داکتاب امر وجود ٹی بس وہراڑے لکھنگا۔۔۔؟
’’چنکا چناک ہم بھلو بھلو تُغ خنیرہ‘‘:
(پالنے نہ اسہ تختی سے آ لکھوک)پ
’’ہراسلہہ بیرہ اسہ وار کارمرز (استعمال) مریک ‘ اودے ہم تیویٰ زند پٹوئی مریک‘‘:
’’ہراشعراک زندمچ پاننگرہ اوفک اسہ نشست ئٹ جوڑنگرہ ‘‘:
ہتم نا مُدّءِ ۔ اسہ مَشی و خلقی ءَ سے ہتمی مُدّ نا چُک ئس پیری کننگءِ ‘ اوہندنو جاگہ سینا پٹ وپول ٹی ءِ ہراڑے دمس تول ءِ جارات کے ۔ دُن اودے اسہ اُراسینا پتن ، زیباء، صاف وبریبرءَ بان و اوڑا تخوکا لغوشت انگا خل ہم نظربریک۔ اوتینا پَرّہ غاتے مچ کیک وآسمان نا شابیتی تے آن شیف ہند الغوشت انگا خل آ تولک زرس جارات کیک۔اسہ زیباؤ پیغلہ سینا نگاہ اوڑا تمک ‘ اومدان مدان آ ڈھکوئی بریک وچُک ءِ ہلیک اُراٹی دیک ۔ چک ہند اپوہ مریک کہ اُرانا غُٹ باتیک اوڑکہ مہر کیرہ ۔ اوآخوبتی کہ ہندااُراٹی رہننگک و کوٹی نا متکنو مول*ہی شاتیر ءَ سے تینکہ کدام ئس جوڑک:
’’اگہ ای تینا کتابءِ ہندا چُک ءَ نا مثال ءِ ایتیوتو امرمریک؟‘‘
چندی وارای تینا شاعری نا آسمان ءَ بال کرسہ نثر ئنا ملگزاراتا پارہ عشق آن پُر و نظرئس شاغانُٹ ‘ و اسہ ہندنو جاگہ ئس پٹ ولوٹ کرینٹ کہ ہراڑے تولیسہ ای تینا دم ءِ راست کیو:
ولے اخہ داوڑ پاننگ زیات جوان مروکہ ای ہمو بالی جہاز اُٹ ہرا ڈغارا شیف مننگ کہ بالی پَٹ نا زی آ پیر ی خلنگ ءِ ۔ ای شیف مننگ خواواولے بالی پَٹ نا کنٹرول جاہ غان موسم نا خرابی نا سبب موکل رسینگ اف۔ ای خلنگ ءِ بس کیوہ‘ واسہ پارہ غا سرہلیوہ ‘ ای ہرا ڈغارادڑنگ خواوااواسیکہ وا کنے آن پد سلنگ ءِ ۔۔۔باز واردُن مریسہ کرینے ۔۔۔و دُن ای سوچاٹ کہ شیف ڈٹ وڈھل ءَ سے آ شیف مننگ کنا بخت اٹ اف‘ شیف بڑز ‘ چیل وچُر آتا ڈغارا بُسڑوکنسہ مون مستی ہننگ کنا گام آتا نصیبہ ءِ :
ای چاوہ کہ کنا خنتے داڈغارا پوسکن پوسکنو جاگہ پٹنگ آن ہچو وختس دم درمفروراُست ئنا بخت ہندادے کہ او ہر پاس ءَ پوسکنو گچینو باگُل جوڑیسہ کائک:
ہمو بزغر نا ڈول ہرا تینا کاٹم نا زی آن تدوکا جمرتہ نود ئس پُراُمیتو نگاہ سے ٹی ہُرسرے تہ زیباء انگا چِرآن چَس السہ اسیکہ وا لنگارءِ پبی دوٹی ہلسہ تیناکاریم ٹے مشخول مریک‘ ای ہم تینا ہمو نظم نا پارہ غا سرہلیو ہ ہراناپورو سلوک اس:
