑے  تھے  ،  بوڑھا  اور  سمندر

عابد  رضا

دوسری  غزل  بھی  یونہی  ارسال  کر  رہا  ہوں۔  آپ  کو  پسند  آئے تو  اگلی  بار  کے  لیے  رکھ  لیجیے۔

صبر  کے  دشت  میں  اُگ  آئی  ہے  فریاد  کی  رات

جانے  کب  گزرے  گی  اس   قریۂِ   برباد   کی  رات

آسمانوں     سے     برستے     ہوئے     انگاروں    پر

رقص کرتے  ہوئے  گزری ہے  زمیں  زاد  کی  رات

گردبادوں   میں   بھٹکتے     ہیں     ابھی    ناقہ   سوار

جگمگاتی   ہے   کہیں    دور   سے   بغداد    کی   رات

زرد   سیارے   پہ   اترے   گا   فرشتہ   اک   دن

کہکشاں   پار   بسر   ہو   گی   پری   زاد   کی   رات

نیند   کی   گرد   میں   ڈوبے    ہوئے   ایوانوں   میں

جیسے  اک  خواب  میں گزری  ہوئی  روداد  کی  رات

کوئی    روتا    ہے   سرِ   شامِ    غریباں   اب  تک

ورثۂِ    درد   ہے    سادات   کو   اجداد   کی   رات