زوراخ بزدار

وفائے ڈیوا مر مرغیں
درشک مہرانی کومنڑغیں
بیا کھں نوخیں عہذ کھولے
تند پھشی غیں سندڑغیں۔
تئی دیرہاں گو چکر عذاواں
دل ملوریں گو کھیوتانیں۔
تئی زہیراں مئیں جاں زہیریں۔
زہر جوریں اے زیند پھرماں۔
سر کناں مہ کئیا اے ڈکھاں۔
دانہہ زیرے پکو مں گنداں۔
ساہ سر ہڑدو جوکھواں نوں
توروے مں کئیاشہ پنڈاں۔
ارتؤ کہ کائیے تہ زیند نو بی
زیند نو بی مراذ نو بنت
ازار پھڑ جنت عذاو پھڑ جنت۔
سروذ ساہانی ساز نو بنت
شہ کیل تولاں گران باریں۔
زیند موکھیں تئی کندغانی
چوتؤکہ مئیں بئے تہ زیند مئیں بی
زیند مئیں بی تہ وخت ودھی
وخت ودھی تہ چیترے کھیث
چیترے کھیث ھور گوارنت
ھور گوارنت زیند موری
زیند موری گو پُھل بہاراں
ڈا وخت مئے بیث دور مئے بی
ما زیند مانڑوں ما زیند گندوں
چو تؤ کہ مئیں بئے جہان مئیں غیں
روش ماہ آزمان مئیں غوں
چوتھؤ کہ مئیں بئے جہان مئیں غیں