Find the latest bookmaker offers available across all uk gambling sites www.bets.zone Read the reviews and compare sites to quickly discover the perfect account for you.
Home » پوھوزانت » شاہ عبدالطیف بھٹائی ۔۔۔ سَیدمظہرجمیل/ رحیم بخش مہر

شاہ عبدالطیف بھٹائی ۔۔۔ سَیدمظہرجمیل/ رحیم بخش مہر

ڈاکٹر سورلے آ وتی نامی ایں پٹ و پولی مقالہ آ سندھ ئے سیاسی ، معاشی و اخلاقی جاورھال ئے وانشت گوں ہورت نگاہی آ ریس و پریسی دروشما کنانا گوشتگ ات کہ آوہداں سندھ چہ ہندوستانا سستگ ات، اوشت آماچیں چاگردے ئے تہا بدل بوتگ ات۔ جتائیں ڈلانی چاگردی جاور اوں اوشت ئے آماچ اتنت، تہی جنگ، لُٹّ و پل و حاکمانی عیاشیا لس مہلوکا را بدحال کرتگ ات وآہاں یک انچیں د ردوار وساٹوکے ئے لوٹ ات کہ آہانی غماں سُبک بکنت و آہانی پرشتگیں ستک و ہاٹیگا محکم کنگاپہ کمکار بہ بیت، او آنہانی اے لوٹ سندھئے صوفی، درویش او جوگی آں پیلہ کرت ات۔ چہ ہمے مردماں درستاں محکمیں سپا ہ عبدالطیف بھٹائی ئیگ ات۔وہدے نادرشاہادہلی سرا اُرش کرتہ او سندھ وتی باجگزار جوڑکرتہ تہ شاہ عبدالطیفازندئے پنجاہ بہا ردیستگ ات او وہدے احمدشاہ ابدالی آ بیڑ برت تہ آنہی عمر پنجاہ و ہشت سال اَت۔ شاہ عنایت ئے کوش آنہی نوک ورنائی ئے قصہ ات پمیشکہ شاہ عنایت ئے جنزو کوش ئے اثر آنہی شاعریا بے کساس گندگ کاینت۔
اے سیاسی پرشت وپروش، چاگردی، معاشی بدحالی او اخلاقی پستی شاہ صاحبانہ تہنا چہ نزیکادیستگ ات بلکیں وت ہمے سیمسراں گوستگ ات۔ مردمانی ڈکھ درداشریدارت۔ پمیشکہ وتی اخلاق، مرد م دوستی، وش گفتاری،نرمیں تب، سادگی، عاجزی و مذہبی رواداری سوباآبے کچوآ مذہب و عقیدہ ئے رہدربرے جوڑبوتگ ات۔ وہدئے ہمرائیاآنہی شعرانی سحرکاریااشکنوکانی چاگرد پراہ بوہان بوت اومردم مزنیں کچے آآئی مرید جوڑ بوہان بوتنت۔ شاہاوتارا کدی ہم دردباری درویشے وڑا زاہرنہ کثہ بلکیں آگوں مردماں آزات وبروبری ئے بنیادا پیش اتک۔آہانی ڈکھ درداش کم کت انت اووتی وساآہاناں جوانیں پنت و سکینے دات ات۔ آ دائمی یکجاہ نندوکیں مردمے نہ اَت بلکیں وہد وہدئے سرا کش و گورئے ہندو جاہاں روّا کرتگ ات۔ شاہ صاحب ئے شرپ و نامداری کلہوڑہ حاکماں پہ بے چاڑی ئے سوب جوڑبوتگ ات پمیشکہ درباری مجلساں آنہیادلپروشی و ڈکھ دئیگا پہ وڑ وڑیں ھیلہ و ہنرسازات۔
اے گپاّشاہ وت ہم سرپد ات کہ آنہی روحانی زانشت و شعراں پہ آجوئیں چاگردے لوٹ انت، پمیشکہ آنہیامبارک بھٹ کہ یک ویرانیں ہندے اَت، وتی چیزے مریدانی ہمرائیایک نوکیں ہنکین یے جوڑکنگ بنا کرت کہ بھٹ شاہ ئے ناما نامدار بوت۔
