Find the latest bookmaker offers available across all uk gambling sites www.bets.zone Read the reviews and compare sites to quickly discover the perfect account for you.
Home » پوھوزانت » گالانی بادشاہ مبارک قاضی ۔۔۔ عبداللہ شوہازؔ 

گالانی بادشاہ مبارک قاضی ۔۔۔ عبداللہ شوہازؔ 

کوئٹہ ڈگری کالج ئے ہال چے سر اچاسرا چہ مردما پُر اَت ۔ اناگتا دیوانا نشتگیں سرجمیں زال و ورنا پاد اَتک انت و چاپاں سرجمیں ہال سرا زرت ۔ یک کماشیں سپیت ریشیں مردے پُترت و دیوان ئے دیمی ردا نشت ۔ داں زنڈیں دمانے آ چاپانی توار ا ہچ تھم نہ کت ۔ لہتیں جوان عقیدت مندی ئے ہما سرٹلّا رستگ اتاں چمّانی ارسانی چیر دےئگ ئے حاترا سر اِش جہل کت انت دانکہ دگہ کسے آہانی اے نزوری آ سما مہ کنت ۔ ہمے ورناہانی ردا من ہم ہوار اِتاں ۔
چاپ و وش اھتی تواراں وتی زور وارت سرجمیں ہالا حاموشی آ مانشانت ۔ تا وہدی چہ سٹیج ئے سرا جارچین ئے توار اَتک کہ ما بلوچی زبان ئے مزن نامیں شاعر واجہ مبارک قاضی آ وتی دیوانا وش اھت کناں ۔ بلوچ سٹوڈنٹس ایکشن کمیٹی ئے اے اوّلی مرکزی کونسل سیشن ئے دیوان سرجمیں رنگے آ گوں مبارک قاضی ئے آہگا بندات بوت۔ بلئے سیشن ئے بنداتا داں آسرا چے حبر بوت، کئے آ چے گشت ، کئے چے رنگیں تقریر کت ، کئے آ بلوچ راجدپتر ئے تاک شنگینت انت من یک حبرے ہم جوانیں رنگے آ گوش داشت نہ کت ۔ منی زند ئے دیریگیں واہگے سرجم بوت وہدے مبارک قاضی گوں من یکیں ہال ئے تہا دیمی ردا نشتگ ات ۔ مروچی ہما روچ رستگ ات کہ وتی مرشد ئے پیشانی آ بہ چکّاں ۔
من ہائی سکولا نہمی تبکا وانگا اتاں کہ ہم گنگلے آ منا بلوچی شاعری ئے کتابے سوگات کت ۔ اے کتاب مبارک قاضی ئے ’’ منی عہد ئے غم ئے قصّہ ‘‘ ات ۔ اوّلی رند اَت کہ منا موہ رستگ ات کہ قاضی ئے شعراں کتاب ئے دروشما وانگا اتاں ۔ چوناہا چہ گشندہانی دپا آنہی ئے ہمنچو شعر اِشکتگ ات کہ ہما زمانگا منا ہم آنہی بازیں شعرے منا دل یات ات بلئے کتاب ئے وانگ ئے وتی چاڑے۔
ما کہ نوک شاعری ئے پڑاگام ایر کتگ اتاں آ وہدی مئے حون گرم ات ۔ روچے یک شاعرے ئے رنگا شعر نبشتہ کنگ ئے جہدکت ۔ ہر روچ نوکیں شعرے ، باریں شعر گشگ بنت یا نہ بلئے چار گال رد و بند دات و سنگتاں گوش دارینت ۔ لہتیں سنگتاں مئے سرا کند اِت و پہ تژن مدام گشت اِش شما مبارک قاضی نہ بئے ۔ ہما زمانگا تہ ہمے واہگ ات کہ کدی بہ بیت ہمے مردا بہ گنداں ۔ مرچی سوبا داتگ ات کہ ہما مرد مئے ہوری آ مئے ردا نشتگ ات ۔
مبارک قاضی آ گوں وتی سیادی ئے مارشتا من گالانی تہا بیان کت نہ کناں ۔ بلئے چہ آنہیا متاثر بوہگ ئے مستریں سبب آئی ڈولدار و بے دروریں بلوچی شاعری اِنت ۔ دومی پہ بلوچ راجا آنہی داتگیں قربانیاں ہم آنہیارا منی نزّا مزنیں نامے بخش اِتگ ات ۔ قاضی ہما مرد اِنت کہ آنہی ئے بچّ یکے اَت و آنہیا ہمے یکیں بچّ ہم پہ بلوچ راج و بلوچ سرڈگارا ندر کت ۔ ہمے دیوانا تران کنانا رحیم مہر ا قاضی ئے زندئے بابتا جوانیں رنگے آ تران کت ۔ آنہی ئے اے رد ادا نبشتہ کنگ کرزیت ۔’’ قاضی چہ اندر و ظاہرا یکیں مرد اِنت ‘‘۔
چوناہا بائد اِنت ہمک ازمکار وتی ازما چہ وتی جندا گیشتر ارزشت بہ دنت ۔ اگاں ازمکارے وتی چاگردی کدّ و بالادئے ساپ و سلّہ کنگ ئے رندا بہ کپیت تہ آنہی ئے ازم الّما لیگار بیت و آنہی ئے تہا نرگسیت ئے مارشت ودی بیت ۔ قاضی ئے ازم پمشکاسلّہ اِنت کہ آ وتی ظاہرا چہ گیش وتی ازم ئے پانپاہ اِنت ۔ قاضی اوّلیگیں بلوچ شاعر اِنت کہ آنہیا وتی زندا چشیں نامے درآؤرتگ ۔ اگاں چو گشگ بہ بیت کہ بلوچی شاعری ئے راجدپتر ا ملّا فاضلا پد اوّلی شاعرمبارک قاضی اِنت کہ آ ں وتی عہدا اینچو نامدار اِنت تہ رد نہ بیت ۔ آنہی ئے نامداری ئے مستریں سبب آنہی ئے شاعری ئے بنگپّ و درشانداب اِنت ۔
سنجیدگیں وانوکے یا گوشداروکے قاضی ئے نام ئے آہگا ساری چہ زبان و درشاندابا چہ کیاس کت کنت کہ اے شاعر مبارک قاضی آ ابید دگہ کسّ بوت نہ کنت ۔ تنے وہدی مبارک قاضی ئے شعرانی ہفت دپتر چاپ و شنگ بوتگ چریشاں ہر یکے وتی مٹّ و درور وت اِنت۔ چو کہ ، شاگ ماں سبزیں ساوڑا ، زر نوشت، منی عہد ئے غم ئے قصّہ ، جنگل چنچو زیبا اِنت ، حانی منی ماتیں وطن ، مرگ پہ کدوہاں رپتگ انت، و چولاں دریا یل داتگ ۔ اشاں ابید آنہی ئے بے کساس شعر گشندہاں وتی پیت بنداں ہم گشتگ ا نت ۔
قاضی ئے شاعری ئے مستریں جوانی اِش انت کہ ہر وہد و زمانگ ئے تبا آنہی شاعری ئے درشان و بنگپ ہم بدل بوتگ انت ۔ 1956 ء آنہی ئے ودی بوہگا بگرداں انّوگیں وہدا بلوچستان سیاسی ، سماجی و معاشی برزو جہلاں چہ گوستگ ۔ بلئے اگاں اے زمانگا قاضی ئے شاعری تپّاسگ بہ بیت تہ ہمک عہدئے تبا آنہیا وتی شاعری آرا زمانگ ئے کالبا ایر ریچگ ئے جہد کتگ و اے پڑا آ سوب مند ہم بوتگ۔ قاضی ئے شاعری ئے مزنیں بہرے گوں بلوچ چاگرد و راجی جیڑہاں بندوک اِنت ۔ اشی آ ابید آنہی مہرانکی شاعری ہم وتی مٹّ و درور وت اِنت ۔ وتی دوستدار ئے یاتاں آنہی ئے ساچ اتگیں شاعری ئے درور ہچ بلوچ شاعرئے گورا گندگا نئیت ۔ یک و دو شعر سیل کن اِت:

