Find the latest bookmaker offers available across all uk gambling sites www.bets.zone Read the reviews and compare sites to quickly discover the perfect account for you.
Home » کتاب پچار » ممتازئے ’’بے نام‘‘۔۔۔۔عبداللہ شوہاز

ممتازئے ’’بے نام‘‘۔۔۔۔عبداللہ شوہاز

چلّی ئے نامداریں شاعر پابلو نرودا نبشتہ کنت :۔
’’یک رندے یک مردے منی گو را اتک و بے جست و پرسا منا وتی گاڑی آ سوارے کت و ما دوئیں رہادگ بوتیں ۔ من ہچ جست ہم نہ کت کہ ما کجا روگا ایں ۔ راہا روان روانا یک جاہے مردا گشت کہ ما مزدورانی یک مچّی یے آ رؤگا ایں کہ اودا منا تقریر کنغی ات ۔ منا وتی کتاب ئے یک کاپی یے کیسّگا ات و دگہ ہچ گون نیست ات ۔
دیمترا گشیت ، وہدے کہ مااو دا سر بوتیں گڑا ہال چہ مزدورا پُر ات ۔ من یک گورے آ پترتاں و نشتاں درائیناں وتی چمّ منا سکّ دات انت ۔ نوں من حیران بوتاں کہ گوں اے مچّی آ چے تران بہ کناں ؟ گڑا ہمے دمانا من وتی شعرانی کتاب کشّ اِت و گوں مزدوراں دیم پہ دیم بوتاں و تران کنانا گشت’’ لہتیں وہدا سر من سپینا بوتگاں و اودا کُشت و کوش ئے وہدا ہر چی کہ من گوں وتی چمّاں دیستگ من وتی نظمانی دروشما نبشتہ کتگ انت نوں شمئے دیما وانانے ‘‘۔
من شعر واناں بوتاں ۔ ساری من انچو سما کتگ ات کہ بس یک و دو نظم واناں و وتی جانا کشّاں بلئے ہمنچو کہ من واناں بوتاں من سما کت کہ دیما نشتگیں مزدورانی چمّاں رژنے بلان بوت ۔ گڈّی آ یک مردے کہ گونی یے سرینا بستگ اتے پاد اَتک و اوشتات و گشتے’’ من چہ درسانی نیمگا تئی منّتا گراں و من ہمے گشاں کہ مرچیگا ساری یک چیزے آ ہم مارا اینچو متاثر نہ کتگ چینچو کہ ما چہ تئی شاعری آ متاثر بوتگیں‘‘۔
یکیں دمانا درائیں ہال ئے تہا ہڑوسکگ ئے توار شنگ اِت ۔
چہ پابلو نرودا ئے اے حبراں ہمے پدّر بیت کہ شاعری یک انچیں ازبابے کہ عوام ئے اندرا شعور و آگاہی پیدا کنگ ئے حاترا جوانیں رنگے آ چریشی آ کار گرگ بیت ۔ بلئے پہ اشی آ الّم اِنت کہ شاعرہم ہمنچو دانا بہ بیت کہ آمردمانی جیڑہاں سرپد بوت بہ کنت و آہانی حاترا گیشواری ئے راہ ہم در بہ گیجیت و شاعرئے اندرا ہمنچو توکل بہ بیت کہ راستا را راست گشت بہ کنت ۔ پہ درور یک راجی سروکے شپ روچ تقریر کنت بلئے آنہی ئے حبراں اینچو اثرنہ بیت چیا کہ لس مردم ، بزگر و شپانک آنہی ئے حبراں آپیما سرپد نہ بنت کجام رنگا کہ سروک سرپد کنگ لوٹیت۔ دومی حبر ایش کہ ہما پیغام ہر ہندا سر بوت نہ کنت بلئے وہدے یک شاعرے گشیت :

