Find the latest bookmaker offers available across all uk gambling sites www.bets.zone Read the reviews and compare sites to quickly discover the perfect account for you.
Home » پوھوزانت » کرار نا فکر اٹ اسٹّی ویکجہی نا کلو  ۔۔۔ غمخوارحیات

کرار نا فکر اٹ اسٹّی ویکجہی نا کلو  ۔۔۔ غمخوارحیات

(۔29مئی 2017ء کفایت کرار نا چانڑدہ می سال دے ناردٹ)
یقیناًتینا راج نا وہیل و گڑتی ‘ دڑد وڈکھاتا گواچنی ڈول اٹ تینا نوشت وتخلیق اٹ درشانی اسہ حقیقت پسندو نوشتہ کارہ سے ناگچینا تخلیقی کارکڑد پاننگک ’’داردٹ اگہ نن کفایت کرار ‘‘ نا نوشت و شاعری نا فکری جاچے ہلینِ اونانوشتاتے شِنن تو کرار نا شاعری ٹی ننے تیناراجی وہیلا تا بارواٹ چندی ہندنو کلہو اونا شعرتا دروشم ٹی خواننگ کہ دو بریک ہرافتیٹ اسہ بھاز بھلو معانی وفلسفہ ئس ساڑی اے:
ای داپاننگ ہم خواوہ کہ ہرسال 29مئی نادے کفایت کرار نا سال دے اڈتننگک تو اوڑے بجائے روایتی ہیت وگپان نن کفایت کرار نا فکری کارکڑدے مخلوق نا مونا تالان کین ۔ کفایت کرارے بحیثیتِ ادیب وشاعر ا سینا اونا شاعری نا دروشم ٹی پیش کین انتئے کہ اسہ شاعرو نوشتہ کارا سینا مڈّی اونا نوشت وتخلیق آک مریرہ ۔ اگہ نن کرارے تینا راجا کہ اسہ رول ماڈلاسینا دروشم ٹی چیدہ ئس کرسہ پیش کینہ تو اونا ہمو فکرے مونا اتین ہراکرارے ایلو مخلوقان جتا کیک۔ کرار ناشاعری ٹی ہمو خاصیت ساڑی ارے ایلو نوشتہ کارتے آن اودے جتاؤ جاگہ ئس ترفک ہندن کرارنا شاعری ٹی ہرانظریہ ساڑی اے اوہم بائدے مخلوق نا مونا ہتنگے۔ گرج داعمل نا ئے کہ نن کرارے اونا نوشت وفکر آن مخلوق نا مونا درشان کین و کرار ناشاعری داکڑزک ہم او خواننگے اونا شاعری اے فنی ، فکری ، تنقیدی ، راجی ، ثقافتی ، ادبی ہرپڑہ جاچ کرسہ تالان کننگے داکہ کرار تینا پدریچ خوانندہ کہ تینا نوشت و فکری وڑاٹ اسہ رابلد ا سینا کاریمے ایتے ۔ کرارنا شاعر ی ٹی دا گچینی ارے کہ اونا جندی اشعارتہ گرنگا تے ملنگے تواوفتے آن بازا مُرواردآک چٹ الیرہ ۔ اوناشاعری ٹی علامت نگاری ہم جوانو وڑہ سے ٹی ساڑی اے ہرا کرارنا فکرو خیالے شعریت نا قالب اٹ سوگؤ و سوبر کیک :
