بیائیں جنکاں

بیائے بیائے جنک آں
شما ھال ئے سئی ءِ
چے ھال ئے ماہ وش
ھال ایش انت
مئے ھلک ءَ ویلی ءَ گپتگ
چونے ویل ئے
ما وا ھچ ءَ سہی نہ ایں
ماہ وش ءَ درائینت گشت ئے
اے چتو شما سہی نہ ئے
اے ویل ءَ وا شمارا ھم گپتگ
اے پدا انچیں ویل ئے کہ
ایشی الاج وتئ اندر ئے تہا انت
ءُ ایشی الاج شمے یک دومی کرا انت
جنکاں دارئینت ھو ماہ وش تو انچ گشے
ماہ وش ءَ گشت ھو من انچ گشاں
شریں مارا بگش چونے ویل ئے
پیلیتگ
ویل بے چاڑئ ئے بے سکونی ءِ
نہ وشی ئے
ایوکی ءِ
گشے ھرکسی اندرءِ بنی آدم کندگءَ چہ بیھال انت
ھرکس وتسرو دیم ترگ ءُ نندگ وپسگ انت
ھرکسی اندر ءِزھگ مھر واستہ تلوسگنت
بلے مھر نیست اگا ھما مھر راسگا انت آئی ءَ چہ رازامندی نیست
جنکاں درائینت ھو ماہ وش تو راست گشے
اے ویل وا مئے اندر ھم ھست انت
ما امروز ئے کاراں گٹ ءُ گلائشے انچو
ما انچو گار ایں زندگیءِ زلورتانی تہا کہ اسل زلورتاں چہ بیھال ایں
ما وا زانت ھچ واڈا کنگ ءَ نئے
اے ویل اے دابءَ چیا گیش بوھان انت
ما وا بلکیں کدی ھم وتئی اندر ءَ چہ اے
جست ھم نہ کتگ
بلکیں نہ منیتگ ھم کہ مارا ھم اے ویل ءَ گپتگ
ماہ وش کندگ ءَ لگت
ھو نا ھمے وڈ انت
جنکاں درائینت ماہ وش گڈا
تو چتو سہی بیت ئے
ءُ انو تو کج ءَ روگا ئے
ماہ وش ءَ گشت من وا دیر انت
سہی آں منی بے چاڑی وا ھمے جیڑگ ءَ
چہ مدام ودی بی کہ اے وڈ انت گڈا چیا
اے وڈ انت اے وڈ بوھگ انت
گڈا کجام وڈ شرتر بوت کن
کجام کشک ءِ داراتک کن کہ
بنی آدم وتئی اے چیزاں بیزاں
ءُ ایشاں گوں یک دومی ءَ زرشان بکنت
منی وا بے چاڑی نہ وشی مدام ھمے
جستانی پشت ءَ ودی بیت
من جیڑاں کہ اے جیڑا چو اے وڈا مئے کوم برباد کتگ
موتک انت زاری انت بلے وشانئ نیست کار نیست آ وڈیں کار نیست ھمے چیزاں ھلاس بکنت اے وڈیں دویوان ءُ جاہ نیست ھمے مسئلاں ھل بکنت
گنتر ھرچ جاہ دلترک ءُ دلپٹ کنوکانی انت
من کہ جیڑاں پدا جیڑاں کہ اسل جیڑا گڈا چی انت
پدا پلج باں
پدا پلج شرتر اے واستہ باں ءُ نہ وش کہ
وھدے مئے کرا ھمے جیڑہ بے مول جیڑگ بنت کہ ھرچ مسئلہ ئے جڑ انت گڈا زیاتے شری زھم جنت
پدا جیڑاں باید انت اے پلیجی من ءَ ھچ مہ کنت
اے نہ وشی ھم پدا ھمے نہ وشی گیش جیڑگ پرماایت
من ھیران آں درست وتئی تہا وت
گار انت زلم انت جبر انت
پدا انگا ایشانی ھلاپ ءَ شریں جھد ءُ کار نیست
بے سکونی انت ڈپریشن انت
اے ڈپریشن کہ اے وڈ ءَ مئےمیتگ مانبستگ گڈا روچے یک ئے وت ءَ کشیت