کوشا منی باڑائے تہ مہر ئے واہگاں پاہو بدئے
بیگواہی آ زہرے بہ کن رژنا منیگا ایرجیگ
اے ہما پیغام انت کہ اشی آ ہر مردم سرپد بیت و اے پیغام ئے زور چہ یک راجی سروکے ئے گشتانکا گیش بیت ۔ہمے حاترا شاعر ہر راج ئے تہا جوانیں بستارے داریت ۔
ہمے پیم بلوچستانا ہم بازیں لال و گوہر است انت کہ گوں وتی فکر و لیکہاں مہلونکا سرپدی دےئگ ئے جہدا دز گلائیش انت ۔ چہ ہمیشاں یکے ممتاز یوسف انت کہ ہستیں عہد ئے نامداریں بلوچ شاعرانی تہا شمار بیت ۔
اے حبر تچک انت کہ ممتاز یوسف راجی شاعرے نہ انت و نہ کہ آنہی ئے شعرانی اندرا فکری بالیدگی ہمینچو زیادہ انت کہ مہلونک ئے رہشونی آ بہ کنت بلئے پدا ہم ممتاز جوانیں شاعرے ۔ چو کہ نرودا گشیت ’’ اگاں یک شاعرے تہنا راستی آ نبشتہ بہ کنت ہم جوانیں شاعرے بوت نہ کنت و اگاں کسے تہنا حیالی ماڑی بہ بندیت ہم جوان نہ انت ہمے حاترا شاعرا پہ الّم اِنت کہ دوئینانی نیاما توازن پیدا بہ کنت‘‘ ۔
ممتاز یوسف ئے شعرانی اوّلی دپتر ،، بے نام ،، ئے ناما 2018ء آ چہ بلوچی اکیڈمی کوئٹہ ئے نیمگا شاپ و شنگ بوتگ۔ کتاب ندر اِنت ’’ بے نامانی ‘‘ ناما ۔ اے کتابا 71 شعر ہوار انت کہ کلی کتاب ئے 154 ئیں تاکدیماں سمبھ اِتگ انت ۔
کتاب ئے اوّلی شعرا چہ درا بیت کہ اے کتاب ئے تہا ممتاز چے گشگ ئے جہد کتگ یا ممتاز ئے شعری بالاد چنکس برز اِنت ۔

کنٹگانی شہرا پُلّ ئے لوگ بستگ مردماں
گوں غماں جان ئے وتی ہر بوگ بستگ مردماں
چرے دوئیں بنداں ہمے درا بیت شاعر چہ چاگردی راہ و رہبنداں چٹ باغی انت ۔ ہمے حاترا آ کنٹگانی شہرا ہم پلّ ئے ماڑی ئے واب گندگا ا نت و آنہی ئے واہگ ہمیش انت کہ آوت یک انچیں چاگردے اڈ بہ کنت کہ ہودا اے واب آسر بہ بنت ۔ چو کہ کتاب ئے پیش گا ل ئے تہا ڈاکٹر فضل خالق نبشتہ کنت ۔
’’تخلیق کار ہما سنگتراش انت کہ چہ ’’ ہچ آ ‘‘ ’’چی یے ‘‘ در کنت‘‘ ۔
ممتاز ہم بازیں ہچاں چہ انچیں شعر تخلیق کتگ انت کہ آنہی جندئے مارشتانی و چاگردئے عکاسی آ کن انت ۔ بلئے ممتاز ا وت ہم سما نہ انت کہ آنہی ئے حیالانی اندرا شعری بت چون جوڑ بوہان انت ۔

