Find the latest bookmaker offers available across all uk gambling sites www.bets.zone Read the reviews and compare sites to quickly discover the perfect account for you.
Home » شیرانی رلی » کس دن مجھ کو پہچانوگے؟ ۔۔۔ رخسانہ صبا

کس دن مجھ کو پہچانوگے؟ ۔۔۔ رخسانہ صبا

آخر کس دن تم میری آواز سنو گے؟

کس دن مجھ کو پہچانوگے؟

 

میری آنکھیں

اپنی مٹی میں اشکوں کی فصلیں بو کر

ہیرے موتی چُن سکتی ہیں

میری سانسیں

رنج و الم کے تار سے آگاہی کا ریشم بُن سکتی ہیں

 

میرا کاجل

درد کی گہری تاریکی کو

اپنی بانہوں کے گھیرے میں لے سکتا ہے

میرا آنچل

آرزوؤں کی انگلی تھامے

شوق کی لَے پر ہو کر رقصاں

 

تازہ موسم کا سندیسہ دے سکتا ہے

 

میں سیفو اور میرا بائی کے پیکر میں

پیار کی بزم سجا سکتی ہوں

اور جھانسی کی رانی بن کر

رزم کے گیت سنا سکتی ہوں

 

تم میرے خوابوں کو کانچ کے ٹکڑوں میں تبدیل کروگے

لیکن میں کولاژکی صورت

ان سے اک روشن تصویر بنا ڈالوں گی

تم میرے لفظوں کو جب بھی استہزا کے شور میں یوں تبدیل کروگے

میں اپنی آواز کے شعلوں سے زنجیر بنا ڈالوں گی

میں تخلیق کا سر چشمہ ہوں

یہ سچائی آخر تم کس دن مانو گے؟

کس دن مجھ کو پہچانوگے؟

Check Also

بانجھ بنجھوٹی ۔۔۔ انجیل صحیفہ

میں نے  کثرت سے آنکھوں کی بینائی خوابوں پہ خرچی ہے سو آنکھ اب کوئی ...

Leave a Reply

Your email address will not be published. Required fields are marked *