دوشمبہ نادے اینو پھر آن بید ٹک تس ….سُہب وختی تغ آن بش مننگ نا عادتی ‘ بے سَندآ دنتان ساز ‘ایسکو‘ شش بجہ غا تینا کلینک ئے مَلا ونقلی آ دنتان تے شیشہ نا شوکیس ٹی سوارنگ ئے شروع کرے ۔ اوکان گڈ او دنتان کشوکا اوازار تے ہم شوکیس نا ارٹمی خانہ ٹے تخسہ کرے ۔ ایسکواسہ باریتہ‘ لاغرو بندغ ئس اسک ۔ ہر امدامی جک سلوک مسکہ ۔ اونا مون آ ہمیش ہندنو اثرئس تالان مروک خنگاکہ دُنکہ کَرّانگا بندغ نا مون آ مریک ۔ حالانکہ اوکَرّ الو….
اوزارتے شوکیس ٹی تخنگ آن پد اودنتان صاف کروکا مشنے گِرسہ تینا کرسی آن خڑک کرے و نقلی آدنتان تے اسیکہ صاف کننگ اٹ گَٹ مس ۔ او نا ذہن دا اختہ ئی کن تیار تو الو ولے او مشنے پیڈل خلسہ دنتان تاصفائی ٹی لگوک اس….
ہشت بجہ غان پد او ساہت آ سیکن سلیس۔ کھڑکی آن کاٹمے کشسہ آسمان نا جا چے ہلک و ہمسایہ نا بامب ئِ کرگزتے دے مون آ تینا پَرّتے بارفنگ آ خنا ۔ اواندازہ ئس خلک کہ نیمروچ آن خڑک پھرنا اُمیت ئس ارے ۔ولدا اسیکہ پدا تینا کاریم ٹے مشخول مس ۔
اونایانزدہ سالہ انگا مار نا‘ ناگمان آن ترندا توار اودے اونا کاریم آن ہیجفے:
”ابّا“
”ہاں؟“
” پیشنے خلق نا چئیرمین /مئیرسلوکے ‘او سوج کننگے کہ نی اونا دنتانے کشسہ یانہہ؟“
”اودے پا ای داڑے افٹ!“
اوداوخت آ خیسن نا دنتان ئس پالش کننگ اس….
اونا مار ہمو کوٹی نا پیشن آن اسیکہ واتوارکرے:
”ابّااو پاننگے نی ساڑی اُس ‘انتئے کہ او‘نا توارے بننگے “
”داتو پین جوانو ہیت اسے“
اواسیکہ وا مشن ئِ چلفنگ ئِ شروع کرے ….
”ابّا“
”ہاں؟“
اونا مون آ ہچو بدل مروک و اثر ئس خننگ توکا:
”چئیرمین پاننگے اگہ نی اونا دنتانے کشپیسہ تواونے گولی آسے نا کیک “
اولپڑزا متﺅ ‘ اُست جمی ٹی مشن نا پیڈل نا چلیفنگے بند کرے و اودے مُر دھکہ تس ومیزنا دراز ے پیشن چکّاہراٹی پستول ئس تخوک اس:
”سہی اے ’ اودے پا برک کنے سُم ئس خل “
کرسی اے گرسہ درگہ نا مون آ کرے و تینا دوئے میزنا ہمودرازے تخا:
چئیرمین درگہ غان خننگاکہ ۔ اونا چہرہ نا چپیکو نیمہ غان ریش شولوک اس ولے اونا پِروکا ‘خل کروکاراستیکو نیمہ ناکلکے ریش ناپُٹاک پینگن اسُر۔
دنتان ساز چئیرمین نابے حس آ خن تیٹ بیوسی نا چندی نن تے گِڈوک خنا۔
اودرازے بندکرسہ پارے :
”تول“
دنتان تے کشنگ نا اوزارک دیر اٹ لاڑ کننگ اسُر۔ چئیرمین تینا کاٹمے کرسی نا پد اٹ جوکہ تس۔ اونا دمہ یخ اس۔ اوکلینک نا جاچے ہلک ہراٹی جوانو بندوبست ئس خنگتوکا۔
پاٹ نا متکنو کرسی ئس، پیڈل والو مشین ئس و شیشہ ئی او الماری ئس ہراٹی بوتل آک تخوک اسُر۔کرسی تون مقابل کھڑکی آ پچ ئنا پڑدہ ئس ٹنگوک اس۔
دنتان سازے تینا پارہ غابننگ آ خننگ تون چئیرمین تینا گوڈاتے اسٹ ایلوتون سرجم طاغت اٹ جاگہ تس و بائے تینا پاچ کرے :