چوش کہ گشگ بیتگ شاہئے زمانگ سیاسی پرشت وپروشہ دورات،او وہدئے حاکماں چُنیں ہم مردمے چوش تاگتور بیگاپہ وت بدیں گپّے زانتگ ات۔ پمیشکہ شاہ لطیفااچ وتی عہدئے سیاست کہ گیشتر پہ حاکمانی وشنودیا ا ت وتی دامن پہریز ات او زمانگ ئے زرمبشتاں ہم ہچ وڑیں بہرنہ زُرت۔ پرچیکہ آنہی نزّاچہ درستاں مستریں راستی اُلس، وچہ درستاں مستریں زرمبشت آہانی ڈکھ ،دردئے ہلاسیا پہ جہداَت۔پمیشکہ آنہیاوتی ہمے واہشہ سراہمک چیز ببادات۔
شاہ لطیفہ شاعری ازمی کتہ کاریانی سرا چمشانک دیانا آغا سلیما نبشتگ کہ ’’شاہ عبدالطیف بھٹائی یک انچیں سپاہ یے ات کہ شمانہی آئی پیدا بوہگا سندھ یک نوکیں لبزانکی، دود ربیدگی دورے تہا پُترت۔ اے نوکیں دورا ما شاہ لطیف ئے دور گشت کنیں۔شاہ لطیفا سندھئے دودربیدگ، سندھئے ڈکھ درد،نادزرسی، واب و اوستاناں وتی اندرا جاہ دات او وتی شاعری ئے کینوساسرجمیں سندھارا اچ نوکیں ساچشتی دروشمادیما آؤرت۔ مروچیگیں سندھ شاہ لطیف ئے ساچتگیں سندھ انت او ہمک سندھی ئے تبا شاہ سائیںئے شاعری ئے تب و مئیل ئے دروشم گندگ کیت۔
میرعبدالحسین سانگی ئے نزارتگیں کتاب’’ لطیف لطیفی‘‘ او مرزا قلیچ بیگ ئے ’’احوال لطیف بھٹائی‘‘ او آفاق صدیقی ئے ’’عکسِ لطیف‘‘ ئے تہا داتگیں سرپدی ردا شاہ لطیف براہ دارو زیبائیں مردے ات۔ بُرزیں بالاد، پُرّیں دیم، گردو زنڈیں پونز، مزنیں او سیاہیں چمّ، بروان بزو سیاہ اتنت، ریش سیاہ و بز، گُڈّی سندا مُودو ریش سپیت بوتگ اتنت۔ بالادے پُرات بلے روگاگشاد اَت۔ پوشاک انچو سادگ اتنت کہ مدام سُہررنگیں شالے آ گوں وتی بالاد سترکرتگ ات۔ماں سرا صوفیانہ دابئے سپیتیں دراجیں کلاہ و آنہی سرا سیاھیں چادرے، ماں دستامیانی عصا او تزبیح۔چوش وَ شاہ کم حبرے ات، بلے مردمانی گپّ گوں دلگوشیا اش کتگ اتنت۔ ورگ چرگا زندئے توامیں گرودارادرویشی پہریزی او بے پروائی اَت۔ آتب ئے ردا سگّوک، رحمدل، خداترس،او انساند وستیں مردمے ات۔ گشگ بیت کہ آنہیاکدی ہم پہ کسے آ بددعا نہ کرت۔
راگ رنگ و زیملاگوں مزن عشق ات۔ جوگی او اُلسی زیمل کاراں گوں نیادآئرا دوست بوتگ ات۔ ہمے سوب انت کہ آنہی شاعریازیمل ئے سُراجبیں سحرکاری ودی کن انت۔ آنہی نزّامذہبئے بُنیاتامردمانی میانا ہچ وڑیں بہرو بانگ جائز نہ ات پمیشکہ آنہی چاگردو ستک داروکانی میاناہمک مذہبئے مردم ہوارتنت۔ چہ ورنائیا آئرا مردماں چاگرد کرتگ ات کہ وہدئے ہمراہیاایشی تہا گیشی آیان بوت۔ آنہی ستک داروکانی عقیدتاآئرا سحرکاریں سپاھے جوڑکرتگ ات بازیں کرامات و معجزہ گوں آنہیاہمگرنچ کنگ بوتگ انت۔شاہ ئے وڑیں اُلسی نامداری ئے دگہ درور گندگ نہ بیت۔آمردم کہ شاہئے شاعری ئے نازرکی،لبزیات، شبین و زانشتی بن گپّاناں سرپدی واک اش نیست انت، اچ شاہئے شعرانی زیملیتا مستی و ہنوشی ئے آماچ بنت، لس لوگاں ہم ’’شاہ جو رسالو‘‘آ یک بابرکتیں کتابے وڑاگوں عقیدت ایرکننت او ایشی تہا ہچ رنگیں مذہبی منوگری ئے ’’اعتقاد‘‘ نہ بیت۔