جی ہان ! ای تینا شاعری ءِ آسمان نا شابیتی تون مون پہ مون اخس کیو ‘ شاعری کنکہ کنا پالیز نا ڈول مسونے ‘ لنگار نا شِل انگاکمیرنا جومب لگنگ ناچاری آ ڈغار و سخت انگا کاریم۔ داوخت اسکان ای نثر ئنا پڑا ہچو قدم ئس ارفتیوسُٹ:
اسہ دے ئس کنے چِھٹی ئس رسینگا۔ لفافہ ٹی اسہ ہندنو رسالہ سینا شونکارنا کلہو ئس ہرانا ای بے حد عزتءِ کیوہ و گچین آ ہیت داکہ تینٹ دا شرفمندہ شونکار تون بھلو عقیدت ئس تخیوہ ‘ شونکار تینا چِھٹی نا بناءِ ہرا جملہ غان کریسس اواس’’ شرفمندا رسول‘‘ و گواچنی دادے کہ دا شرفمندی تینے ٹی بھلو معانی ئس تخکا:
چِھٹی ءِ مَلاٹ تو چِھٹی انداخہ در بھلن اس دُنکہ دا چِھٹی ئس مف بلکہ مےئی سینا ہمو سل مرے ہرادے مَشی آ مخلوق باریفنگ کن تینا اُرا نا بان ءَ تالان کیرہ ۔ وختس ای چھٹی ءِ خواننگ اسُٹ تو اونا پنہ غاک ہم ہندن شپر شپر کننگ اسُردُنکہ مئیی نا بارونا سِل ءِ وختس شیف اُراٹی دننگ کہ کوریرہ تواو شپرشپر ہ کیک ۔ اگہ کمتی ئس تو سل آن پیشن مروکا ترندانگا گندئنا۔ چھٹی ٹی ہچو وڑءَ سینا وشبو ئس الو۔
شرفمندا شونکار لکھاسس’’نن فیصلہ کرینن کہ رسالہ نا بروکا گڑاس تاک آتیٹ ’’داغستان‘‘ نا سرسوبی ‘ جواننگا کاریم تاو ہڑدے ئی حوال ءَ تے شینک کین ۔ ننا اُست خواھک کہ داٹی ننا لس پوریاگرنرینہ ونیاڑی تا قصہ غاک مریر‘ اوفتا بے مٹ آ جہد و ارمان تہ قصہ نما مَشی آ وطن نا روشنا ’’آخوبت‘‘ و داغستان نا کَرن تے آن تالان متکنا ذکر ءَ تون اواراوار اونا نمہ دارا’’ داسانا جاور‘‘ ءَ زیات زورتننگءِ ‘نن داہم فیصلہ کرینن کہ دا سرھال ءَ نے آن زیات جوان پین کس نوشتہ کننگ کپک ۔ سلیس دا ہیت کہ داسرھال ءِ امر بیان کننگ ءِ ، اظہار ءِ خیال کہ ہر اصنف ءِ دوئی کننگءِ ‘ تو دانا فیصلہ ءِ نن نے آہلانن‘ گْونڈو افسانہ لکھ‘ نوشتانک لکھ ‘ خاکہ جوڑیا گْونڈو نوٹ ۔نوشتانک( مضمون) ٹائپ نا 9’10پنہ غا تالان مرے تو زَبرءِ ودادے ہرحال اٹ 20’25 دے ٹی ننے اسکا سرمروئی ءِ ۔ نن نا کمک نا اُمیت واراُن و نن داڑکہ پیشگی نما منتواری ارفنہ ۔۔۔‘‘