دل منا ہر روچ پرسیتیں بلئے گنگ انت زبان
آکجام درد اِنت کہ ممتاز من اوں شاعر بوتگاں
بلئے دیمترا وتی ہمے جست ئے پسّوا دگہ دستونکے ئے توکا چو دنت :
عشق چے ذاتے نہ زاناں مہر چونیں حاکمے
آدمی ذات ئے ہمک بندا وتی پابند کنت
چرے حبراں ہمے درا بیت کہ اے عشق ئے آس انت کہ ممتاز شاعر بوتگ ۔ اے حبر ہم منّگی انت کہ شاعری ئے بن ھشت مہر اِنت ۔ ہمے حبرا پیش گال ئے تہا واجہ اللہ بحش بزدار جوانیں رنگے آ بیا ن کنت ،
’’ محبت شاعری ئے بنیادیں ۔ واب ، فلسفہ ، علم شاعری ئے دلیلیں‘‘ ۔
ممتاز ئے شاعری ئے بن ھشت ہم مہر اِنت بلئے اے مہر باز زوراور اِنت ۔ چو کہ ممتاز پہ ہمیشی ئے باور کنائینگا ایوکی آ گوں وتی دوستدارا دیم پہ دیم بیت :
تئی در ئے دیمامنی سجدگ نہ بنت ہچبر قضا
کئے ترا گشتگ نہ زاناں کہ من کافر بوتگاں
ودار یک انچیں شیرکنیں مارشتے کہ بازیں وہداں مردم نہ لوٹیت کہ اے وہد آسر بہ بیت چیاکہ ہمے آس ئے سچگ باز رندا مردما وش نہ بیت بلئے ممتاز ئے واہگ ہمیش اِنت کہ اے وہد زوت آسر بہ بیت ۔

جی پما روچاں کہ ہنّی پاد گوں دستاں سنگہیں
کئیت در و دروازگاں جوریں دلانی بند کنت
یا
کدی کائے منی کلّ آ حیال ئے دلبریں بانور
دل ئے آزمانا مان شانتگ زہیرانی تئی تامور
بلئے برے برے کہ آ شزار بیت و گیشیں وداراں آسر نہ بیت گڑا پہ ناکامیں دلے گشیت :۔

مارا دردئے زہا چہ گوزگ وش بیت
ارس ئے تنگگ ، غم ئے ایربرگ وش بیت
گشنت کہ ہر مجنون دومی ئے درور اِنت ۔ ہمے پیم شاعر ہم وہدے ماریت کہ من یک انچیں جاہے آ سراں کہ چہ من پیش ہم کسے ادا بوتگ گڑا آ ہما کارستانی رندگیری آ درکپیت ۔ چمداں آنہی ئے چارگ و مارگ ئے راہ و رہبند ہم بدل بنت ۔ ممتاز ہم وہدے سسی و پنّوں ئے عشقیہ داستان ئے تہا وتی کارستاں شوہاز کنت تہ آنہیاسندھ و بلوچستان ئے تہذیبی ہمگرنچی ئے درائیں آثار گندگا کا انت ۔ آ وتا یک انچیں وہدے آ سما کنت کہ اودا سندھ و بلوچستان ئے تہذیبی رشتہ باز محکم انت ۔ دومی دیما کہ آ چکّ جنت تہ کیچ ئے چنال ہم مکّ اِنت ۔ اے وت یک مزنیں راجدپتری چیدگے ۔ گشنت کیچ ئے چنال وہدے برجاہ بوتگ گڑا آزمانگا کیچ امن و وشی ئے بنجل بوتگ ۔ یک دری مہمانے آ ہمے چنال آ زہمے ٹنگ اِتگ پدا دراجیں مدّتے آ پد اتکگ تہ انگت آ زہمداں لونجان انت ۔ بلئے ممتاز کہ ہمے تہذیبی زوالا بلوچستانا گندیت ہمے آنہیا سندھا ہم گندگ کئیت ۔ آ وتی حیالاں یک تلمیحے ئے دروشما چو درشانیت:
من وہدے کہ وتی کیچ ئے چنال آ لڈّگا گنداں
مناتویات کائے بے کساسا دلبریں بمبور
ہمے بدلی آ کہ ممتاز تہذیبی زوالے سرپد بیت آ وت ہم چہ ہمیشی آ متاثر گندگ کئیت ۔ چیاکہ آنہی ئے جندئے لیکہانی تہا بازیں کشّ و چیلّے ودی بوتگ۔ یک گورے آ پہ پہر سسّی ئے ناما گیپت بلئے دومی دیما وتی زمانگ ئے زالبول ئے درگتا آنہی ئے لیکہ جوان نہ انت ۔ آ زالبولاں اے درگتا ملامت کنت کہ آ پہ کسانیں واہشتے آ وتی جندا ببا دےئنت بلئے اے حبرا شمشکار نت کہ ہما زالبول پہ وتی بدن ئے بہا کنگا چنچو مجبور اِنت وآنہی ئے ذمہ دار چاگر د اِنت دومی حبر کہ ہما جیگ ئے شنگینوک ہم مرد اِنت ۔ ممتاز ئے اے حیالا آنہی ئے نظم’’ جنین زہگے ئے ناما ‘‘ ئے تہا سیل کن اِت۔
پہ گداری لذّتے و پہ گبرّے تاں کدی
گوں نابکاریں دست و پاد ،
چمّ و نظر
شنگ بیتیں جیگ دوچانی تئی
تاں کدی پہ مجّتی مہر ئے زہیرا
دل بہ بیت سجّیگ حسدیگانی آس و انگراں
تاں کدی ساہیل کنتیں
شرّ و شرِ نیک و بداں
زرنبشتیں شار و بیکانی نگورتیں نود تئی
تاں کدی شنگیت بگش