شاہاوتی زندا ہرچ وڑیں زاہرپسندیا را شرنہ لیکہت او وتی بابتا حدا گیش بوتگیں عقیدہئے درانگازا چے وتی نادوستی پدّرکرت بلکیں مدام عاجزی او درویشیا گوں زند کرت۔ آنہیاوتی شعر ہم کدی یکجاہ نکرتنت۔او نیکہ چہ کسے نبشتہ کنائینت انت بلکیں آنہی مُریداں آنہی شعر وتی سینگاں سامبتگ اتنت۔ گوشگ بیت کہ عمرئے گُڈّی بہرا یک روچے آنہی حاصیں مرید ہاشم او تارا آنہی جم کرتگیں شعر نزآؤرتنت او’’شاہ جو رسالو‘‘ ئے صورتاپیش کرتنت گڑا شاہ صاحب کہ آوہدا کرار(Kirar)’’کمب ‘‘ئے لمبانشتی اَت۔ آنہیا رسالہ ایدیم آدیم کرت چارت و گشت کہ اے شعرو شاعری تہنا دنیائی و مادی آسودگیا پہ بیت۔ نوں ایشی لوٹ پش نہ کپتگ چوش گوشگاگوں توامیں نزّارتگیں دیوان آپئے میارکرت۔ بلے پدا مریدانی منّت و زاریا آہانااے گپّ ئے جازت دات کہ اگں شما دوارمنی شعراں یکجا کنئے تہ منا ہچ باکے نیست۔ پمیشکہ استیں رسالہ اصلا رندا یکجاہ کرتگین انت۔
واجہ آفاق صدیقی ئے کتاب عکسِ لطیف ئے داتگیں سرپدی ئے ردا شاہئے بازیں کلمی سیاہگ یکجاہ کنگ بوتگ انت اوثمرفقیراشاہئے ستک داروکانی سینگاں سامبتگیں شعراناں گوں مزن ھیالداریا نبشتہ کرتگ کہ ’’گنج‘‘ئے ناما زانگ بنت او بھٹ شاہابابرکتیں یادگارئے بستارا ایرانت۔ ایشیا ابید یک نسخہ یے برٹش میوزیم لندنا ایرنت۔ استیں کلمی سیاہگانی تہا، بھٹ شاہئے نسخہ، بلٹری والا نسخہ، نسخہ خیرمحمد ، نسخہ احمدی، نسخہ ابراہیم شاہ، میرمٹھل نسخہ، جمعو فقیر نسخہ، نسخہ فقیرحسین بخش، نسخہ خیرمحمد، سیددوست علی شاہ نسخہ، نسخہ رمضان جٹ،نسخہ محمد شاہ، نسخہ میرعلی احمد تالپور، نسخہ غلام تقی، نسخہ مولوی ہدایت اللہ ہالائی، نسخہ عبدالحسین سانگی، نسخہ میرنورمحمد خان تالپور،او حاصیں نسخہ امیرعلی شاہ امروٹی او دگہ۔۔۔ گوستگیں صدسالانی تہا شاہ عبدالطیف بھٹائی ئے شاعری بابتا بازیں رسالہ و دیوان آنہی ستک داروکاں ردو بند داتگ انت اچ ہمیشاں شاہئے نامداری اندازگ جت بیت کنت۔بلے پدردیں گپّ ایش انت کہ گیشتریں کلمی سیاہگانی تہا شاہ صاحبئے اصلیں شعرانی ہمراہیابازیں شعراژوتا ماں گیجگ بوتگ او شاہئے شعرانی پہریزوک گیشیں شعراں گیشینگا دزگلائیش انت۔