بے زاری انت ھما یکیں چیز انت مدام نوکیں چیز نیست
من ھیران اں مردم بیزاز چی ءَ بنت
مردم بور چیا بنت وھدے کنگءِ واستہ چکا چیز ھست
کش ءُ گورا، مئے مردم گریب انت ھچ نیست ئے کرا
بلے کش ءَ مردم وا ھست ئے کہ بننداں وشیں دانک بکناں
وشیں دانک نیست جست نیست سوال نیست
وھد نیست یک دومی واستہ انگا بیزاری انت ایوکی انت
بے چاڑی انت ۔۔۔۔چتو مردم نہ ایوکی پسند آں نہ مچی
مردم ءَ مردم گوش دارگ یل داتگ مردم مردم ئے پیش دارگ ئے دمب ءَ کپتگ کہ مئے توسیپ ئے ستا بیبیت
مئے اندر زھگ رازی بیبیت وھدے اندر زھگ مزن نہ بیت میچور نہ بیت گڈا آ بھ مزن نہ بیت مزنی ایوک ءَ نامدار بوھگ یا ٹانگانی رودگ نہ انت
مزنی ھما انت کہ اے ایوکی ءُ نہ وشی ءُ زلم ھلاپ ھلکاپیں کشک پٹیت ھما چیزانی سرا گپ جنت کہ اسلہ کنگی انت
جنین تپاک کت
ءُ گشت ئے ھو ماہ وش اے ویل ءَ مئے مردم باز
زہنی مریز کتگنت زہنی مریزی ءِ الاج واستہ وا ھچ نیست
نہ ھم یک دومی ءَ گوں گپ ءُ تران ھست
اسل درد ئے زرشانی نیست بس
یک دومی ءَ گوں گیلگ زاری ءُ میاریگی انت
ھما گپ بھ نہ بنت کہ واکی اندر وارگ آں انت ھما گپ بنت کہ گیشتر پریشانی پیداک کننت
ما ھم لوٹیں ما انچیں گپ تران بکنے انچیں کار بکنے کہ اسل گم ءَ چہ مارا گستا مہ کنت
بلے اے درد ءُ گم ءَ چہ مارا آجو بکنت داں ما ایشان چہ آجو نہ بئے ما بس موتک ءُ ککار والہ راج ئے ءُ میتگ ئے جوڑ بئے
دگے نوکیں ھچ چیز ودی کت نکنے
اے نہ وشی ایوکی بے چاڑی گشے سجینانی تہا ھست
بلے یک دومی واستہ وھد کسی کرا نیست
چشیں جھد ءُ کار نیست یک دومی ءَ را کندگ ءُ ھبر بے پرماایت
بس ھرچ کش ءُ گوارا ھما توار کہ پدا بے چاڑ کنت بے چین کنت بے تاھیر کنت یوک کنت درست ھست گشے ھچ نیست
بلے ماہ وش تو کج ءَ روگا ئے
ماہ وش گشت من ھمآ ایوکی ءَ گوں ملگ ءَ روگا یاں
کہ جیڑیانی پسو ءَ من ءَ دنت
من ھمودا روگا آں اودا من ھرچ ھما کار ءَ کناں
وتئ تب ءَ کہ منی اندر ئے مزنے زھگ ءِگشیت
شما نیائے کہ شما ھمے میتگ مردمانی رنگ ءَ ئے ۔
ایوک نہ وشی ملوری ابیئتکی بیزاری بلے پہ کنگ ھچ نیست
ھبر نیست درست ھست بلے ھچ نیست نہ ایوکی شمارا وشان کت کنگا انت نہ مردومانی مچی گم ایش انت کہ مئے میتگ ئے مردم ھمے ویل ءِمنگ ءَ تیار نہ انت من وا لوٹاں منی نہ وشی وا بھ ھلاس مہ بیت کہ من اے نہ وشی ءَ مناں ءُ ھمے من ءَ گیش گنوک کنت جیڑگ پرماایت اے وڈ اے وڈ انت گڈا کجام وڈ شرتر انت
وشیں گڈا جنک اں ۔۔۔۔۔۔