اسہ زمانہ ئس اس کہ مسن تا برام تے اوفتا مرضی آن بید کریرہ ۔ بس اوفتے انداخس پاریرہ کہ غٹ ہیت آک مسنو ‘ داسانے فلاں ولدءِ فلان تون زندءِ تہرکروئی ءِ ۔ ولے اوزمانہ ٹی کس اٹ داخس جیرت الوکہ مارئنا برام نافیصلہ ءِ بید اونا مرضی آن کے ۔ مخلوق پاھک کہ ’’گیداتلی ‘‘خلق ئنا گڑاس بندغ ہندن کریسُرتوانت داشرفمندا شونکار ہم ہمو مَشی خلق گیداتلی ناسے؟کہ اوکنتون خُلوکا غٹ ہیت آتے مالہو کرے۔ ولے انت ای مگہ فیصلہ کرینٹ کہ تینا ’’داغستان‘‘نا قصہ ءِ 9پنہ غااوہم 20دے نا تہٹی لکھیو:
کنا خار بس او خاراٹی ہمو چھٹی ءِ اخس مسکہ تینے آن مُر خساٹ۔ منہ دے آن پد کنا فون نا گھنٹی ہندن ترندی ٹی توارتوارءِ بناکرے دُنکہ او ٹیلفون ئس مف بلکہ کُکڑ ئس مرے ہرا بیدہ تننگ آن پد بھلو کارکارئس کرسہ تینا کھٹنگ نا پڑوءِ کیک ۔ فون رسالہ نا دفترآن اس:
’’ہیلورسول! نمے ننا چھٹی رسینگا؟‘‘
’’جی ہان ۔ رسینگا‘‘
’’تونوشتانک نا امرمس‘‘
’’خنسہ نے کنا دست گَٹی تہ جوان سرپندی ارے ۔۔۔ہیت دادے کہ کنے اسُل واردوبتنے ‘‘
’’ہُر رسول ! نی ننتون نیمون کننگ کپسہ ۔ ننا رسالہ نا شینکاری کچ 10لَکّھ نا خڑک ءِ و دادے ڈَنّی ملکاتیٹ ہم خوانیرہ ‘ اگہ نی واقعی انداخس گَٹ اُس کس ءِ نے کمک تننگ کہ راہی کینہ ۔نی بیرہ انداخس کہ اودے تینا سرجمی ٹی تینا خیالاتے پا مونی ایلو غٹ کاریم ءِ اوتینٹ کیک ۔ اونا جوڑوکا مسودہ ءِ نی اسیکہ گڈی نگاہ غان کَش ہراڑے بدلی ئس اتوئی اس تواَت وولدا تینا دستخط ءِ کر‘ ننکہ بیرہ نما پن گنج ءَ سے ۔
’’ اگہ مہماناسینا کس تون لگپک اودے خننگ آن مہمان خوش مفک تو اوہند اکڑزک کہ ہڈوتَرک آتے اسہ جاہ بُرفنگءِ ۔ اگہ مہمان ءِ خننگ تون کس نا پیشانی ناکرنچ آک ودیرہ توخداکے کہ اونا اُراٹی ہچو نیکو بزرگ ئس بچپ ہرااودے نیکی وجوانی نا صلاہ ایت ءِ ونہ اودے بنوک مرے ونہ عمل کننگ کہ اوتینٹ زندہ سل ءِ ‘ننا علاقہ ٹے مہمان تہ داخہ در قدرءِ کیرہ ۔ ولے خدانا پن اٹ کناپارہ غا سالیخانوف ئس راہی کپیرے(’’آوارزبان اٹ اگہ دُن پاروئی مس کہ کاریم بھاز جوان مننگءِ تو اوڑکہ ہندا بجازی ءِ مونی مستی اتیرہ کہ بلکل سالیخانوف نا طنبورہ نا وڑ‘‘) ای اونا کمک آن بید تینا طنبورہ ءِ ساز کننگ کیوہ ‘ تینا صراحی نا دستہ ءِ خلنگ کیوہ ۔’’ اگہ کنا دلبندآخارش مننگ ءِ تو کنے آن جوان دیر چاوکہ ہراجاگہ ءِ خواریفنگ نا ضرورتءِ :‘‘
(برجائے)