ہندن کرار نا شاعری ٹی جوزہ تون اوار شعوری ڈول اٹ ہنداخس گچینو کلہو ساڑی و ہرافک ننے اجتماعیت و آفاقیت نا پارہ غا دیرہ ۔ کرارنا شاعری ٹی مظلوم ومحکوما راجا تا ترجمانی خننگک و اونا نوشت لسانی تفریق و منافرتان پاکے دا صافنگا ثبوت دادے کہ کرار نا لمہ ئی بولی بلوچی اے ولے اوتینا مہراتا درشانی اے براہوئی شاعری ٹی ہم کرینے و براہوئی ٹی ہم ہندنو شاعری ئس کرینے ہرا اسلوب نا مٹ داسکان براہوئی شاعری ٹی پین کس تون اف اوپین ہیتہ سے کہ کرارآن گڈ بھاز شاعرک کرارنا طرزِ نوشت/اسلوبے کاپی کرینو :
نن اگہ کرارنا نوشت وتخلیق نا خوڑتی ٹی جاچے ہلین تواوتینا بلوچی و براہوئی شاعری اے باقاعدہ و منصوبہ بندی سے تہٹی اِرا بشخ اٹ ونڈ کرینے ۔ اونا براہوئی شاعری ہراکہ ’’بالاد‘‘ پنی آ کتاب اٹ شینک مروکے۔ داشاعری ٹی اوتینا مہرو مابت تون مخاطبے ’’بالاد‘‘ اٹ ساڑی براہوئی شاعری ٹی گیشتری مہرومابت Romantic نا سرھالٹے۔ کرارنا دانوشتہ تیٹ تینا مہروان نا صفت وثتاء، اوڑتون مہر اٹ گلہ و غاواک ، ہجرئنا پُرزرابادڑداتا زکر ، جتائی نا دڑدیاکیفیت نا بیان ، بے مہرا جہاناطنزو مسخرہ ، تینا بیوسی تے آ خڑینک خلنگ و ٹکرا ارمان تہ مُچ کننگ وٹپ شُرینگ نا ہیت آکو:
وختس کہ کفایت کرار نا بلوچی شاعری ہراکہ ’’ذلمے جمر‘‘ نا پن اٹ کتابی وڑاٹ راسکوہ ادبی دیوان نا پارہ غان شینک مسونے ۔ اونا بلوچی شاعری مہرومابت تون اواراوارزیات تر راجی سرھال تے آ شعرک دوربریرہ ۔ کفایت نا بلوچی شاعری ٹی ننا راجا تون مروکا استحصالی ،زوراکی وحق خوری، استعماری زوراکا تا مزاحمت ‘راجے اِرا طبقہ ٹے ونڈ کروکاتا مزاحمت تینا قومی ہیروتا صفت و ثناء و نناراج اٹ تالانا ہمو گندانگا رویہ غاتا مزاحمتے چندی نوشتاتیٹ کننگانے ہرارویہ غاک ننے راجی پڑہ نسخانی کرینو:
دُنکہ اسہ رویہ ئس نا اتفاقی ، تارپہ تاری ، اسٹ ایلوتون تین پہ تینی نا جنگ و جیڑہ، کشت وخوناک ننا بلوچ راج نا بھاز بھلو وہیل ءَ سے وداوہیل نناراجے سماجی ، قومی ، سیاسی ، نفسیاتی ، قبائلی ، ادبی ، لسانی ، معاشی ، ثقافتی ہر ڈول اٹ بے انتہاء نسخان رسیفینے وکفایت کرار نا اُستا دا راجی نسخان ہنداخس اثر کرینے کہ چندی شعرتیٹ تینا راجے اسٹی و سیوت نا کلہو ترسہ ، نااتفاقی و تین پہ تینی نا جنگ وجیڑہ تہ نسخان و تاوان تے آن راجے آگاہ کرینے :
’’ذلمے جمر‘‘ٹی ساڑی اونا اسہ نظم ئس اتحاد نا پنا ٹے ،غٹ نظم نا ہر شعرے بحثان مُہٹ دا شعرے ہیت کینہ:
وت مہ وت زنچک مہ زنچک نوں مہ بئے او زام جَن
وت بزاں میر قمبریں ؔ سبزیں سگاراِنت اتحاد
کرار نا دا بلوچی شعر نا براہوئی بدل دُن مریک :