ارسے چہ دیدوکاں تئی پلّے چہ ملگوراں تئی
بیا بیا منی ساہ ئے بدل بازیں غماں کوراں تئی

چہ حانی ئے زہیراں بیتگ فقیر نالیت
دل چو منی سروزا مرچاں زہیر نالیت

دل کہ شپ روچ انتظارا اِنت
سہب و بیگاہ ترا توار ا اِنت

تہنا من بے تو گار باں امبروز ئے رنگانی تہا
ہرچی پدا شوہاز بیت تئی ترانگاں وہدے کپاں
اگاں برزا داتگیں ہمے گڈّی شعر ئے دوئیں کڑی گوں ہورتی آ تپّاسگ بہ بنت تہ قاضی ئے زہیر و ترانگ ئے ہم نوکیں رنگے درا بیت ۔ آنہیا سما اِنت کہ ابید ئے مہر ئے مارشتا زند بے رنگ اِنت ۔ زند ئے و شرنگی ہما وہی مارگ بیت کہ زند ا مقصدے بہ بیت ، کسے ئے ودار بہ بیت یا منزلا رسگ ئے اُمیت بہ بیت ۔
قاضی ئے راجی شاعری ئے تہا ہم پہ بلوچا آنہی ئے دردواریں دل ئے دریکّگانی توار اشکنگ بیت ۔ وتی راجا کہ پہ بزّگی و ایردستی گندیت آنہی ئے دل دوتّ کنت ۔ وتی ہمے پاہاراں گالانی دروشما رِد دنت داں بلوچ راج ئے لس مردم آنہی ئے پیغاما سر پد بہ بیت و وتی راجی ڈبّہاں بزانت ۔ چو کہ :
دژمنا سرجما چاگرد کتگ ہلک منی
وتی بن پیرکی زہما من چتور ایر کناں

ہمے باتنا در پہ دریں قاضی منی نوانا نشتگ ا ت کہ سیشن سرجم بوت۔ یکّ یکاّ ہال ئے کرسی ہالی بوہان بوت انت و ہریکے آ وتی راہ گپت و شت بلئے انگتا اد ا موہ نہ رست کہ وتی واہگا پیلو بہ کناں ۔ بیگا ہ آدرا در واجہ اے ۔ آر۔ داد ئے لوگا شت آں و وتی عہد ئے پیر ئے پیشانی بوس اِت ۔ اے چاریں گال ہما بوسگ ئے مزّ انت و ہما دوترمپ ارس ئے قیمت انت کہ منی نزوریں چمّاں گورت انت !!!!۔

Check Also

دفتر اِمکاں ۔۔۔ فہمیدہ ریاض

’’بدن دریدہ‘‘ کی اشاعت سے اور تو جو کچھ ہوا یا نہ ہوا، لیکن اُردو ...

Leave a Reply

Your email address will not be published. Required fields are marked *