عالم ئے اِسرار ۔۔۔۔۔ اکبر بارکزئی

کوہ باریں بچکندنت؟
گوات باریں گُژنک بنت؟
نود باریں سرپد بنت؟
مور باریں سر شودنت؟
باریں پُل ہم گندنت؟
رَنگ ہم نپس کشّنت؟
روچ باریں تُنّگ بیت؟
ماہ باریں جاں کشّیت؟
آس باریںآپُس بیت؟
آپ واب ہم گِندنت؟
باریں سِنگ وڈوک وڈَل
چُک وپیر و ورنا بَنت؟
باریں مُہرگ و مشتک
وپت وواب ہم زانَنت؟
باریں مُرگ و ماہیگ ہم
شعر و سوت پِر بندنت؟
ہست ہنچیں دیوال ہم
بہہ نَہ اِشکننت کَرّنت؟
باریں مُردگ ہم گندنت؟
باریں مے سراکندنت؟
روچ وشپ زبان دارنت؟
باریں موتک ہم کارنت؟
باریں کوہکر و جمبر
آسمانا ہم گوارَنت؟
باریں درشاک ودار وگُل
سُورو سانگ ہم زاننت؟
کُمب و کور ودریا ہم
درد ودور و غم مارَنت؟
پور و کلکشاں باریں
چمّ وگوش ودل دارَنت؟
باریں زُھرہ و مرّیخ
مہر و دوستی زانَنت ؟
شعر و شاعری زانَنت؟
مے اے گُل زمینا ہم
عاشقی کُتگ باریں؟
دَرد مارِتگ باریں؟
باریں چُنت کس فہمیت
جُہد کنت و سرپد بِیت ؟
عالم ئے اے اسراراں
اکبر ئے اِے گُپتاراں!