تین پہ تین زنچک توزنچک پین مفا او ذَمغ خلوک
سرپد اُس میر قمبرنا خَرونا سگارے اتحاد
داڑے او تیویٰ بلوچ راجے اونا باوہ پیریا تاریخے یات ترسہ مخاطب کرینے لوذ ’’ذَمغ خلوک ‘‘ اونا اولیکو شعر نا مرکز ے او دا لوذ ذمغ خلوک اٹ سرجمو تاریخ ئس علامتی وڑاٹ ڈھکانے و لازمے شعر ا پوہ مننگ کن ہمو ادراک نا ضرورت مریک ہرا ادارک شاعر تون تدے ۔ بلوچ راجی تاریخ نا خواننگ آن داہیت نا جوانیکہ سماتمک کہ بلوچ اسہ جنگجو و قوم ئس مسونے ‘ چائے او قوضہ کرینے یا قوضہ گیر تے خلکنے۔داتاریخ نا بنائے بھازاک حلب ولدا البرز و ہندن نا داسانابلوچستانے سرکیرہ یعنی بلوچ ذمغ خلنگ اٹ پنے۔ داہیتے مون مستی دننگ آن مُست ای نم کہ بلوچا تا ذام جَنی (ذمغ خلنگ ) نا قصہ ئس کیوہ :
پارہ کہ اسوار نوری نصیر خان جنگہ سے آ ہننگ اس غٹ سپاہی تے بمعہ ئے اوفتا سامان ‘ کلی وتوشہ ، سلہہ واُلاخا تون تیار کرے ‘ لشکر ہننگ کہ تیار اس خان صاحب پڑو کرے اینو ہنپنہ ننا اسہ خاصو سپاہی ئس داسکان سرمتنے اوڑکن انتظار رکروئی تمک ۔ غٹ لشکر حیران مس کہ داامرو سپاہیا سے کہ صدآتا لشکرے بیرہ اوڑکن تورینگانے :
سُہب تون خنار کہ اسہ آگڑی پُوش ئس تینا خامہ انگا چوٹا تون پند خلسہ خان نا دربار ے رسینگا ہرانا ذمغ ے کِپ ئس ہم الو بلکہ او تینا ذَمغ ے پُچ ا سے ٹی پیڑاسس ۔ غٹ سپاہیک انتظار آن دڑدی مسوسُر تو یکدم دادے پلویڑ کریر و مسخرہ نا اندازٹے پاریر نی وا جنگ اٹ انت غزہ کروس کہ خان صاحب غٹ لشکرءِ نیکہ تورینے !!
دا بشخندہ تون پارے :
’’سپاہی جنگ نا میدان اٹ درست مریک ‘ جنگ اٹ ہرادشمن آک نیام آن کَپ اسُر اوفک کناخلوک مرور ‘ ایلوک نما‘‘
گڑا لشکر سر مس ہمو جنگ جاہ غا ‘ جنگ مس خوب ذَمغ ءَ تا شلکامس ‘ جنگ نا ایسری آ کہوکا دشمن تے حساب کننگاتوچل آن زیات دشمن تے آن خلوک /کہوکاک نیام آن کَپّ اسُر:
کرار نااشارہ داشعراٹ ہنداڈول نا ذمَغ خلوکاتے آ ٹے ہراتینا جند نا ایلم اخہ بلکہ دشمن اے کُترکریرہ ۔ اوپاھک تین پہ تینی نا کش و بگیر و گروچکے ہل ۔۔۔او ذمغ خلوک!
داہیت آن ہچو باشعور و بندغس نہ من مفرو کہ ڈنّی یا بدر دشمن تے آن ننے ننا راج ءِ کلان زیات ہروڑاٹ تین پہ تینی نا جنگ وجیڑہ غاک نسخان تسنو و دا رویہ صدی تے آن ننا راج اٹ ساڑی ءِ کہ چنکاچنکا ہیتاتے آ اسہ گْوزا سیکن داڑے چندی لال آک مِشتا مسنو۔ زیات تردُن مسونے کہ ہمو ڈغار ہراڑکہ چندی ورناک سم تہ گواچی مسنو ہمو ڈغار ولدا نہہ دافریق نہ مسونے نہہ ارٹمی نہ بلکہ اوتینا جاگہ غا بیران سلوک مسونے انتئے کہ ڈغار کہ خواہی کروکاک زندہ سلتنو ، ڈغارے آبات ووسم کروک بچتنے یاگڑا ہمو ڈغارءِ سرکار ضبط کرینے :
