مڈاہداریں قاسم!۔
مدتے بیت کہ ترا ندیستگ۔ ادبی ھال تران نہ بوتگ ۔من اتکگ اتاں تربتا کمے روچ میتگا شتاں ، شہرا آیگ نہ بوت۔ تو اے گلگ ھم کتگ اَت کہ تربتااتکگاں ترا سرگوز کتگ بلے چے کنئے؟
او انوں پدا انچو یک روچے کہ من چہ بلوچستان یونیورسٹی ئے دیما کاشان ہوٹلا چہ پاد اتکاں منا اناگہ پہ ترا زھیر بوت کہ دیراِنت من ترا ندیستگ گپ و ھال کندگ و مسکرا نہ بوتگ۔۔۔۔
دلا گشت ترا کاگدے نبشتہ بکناں ، لہتیں ادبی ، نیم ادبی گپ و ھال کنیں ۔۔۔ کتھارسس ے بیت۔۔۔۔۔۔۔چوناھا و شال سکیں وشیں جاگہے بلے ادئے ادبی ماحول چو ہمدئے موسم ے وڑا سرد انت۔ (بگندئے پہ دگراں مہ بیت بلے من کہ چو گندان ے تباہی انت)۔ تربتا شاہپور انگت پہ سرے آرگابوتگ کہ وھدے ھالیک بوتگ مردم دلا گشتگ برو مرچی قاسم آ بگند۔۔۔۔۔۔بلے خیر بل اے گپاں دگہ وھدے !!
انوں کہ یک روچ ئے من تئی لہتیں کوہنیں شعر ونت کہ بنداتی اتنت او کتاب ہتا ھوار نہ کتگ انت تاک و ماہتاکاں چھاپ بوتگ انت۔اول سر امنا کندگ اتک پدا جیڑ اِت و ھبکہ بوتاں کہ انچو جلدی یک مردمے انچیں نظم لِکیت کہ ادب ئے تہا نوکیں Discussions بندات بیت او بلوچی ئے وڑیں کسانیں ادب کہ آنہی تہا انگت شریں سفر نامہے او ناول یے پہ دوا نیست اے جیڑگا مجبور بیت کہ نظم چوش ھم گوش انت؟
پدا دومی نیمگا ھمدا بازیں مردمے پاد کیت گشیت اے لبزانکا تاوان دیگا انت اے جدیدیت مدیدیت نہ چلنت۔
اے سوپا ، پوسٹ بکس ، ٹاور ، پوسٹر و ہینڈ گرنیڈ ادی سامان نہ انت۔۔۔۔لہتیں وھد ا پد ما گشت زاناں اے چیز بلوچی ادبانوں ہضم بنت کہ اے
Food Hard ئے اول سرا شانینگا انت ۔بلے تئی دومی شعری کتاب کہ اتک ما پدا ھمے سوال دیستاں۔
لہتیں شاعراں گشتگ ات کہ اے نظم رجانک انت قاسم ڈنی ادیباں جنگ وپروشگاانت۔
دگہ بازیں جاگہاں ما اے گپ ھم اشکتہ” اے قاسم بلوچی تہذیباچہ سستگ بگش ادا اے برہنگیں نظم (یعنی قلوپطرا ، بوسگاہاں ترا و ایدگہ) نہ چلنت۔ اے بلوچی شاعری ئے دیما سیاہ کنگا انت”
خیر! اے گپ ما کمار نہ کتاں بلَے وھدے آخری منی تئی چندیں گند ونندانی تہا شاہپور امن باز براں تئی دپا اے گپ اشکت (اگاں من رد مباں) کہ ہر لبزانک شعر ا وتئی شعری کیلو (Poetics) ئے ھسابا چاریت ادا منی ذہنا دیر اِنت کہ اے جست سر کشیت کہ گڈا تو اے اعتراضاکہ "تو چہ بلوچی تہذیباَ سستگئے‘‘ وت یک جوازے پیش نکنگا ات؟
تئی کستر
رضوان فاخر