اے درگتاچہ درستاں اہمیں کار ڈاکٹرگربخشانی او علامہ آئی آئی قاضی آ وتی وتی داباسرجم کتگنت، اے دوئینانی مزن تک و گیچناپد شاہئے شعراں چے گیشیں شعر داں مزنیں ھدّے آ درکُرتگنت۔ بنداتا ڈاکٹرٹرمپ (1866)ئے ردو بند داتگیں ، شاہ جو رسالوئے بیست و شش سُراتنت۔ رندتراقاضی محمد ابراہیما(1868) دَہ سرانی گیشی آگوں ’’کُلیاتِ شاہ‘‘ ردو بنددات۔’’شاہ جو رسالو‘‘آ مدام سی سُر ہوارکنگ بنت۔ڈاکٹر گربخشانی وعلامہ آئی آئی قاضی آ مزن جکنسریا پد گیشیں شعرانا اچ شاہئے شاعریا کش ات او ’’شاہ جو رسالو‘‘ آ بیست و نوسُرہوارکرت او ’’’سرکیڈارو‘‘ کش ات۔ ڈاکٹر گرنجشانی ئے نسخہ چہ درستاں معتبر زانگ بیت۔ شیخ ایازئے رجانکاہم 29سُرہوارانت۔ بلے آغا سلیم ئے رجانکاسی سرہوارانت کہ ایشی تہا سُرکیڈارو ہم ہوارنت۔
شاہئے شعرانی اولی نسخہ ہما اَت کہ انگریز مستشرق و زبانزانت ڈاکٹر ٹرمپ انگریز سرکارئے جوڑکرتگیں ورینکلرکمیٹی ئے سکین ئے پدا سندھئے یہات و کُوچگاں، او تھرئے ہندو دمگاں گول ات او مزن جہداپد یکجاہ کرتگ ات او اے ڈاکٹرٹرمپا1866آ چہ جرمنی آ شنگ کرتگ ات کہ ایشی تہا26سُرہوارکرتگ ات۔
ڈاکٹرٹرمپ ئے رسالہ نَے سرجم ات و نیکہ چہ ردیاں پہک اَت۔اشیا ابید ٹرمپاشاہئے شعرانا سندھی املا کمیٹی ئے من اتگیں املائے بدلا یک انچیں رھبندے آ ردو بند داتگ ات کہ سندھی زبانئے حاصیں توارانی اداکنگ ئے سکتے نداشتگ ات او کوہنیں سندھی عربی نبشتہ رھبندئے بنیاتہ سرا ات بلے ڈاکٹرٹرمپ ئے شنگ کرتگیں رسالہ ئے اے ارزشت کم انت کہ آنہیاشاہ لطیف ئے شعرنہ تہنا سندھا بلکیں اچ سندھاڈنّ ئے دنیاآ ھم پجّارائیتگنت بلکیں روایرشتی دنیائے لبزانکا آنہی نام ئے پجّارکنائینت و پمیشکہ نامی ایں زانتکارو لبزانکار کارساں دستاسیا1870آ بگرتاں1873آ وتی نبشتانک آنی تہا شاہ عبدالطیف بھٹائی شاعری او ڈاکٹرٹرمپئے ذکرحاصیں وڑے آکرتگ۔
1867آ ڈاکٹرقاضی محمد ابراہیم ئے ردو بند داتگیں دیوان’’شاہ جو رسالو‘‘ اچ لیتھوپرنٹا شنگ بوت بلے ایش ہم معیاری زانگ نہ بوت۔ ایشیا پد تاراچند شوقی رام، مرزاقلیچ بیگ، محمد ابراہیم نصرپوری، ڈاکٹرایم ایچ گربخشائی، غلام محمد شاہوانڑیں، محمد عثمان ڈیپلائی، محمد صدیق میمن، غلام مصطفی قاسمی، کلیانی آڈوانی او ایندگرانی ردو بند داتگیں نسخہ یک یکا شنگ کنگ بوتنت او علامہ آئی آئی قاضی، عثمان علی انصاری، ایلسا قاضی آ گچین شعرانا ماں انگریزیا رجانک کرت او “A Risala of Abdul Latif Bhatai” ئے ناما چہ حیدرآبادا شنگ کرت۔بلے چریشیا باز پیسر اے اہمیں کار ایچ ٹی سورلے کرتگ ات او شاہ لطیف ئے شعر میان اُستمانی لبزانکا پیش کرتگ انت۔ ڈاکٹرایچ ٹی سورلے کتابShah Abdull latif of bhit پہ اے حاترا سرجمیں کارے کہ ایشی تہا تہنا شاہ عبدالطیف ئے شعرانی رجانک، گیشوارو نگد کرتگ بلکیں ایچ ٹی سورلے آگوں مزن ہورت چاریاشاہئے زمانگ ئے سیاسی، چاگردی، معاشی واخلاقی پُژدر گوں سرجمیادیماآؤرتگ۔ ایچ ٹی سورلے آ لوٹانی پدا شاہ ئے شعرو ایشانی شرّی او جوانیا سرا زانشتی بحث وتران کرتگ کہ شاہا نہ تہنا سندھی زبانابلکیں رودرآتکی زبانانی لٹریچرئے تہا ہم یکتائیں ہندومقامے بخشیت۔