ممتاز ئے لیکہانی اندرا ہمے تضاد است انت بلئے آ وت ہم اے حبرا منّیت :
منی او موجریں نیمون وتا بہ کن پدّر
ترا من اشکتہ مردم مروچاں شرّ نہ گشاں
یک ازمکارے ہما وہدا وتی ازمی بالادا برز داشت کنت کہ آ روایتی رنگاں چہ سر بہ گوزیت وحقیقت ئے منّوگر بہ بیت ۔مثال:
کئے آ گشتگ کہ شئے و حانی آرا
وتی دست ئے لکیراں آس داتگ
اے تلمیح ئے تہا چاگردئے ہما راہ و رہبند کہ چہ سداں سالاں است انت آہانا رد کنگا انت ۔ آچہ قسمت ئے وجودا انکار کنگا انت و ہمے جوانیں تخلیق ئے نیمگا اوّلی گام انت ۔ بلئے اے گاما ہما وہدے یک تخلیق کارے چست کت کنت کہ آفطری آزادی ئے منّوگر بہ بیت ۔ چوناہا ہر بنی آدم ئے اندرا فطری آزادی ئے لیکہ موجود نت کجام وہدے انسان بہ ماریت کہ آ پہ دل بندیگ انت آ وتی شہازاسر و پاد جنگا لگّیت ۔ بلئے پہ اشی آ الّم انت کہ ہما مارشت ئے جند ودی بہ بیت ۔ ممتاز ا آنہی اندر ئے مردم وار وار پا د کنت ، ہمے مارشتا جمبینت ۔
منی حیال ئے کہیر ئے شانتل
منارا دائم
سکین دنتیں
وتی تو جندئے شہازا درکپ
پہ زندئے بچکندئے رازا درکپ
درد یک انچیں مارشتے کہ ابید اشی آ ہچ کس انسانے شمار کنگ نہ بیت ۔ ہمے مارشت زندگیں مردمانی پجّار اِنت چو کہ واجہ مبارک قاضی گشیت :
نہ زندگاں ہوار کپیت نہ مردگاں شمارا کئیت
دلے کہ درد مہ داریت کجام کارا کئیت
ممتاز ہم ہمے درد ئے واہگدار اِنت :
گیش بہ کنت دوست ئے دوری ئے زہیراں
دل پما درد و منّتاں نالیت
بلئے ہردیں دلے کہ پُر درد بہ بیت گڑ ا آ ہر تکا حسّاس بیت و لس مردم ئے حسّاسی وہدئے حاکمانی مرگ اِنت ۔ ہما چاگردی دکاندار کہ آہانی لاپ تا ہما وہدی سیر اِنت کہ غریب و بزگر نازانت اِنت بلئے ہردیں ہمے بزگر سرپدی ئے قندیلا بالیت گڑا زوراکانی ماڑی سچنت و آہانی زور گپتگیں قلات ایر جیگ بنت ۔ انچوش کہ ممتاز ہم پہ دلجمی گشیت :۔
مہرئے بالینتیں چراگ من شئے مرید ی کڈّکا
چاکر ئے ماڑی آمان شانیت تہاری دلجماں
یا
من دلا جزماں چنالے سمبہیت
کیچ ئے ویرانیں ڈگار ئے دامنا

