او مرضِ لادوا تہر کھن، سُکو نا گوں مِرغا دئے
منی اِے جسدِ بے وسّا قبرا داں رَوغا دئے
عزیز و اقاربے ناما وصیت نے منی ھچی
یک منٹے بے وفا نا ما، دو کلمات بس پڑھغادئے
تھ وث ھچی نَیَثئے دڑد تھرا دوہمیاششتاثا
ہما ہی پلّوا نیک خواہشی ٹھؤکے کھنغادئے
تھرا من سینغا داشتہ اودڑد سینغ پُروشے ثئے
ہمے سِنگان وثی سغر سرا مئیا رِشغا دئے
اُمید و آسرا وخت نی شذا ، مغرب تہار بیثہ
تہار نیا مغا دوژہ درغا سُوہڑغا دئے
منا ں گِند گوں ئے ھنچی نے کہ دوائے شک تھرا بوشتی
شباب شوق آں زہرگالاں شہ دو ٹھؤک بشُکنغادئے
بیانِ عشق بندی ء نہ کھولاں ، دف نہ پڑھاں من
اِے دربندیں شہ چماں قطرہے گرمیں رشغا دئے
اغہ اِنگا مناں کُشتئے تہ دوریں لاش داث چِھرکاں
اِے کوفغ کاندھی آں تُڑسین نہ، گوربرغا دئے
مناں بیار انت قبرا ایر کھن انت جھٹے دراتھ جکّ
اِے جسدِ خاکی آ لحدا گوں مِٹّی آ ملغا دئے
مِروشی دف کھذؤ مندوست تھرا سوالیں اِے دڑدِ عشق
پھذی مڑداں ہمے کرب و بلا قِصّو پڑھغا دئے