1961 آ شاہئے شعرانی اُردو منظوم رجانک سندھی زبان ئے نامداریں شاعر شیخ ایازاو آفاق صدیقی آ’’رسالہِ شاہ عبدالطیف‘‘ئے ناما سرجم کرت۔ استیں ٹرانسلیشن ڈاکٹرگرنجشانی ئے ردووبند اتگیں ’’رسالو‘‘ ئیگ ات وہدے کہ گُڈی چیزے چپٹرڈاکٹرنبی بخش بلوچا سرجم کرتگ اتنت۔ شیخ ایازئے استیں رجانک تچکی آ لطیف ئے شعران چے کنگ نہ بوتگ بلکیں اُردو ٹرانسلیشنا را شاہ لطیف ئے شعران چے گیش نزیک کنگ ئے حاترا ٹرانسلیٹرانا شاہ ئے شعرانی اُردو نثری لبزی ٹرانسلیشن دئیگ بوتگ ات کہ اورنٹیل کالج ئے پرنسپل مخدوم امیراحمدئے واہش ئے آسرات کہ شیخ ایازا اچ آفاق صدیقی کمکا منظوم کرتگ ات بلے پدریں گپّ انت کہ شیخ ایاز وت سندھی سکالرے ات او شاہئے شعرانی عاشقے ات ہم پمیشکہ اے کیاس کنگ راست نہ بیت کہ آنہیا’’شاہ جو رسالو‘‘ ئے اُردو ٹرانسلیشن کنگ ئے وہدا تہنا دست کپتگیں اُردو نثر دیما کرتگ۔شیخ ایازو آفاق صدیقی ئے ٹرانسلیشن ئے تہا یک وڑیں بے ساختگی وکیفے مارشت بیت انت۔ اُردو منظوم ٹرانسلیشنے سرا دوارچاری کارحفیظ ہوشیارپوری آ کرتگ ات۔ شیخ ایاز وتی منظوم ئے ٹرانسلیشہ پیشگالا نوشتگ کہ ’’بنداتی تجربتانی تہا منا بازیں گپّانی حیالداری کنگ کپت۔ اے گپّانی تہا اہمیں گپّ ایش ات کہ من پہ دل اے لوٹتگ ات کہ منظوم ٹرانسلیشنا تہا شاہ ئے شعرو ’’وائی‘‘ زیملیت و ارواہ ہم است بہ بیت کہ شعرانی گواچنی زیب و بزانت انت۔ ہمے سوبیں کہ من چہ لبزی ٹرانسلیشنا وتارا پہریزات او وتی توامیں ساچشتی جہدوبودشت بزانتی ئے جوانیانی دست آرگا کارگپت انت۔ بوت کنت بازجاہابزانتی جوانی آنی سرامنی شعری حب ئے دزرس شاہئے شعرانی پہنامی آداں سرنہ بوتگ۔ ایشی ذمہ واری یکے وَ وہدئے کمی ا و دومی اُردو شعری لبزانی امبارئے کمی ات۔ اُردو شاعریا گیشتر چیزے لبزانی سروچیری بوتگ ، کدی کدی نہ پجاریں فارسی جوڑشت او گرانیں لبزانی کارمردیا دروگیں چاگردے ودی بیت من اچ اشیا وتا پہریزاتگ۔ پرچیکہ تہنا لبزانی سحرکاری ئے نام تُری ہرچی بہ بیت شاعری بوت نہ کنت۔‘‘
شیخ ایاز ئے استیں گیشوار و پریچ ئے پژدرہ آئی ئے ٹرانسلیشنا زور فارسی و عربی جوڑکرتگیں زبان( مفرس اور مصرب زبان، او اُردوفارسی ئے کلاسیکل شاعری ئے کیف ئے (فضا) جوازتئے اوں سرپدی ریست۔

Check Also

انجیلا ڈے وس(خودنوشت) ۔۔۔۔ ترجمہ:سید سبطِ حسن

اتفاق سے اُنہیں دنوں میری ملاقات کئی کمیونسٹ گھرانوں سے ہوئی اور بٹینا اپٹھیکر جو ...

Leave a Reply

Your email address will not be published. Required fields are marked *