تینی پہ تینی نا جنگ وجیڑہ نناراج نااجتماعی وہیل ءَ سے بلکہ المیہ سے و دادالمیہ ءِ ایلو بھاز اشعرتہ ڈول کفایت کرار ہم محسوس کرینے ہنداڑن اواسٹ ایلونا زنچکے ہلنگے اسہ بہادرو بندغا سے کن اسہ ذام جناسیکن مئیار گوندسہ پارینے کہ نمے دا سرپدی ہم ارے کہ اسٹی ، سیوت ویکجہی میرانگا قمبر نا ذمغ نا سگارے ۔ داشعر اٹ مُسہ تاریخی و چیدہ بندکننگانے و ہند امُسہ علامت کرار نا شعریت اٹ اونا علمی بصیرت وادراک نا شابیتی نا درشانی اے کیرہ ۔ اسٹ ہمو ذام جن (ذمغ خلوکا ) والا چیدہ /علامت ، ارٹمی میر قمبر ، مسٹمی سگار نا علامت :
میر قمبر رئیس نا تاریخی و کڑدارا سے ہراننا راجی آ بہادرہیروتے آنے بقولِ پناہ بلوچ کہ میرقمبر رئیس ئس مسونے او مکرانابادشاہی کرینے ۔ اونا زکر بلوچی خلقی شعرتیٹ زیات ارے۔تو داشعر اٹ کفایت کرار میر قمبر نا سگار (سگار‘ ذمَغ نا تیزانگا کاٹار/دھارے بلوچی ٹی پارہ )تون اتحاد ویکجہی ءِ مٹ کرینے ۔ اسہ بادشاہ سینا سلہہ اونا اختیار ‘ داشت ‘ رعب دبدبہ ‘ گشادولائخی نا علامت مریک ۔ میر قمبر نا سگاربلوچ راج اٹ اتحادئس جوڑاسس کہ کفایت کرار اونا زکرے تینا دا شاعری ٹی کرسہ تینا شاعری ءِ تاریخی و بابا سے ٹی بند کرینے :
ارٹمی حوالہ غا اوداپاننگ خواھک کہ میرقمبر تین پہ تین جنگ وجیڑہ کشت وخون کتنے ۔ ہراڈول کہ نم کننگورے ۔ داشاعری اے کرار اینوآن غالباً پانزدہ سال مالہو لکھانے ولے داسکان نناراج اٹ دا رویہ ساڑی ارے کہ نن تین پہ تین زنچک مہ زنچک اُن ۔نن اسٹ ایلو اے برداشت کپنہ ، چنکاچنکا ہیتاتے ہم درگزر کپنہ بلکہ مدامی تین پہ تینا غُرغشنہ۔ ننا ہندا تین پہ تینی نا زنچک ہلنگ ننا نیام آن مخالفے گیشتری فاہدہ و ننے راجی پڑہ قبائلی پڑ ہ سیاسی پڑہ نسخانی کرینے ۔ بقول کفایت کرار نا ہند انظم ئنا اگہ نن اتحاد کرون ، اسٹ مرون ، سیوت اٹ جہد کرون تو پین کس ننے پھرغن کپرو۔

Check Also

”بِگ بینگ“ کیا ہے؟۔۔۔ شاہ محمد مری

تاریخ‘ ماضی کی کہانی کی حیثیت سے حتمی تبدیلیوں کے تسلسل کا ایک بیانیہ ہے۔ ...

Leave a Reply

Your email address will not be published. Required fields are marked *