دریا گْج و گَپ اَت…باریں چنچو وھدانی زھر ا تیابئے سرا کشّگ ءَ ات…بوت کنت دل کہر ات , پیسرا چہ تیابا شدیگ اتکگ انت مروچاں ازگار پیداک انت…ستار ئے چمّ گجّانی سرا اِت انت , زھرناکیں گورم کاینت , پرش انت , پدا کاینت , پرش انت۔۔۔.
"دریا ھم منی رنگا گوں وتا زھر انت” ستار ا دلاگوئشت۔۔۔سنگے چست ئی کت چگل ئی دات , آپاا پلکّ اِت۔۔۔دگریں راہ ئی دات , برورد ھما دراتک۔۔۔وتی کِر و گور ئے دراھیں سنگ اے امیتا یک پہ یکا چگل ئی دات انت بلکیں یکے واتر کنت۔۔۔سنگ ھلاس , برانز گپتگیں دریا برجم۔۔۔
"برو ترا بمبے لگّات” دراھیں زور ئے گوما جاک ئی جت۔۔۔
گریوگا لگّ اِت , ارس شلان اتاں۔۔۔
گریوگ گریوگا ماہ تونئے ورناھی ئے ترانگا کپت…”بیائے جنکاں ستار انت , ستار شمئے دشتار انت”۔۔۔.”سوتکگ , آس داتگ , ٹوپئے دپا داتگ , مرت ستار , کرم گپت ستار” پدا ککار ئی کت۔۔۔.
ماہ تونئے گیمرتگیں دیم چمّانی تہا نشت۔۔۔سر ئی چنڈ اِت , ھیالانی بور دیم پہ مھناز ئی تاچینت۔۔۔بور تتک , تتک , تتک , تست کپت , مھناز نہ رس اِت…
دریا ئے چے بے وسی ئے ڈنڈیں بو ایں چست بوت۔۔۔پونز ئی ستک , چمپل ئے تاھے دریا آ شانک ئی دات۔۔۔ماہ تونئے دیم پدا اتک , سرئی چنڈ اِت , وتا مھناز ئے ترانگانی بینگا چگل ئی دات , بینگ پڑگل بستگ ات۔۔۔.پڑگلانی تہا ماہ تون دیم شکون کپتگ اَت۔۔۔سر ئی چنڈ اِت , ککار ئی کت "مھناز۔۔۔…”…دریا آ توار چگل دات "ماہ تون”۔۔۔.”بیائے جنکاں ستار انت , ستار شمئے دشتار”.. دیما شھمات ئی جت "ایر موش بئے مات ۔۔۔۔۔۔ آں”۔۔۔.
اناگاہ یکے آ گوشانی تہا شیزارگ بنا کت۔۔۔شیزارگئے توار برز روان بوت , برز , برز , سک برز , یک سر ا بدل بوت…توار جوڑ بوت , وڑ وڑیں توار , کچّلیں توار , تھلیں , بو گپتگیں , بیمناکیں توار۔۔۔”چگل ئی دے , کل ئی کن , دور ئی دے , شم انت , قیامت انت , گٹ ئی گِر۔۔۔۔۔۔۔۔۔..دریاآکورّائی”۔۔۔.
گوش ئی بست انت۔۔۔توار انگت پیداک اِت انت۔۔۔جنینی توار , مردینی توار , پیرزالی , کماشی , بلغمی , کلگ ئی توار۔۔۔.توارانی ھار اَت…
اناگاہ ھاموشی بوت , دریا ئے گْرَّگا ھم وت کشی کت۔۔۔.
پدا توارے اتک۔۔۔”جنینا لاپ پْرّیں ننکے آؤرتگ”…
