نظم ۔۔۔ اسامہ امیر

ماؤں کی حالت غیر ہو رہی تھی
جن دنوں متوسط طبقے میں
گیت لکھے جانے لگے
انقلابی گیت
جس میں ایک شخص کی موت
اور ایک چاقو کا ذکر تھا
بیشتر گیتوں میں
ایک چیخ
اور آنسوؤں کی نمکیات
واضح محسوس کی جاتی

مائیں
بیٹوں کے لئے
شب بھر دعائیں کیا کرتیں
اور گھروں کے دروازے کْھلے رکھتیں
واپس آجانے کی راہ دیکھنے والی
کھڑکیوں میں چنی ہوئی
سرخ پرچم سی آنکھوں نے
اپنے اعصاب پر قابو پانا سیکھ لیا

بیٹے
اپنی مٹی فتح کرنے نکلے تھے