دنتان ساز اونا مونے روشنائی کن چرخ تس و اونا دنتان نا جاچے ہلک و پدا اونا بائے تینا دواٹ بند کرسہ پارے :
”نے بہوش کننگان بید دا دنتانے نا کشوئی تمک !“
”انتئے ؟“
”داخاطر کہ نا دنتان نا شیفغیر آن پُرّے“
چئیرمین ڈاکسر نا خن تیٹ ہُرا”سہی ئے“ او پارے و بشخندہ نا کوشست ئس کرے ۔ ڈاکسر اونا بشخندہ نا ہچو ورندی ئس تتﺅ۔ لاڑ کروکا دیرتے آن باسُنگا اَمبُرے کشا و میز نا زی آ تخاوایلو اوزار تے ہم یخو چمٹا سے ٹی ارفے و میزآ تخسہ کرے ۔ تینا چوٹ نا بوزاٹ تُف دانے گرسااونا اصل جاگہ غا بریبرتخا۔ولدا تینا دوتے سلنگ کن نلکہ غا ڈول کرے تینے ۔
داغٹ کاریم تا وخت آ اواسہ وار ہم چئیرمین نا پارہ غا ہُرتﺅ۔ ولے چئیرمین ڈاکسر ے اسُل تینا نگاہ غا گوئےتو ڈاکسر ہرانگ ہناکہ امر کریکہ دا نانگاہ اونا رَنداٹ اس….!
چئیرمین نا زَدہ انگا دنتان شیف نا خام لَک اسک۔ دنتان ساز تینا خَٹ آتے زرس مَلا و باسُننگا اَمبُر ٹی دنتانے سوگﺅئی ٹی ہلک ۔ چئیرمین ہم تینا سرجم طاغت اٹ ہڑتوما دوتے کرسی ناباسک آتے آ سخت کرے و نت تے تینا مُچ کرسہ تینامنت آ تینے سوگﺅ کرے ۔اوتینا بِکّ آتیٹ یخی ئس محسوس کرے ولے با ءآن توار ئس ہم کشتﺅ۔دنتان ساز بیرہ تینا دوئے چرخ تننگ اس۔ اوزرس خرینو تب اسے ٹی چئیرمین ئِ پارے :
”نی داسا ننا بیست بندغ نا کسفنگ نا حسابے ایتوس“
چئیرمین تینا باءٹی ہڈاسے نا کڑپہ ئے مارِنگ اس و اونا خن تیان خڑینک آک وھنگ اسُر۔ ولے ہراتم اسکان ہمو دنتان اونا باءآن پیشن متوسس او دمہ ئے تینا ہم چک تﺅ۔خڑینکی آ خن تون اودنتانے تینا ہُرا۔ اودادنتان ناخننگ تون اینو نا غٹ تکلیفے ہوشان درے کہ انوکا پنچ دے ونن آن دانا سبب آن بھلوعذاب اسینا گواچی اس:
خیدآتیٹ اسٹ او لڑزیسہ تف دانے ڈول کرے تینے ۔ اوتینا کوٹ نا بٹن تے مَلا وپتلون نا جیب آن رومالے کشنگ نا کوشستے کرے ۔ دنتان ساز پاکو پُچ ئس اوڑے مُریفسہ پارے:
”تینا خڑینک آتے پاک کہ “
چئیرمین خڑینک آتے پاک کرے ۔ اولڑزنگ اس۔ ہراتم اسکان دنتان ساز دوتے تینا سِلّا۔ چئیرمین متکنا چھتے ہُرسہ کرے ہراڑآن موکوآتا کتام و مڑدہ انگا جوجک آک ٹنگوک اسُر۔ دنتان ساز تینا دوتے پاک کرسہ پدی بس”اُراغے ہن زرس جارات کہ و پگہ اسکان منہ وار بے ودیر اٹ غلغو ہم کیس “ اوپارے:
چئیرمین سرہلک ۔ اوفوجی تا ڈول سرسری ڈول دنتان سازے سلام ئس تس و درگہ کہ مون کرے ۔ نت تے زرس ترپیفے و کوٹ نا بٹن تے تفسہ پارے :
”بلے تینا راہی کیس“
”دِنّاپنا؟ نا یا ٹاﺅن کمیٹی نا ؟“
چئیرمین اونا پارہ غا بید ہُرنگ آن درگہ اے بندکرے ۔ درگہ غا ٹنگوکا چِکّ ئنا پدآن اونا تواربس :
ہچو فرق ئس کپک ۔”کمینہ معانی تا اسٹے “