اگاں یک تخلیق کارے وتی مہلونک ئے غما مہ بیت گڑا آ ہجبر سوب مندیں تخلیق کارے بوت نہ کنت بلئے ممتاز ہما ازمکار انت کہ چہ وتی مہلونک ئے غم و جنجالاں سرپد انت و چہ ترس و بیمّا بالا تر آہانی درشانگا ہم مامانگ نہ بیت ۔ آنہی ئے چمّ وہدے وتی ہلک ئے دمکاں کپنت تہ چوداں روچے جوانے بیگواہ کنگ بیت ۔ آنہی ئے دل دوتّ کنت چیا کہ اے لس مردم نہ انت کہ آوار جنگ بنت بلکیں ہما مردم انت کہ چہ وتا سرگوستگ انت و پہ وتی آؤکیں پدریچاں یک انچیں کشکے ئے رندگ ئے جہدا دزگلائیش انت کہ آجوئیں و آسودگیں زندے گوازینت بہ کن انت ۔ بلئے ہمے ورنا بیگواہ بنت ،
منا اے عہد ئے
مسافرانی
سلام گون انت
کہ قرن و باریگ
دور و وہدان آ
موسمانا
مان ترّینتگ اِش پہ وزمے
پاد شپادی مں رنگراہاں
رندگا انت کلشانے
پہ گلزمینا
ممتاز ئے شاعری ئے دگہ یک زیبائی یے آنہی ئے راجدپتری پہنات اِنت ۔ پہ درور حملّ جےئند ئے شعرکہ :
شانزدہ و شمبے آ سر مہ شود براتانی گوہار
شمبے پہ براتا وش نہ اِنت شانزدہ پہ پتا
شمبے ہما نکس اِنت کہ حمّل آ شاگے نول کتگ
حمّل ماں شاگا و شاگ پما نیلبومیں زرا
اے یک بلوچی شرکے کہ شمبے و ماہا کہ شانزدہ بیت زالبول ئے سر و جان شودگ شرّ نہ انت ۔ ہمے لیکہ ممتاز ا چو نزّارتگ ،
شمبہ و شانزدہ مہ سینگاریت وتا راج ئے جنک
حمّل آ دزگیر کننت بلکیں زر ئے چمّ ئے فرنگ
پہ جوانیں تخلیقاالّم اِنت کہ تخلیق کار سنجیدہ بہ بیت و وتی ازم ئے دیمروی و زیبائی ئے حاترا شپ و روچاں یک بہ کنت ۔ ممتاز یک جوانیں شاعرے بلئے اگاں انگت آ گیش سنجیدہ بہ بیت آ جوان تریں تخلیق کارے بوت کنت ۔
بگندئے نور بوت دنیا
من کوراسا بہ ستکیناں
اگاں ممتاز کوراسی آ سچگ ئے ہنرا ہیل بہ کنت آ وتی زمانگا شاعری ئے یک مزنیں چیدگے بوت کنت ۔ چیا کہ شاعری ابرم ئے زیباہی ئے توسیپ ، چاگردی جیڑہانی عکس کاری و اندریں مارشتانی درانگازئے وسیلہ انت ۔

Check Also

کارل مارکس، زندگی اور افکار ۔۔۔ عابدہ رحمن

مصنف: ہنرخ والکوف ترجمہ: ڈاکٹر شاہ محمد مری صفحا ت: 224 قیمت : 350 روپے ...

Leave a Reply

Your email address will not be published. Required fields are marked *