کڈک و مشک ۔۔۔۔ گوہر ملک

کڈکا یک روچے وتی دلا گشت اے درستیں زند پہ تنہائی نہ گوزیت،ما س وپتئے منا نیست ۔چہ میر ئے گو کانی لِڈ و سّپتان پیدا بُوت او رُست و مزن بُوتن۔ وت سرجنین و پہ وتا مرد ئے پیدا بکنین ۔دومی روچا مہا لہ پاد آحت۔ سر ششُت و چمے سُرمگ کرتنت ۔دپ پن و مسواک کُرت۔ دیگکئے بٹے گِراست ، چادرے سرا کُرت و دیگکئے بٹ ئے زُرتنت و رہادگ بُوت ۔
کاہی گرا دیست کہ کڈکُ سرو سینگاراِنت او درآحتہ۔ جُستے کُرت ’’کڈکے تُسی کجا روئے کڈکا گشت ’’دردئے ؟‘‘۔تئی دپا بگریت ۔منی نام اِنت بی بی کڈکو سندل خاتون۔
کاہی گرا گُشت
’’بی بی کڈکو کجا روئے
سرو پاتین کجا روئے
پن و مزواک کجا روے
دگک گوں بٹاّں کجا روئے
کڈکا جواب دات :
گردین ، گردیں شُدھے گرین،
شوھے مالدار ے گرین
آسودگیں نانے ورین
تحتی سرے ورابے کنین
’’گوں وتی مزن مزنیں شاھان‘‘۔
کاہی گرا گشت
’’ منا کرے ؟‘‘۔
گشے اگہ توز ھر بُوتے گڑا منا گوں چے ءَ جنے‘‘۔
گشتئی’’ گوں وتی مزن مزنیں شاہاں‘‘۔
دستئے گوشاں کُرتنت گشتے ’’ھو منا تو بہ اِنت تئی کانٹ منا کُشنت‘‘۔
دیما شت تانکہ ہرے ہوشتا تہ گوشاں سرینگا اِنت ۔ کڈک دیستؤ گشتئی:
’’ کُڈک سیا دیم کجا روئے ‘‘۔
گشتے’’ تئی دپا گرّے گرات ۔منی نام اِنت ، بی بی کڈکو صندل خاتون، ‘‘۔ ھرا گشتت
’’بی بی کڈکو کجا روئے،
سر او پاتین کجا روئے،
چَم او سرمگ کجاروئے،
دپامزواک کجا روئے،
دیگُک گوں بٹان کجا روئے‘‘۔
گشتے
’’گردین او گرین شوھے گرین،
شوھے مالدارے گرین ،
آسودگیں نانے ورین ،
تحتی سرے وابے کنین‘‘۔
گشتے تو منا گون چے آ جنے،
گشتے ،’’ گوں لگّتا‘‘
گشتے ’’ ہُو‘‘ منا تو بہ اِنت ۔تئی لگت منی شِیر تگاں کشیت ‘‘۔
دیما شت دیستے، گرانڈے لہڈہئے دیستے ، پا چن، دیستے اَسپے دیستے او درستاں آھرا ھمے جُست کُرت او ھمے وڑا جواب دیا ن او گوشاں گران او توبہ کنانا شُت ۔چہ ہلک و میتگاں دورمن ڈن و ڈکارانی نیمگا شت ۔دیستے تانکہ مُشکئے وتی ھونڈے دیما نشتہ آدینک او موچنک (مود کش) اے گون وتی ریش و بروتاں شر کنگا اِنت ۔ کڈک ئے کہ دیست کہی کہی کہی کھندگا لگت او جُستئے کُرت ’’کڈک ئے سیادیم کجا روئے، ترا گربگے وارت ‘‘۔
’’مشکّ ئے گندہ رِیشک ، منی نام اِنت بی بی کڈکو صندل خاتون۔
مشکا گُشت ’’بی بی کڈکو کجا رویے،
سرو پاتین کجا روئے،
پن او مزواک کجا روئے
دیگکُ گوں بٹاں کجا روئے‘‘۔
کڈکا گشت گردین ،
گردین، شوھے گرین،
شوھے مالدارے گرین
آسودگیں نان ئے ورین ،
تحتی سرے واب ئے کنین ‘‘۔
مشکا گشت ’’منا گرے ‘‘۔
گشتے تو منا گوں چے آ جنے’’ مشکا وتی لِٹکّ چو چا بکا تاب دات کہ گوں ایشی۔
کڈک وش بُوت گشتے منا قبول اِنت۔ ہر دودیم پہ دیما نشتنت ۔ گشتش تو منا قبول ئے من ترا قبول اُن، دیگُک ئے بٹ ئش وارتنت۔
روچ گوزانا شُتنت، یک روچے مشکا گشت ’’بادشاھہ بچ ئے آروس اِنت ، ھما اِنت کہ منی او تئی سُوربُوتہ من ھنچ جاگہ نہ شتگن۔ دیر اِنت کہ بٹ او گوشت نہ وارتگن ۔مروچی من ہمودا روین لہتیں روچ اَمود ابین‘‘۔مشکا لٹک ٹال کُرت او شت ۔
ھما درستیں شپا ھوراں گورت ، سہبا کُدک چہ وتی ھونڈا در آھت دیستے تانکہ آئی ھونڈا چہ کمے گِستا مزنیں دگے پہناتا گوکی پدے چہ آپا پُرنت ۔دلا گشتے چونیں شرّیں کانی اے کہ چہ آپا پُرنت۔ رھیں وتی سرا شودین۔ سررندے ذُرت او آھت او آپ ئے کِرّا نشت۔ انچو کہ دستے آ پا دور دات یک برا لِتُرت او گو کی پد ئے آپ ئے تہا کپت۔ لِترُک ئے جت وس ئے کُرت درآحتے نہ کُرت ۔ دیستے تانکہ مرد ئے اَسپاسوارنت او بادشاھے بچ ئے سُورارؤگا اِنت، کڈکا گوں وشیں گٹے آ گشتے:
او سوارو اَو سوارو،
اَسپے دُلدل دارو،
ذینے کابُل دارو،
مُشکا گندہ ریشکا بگُش کہ بی بی صندل خاتون، من تہہ چاہ کپتہ، اَمپان ئے چیندوک ڈنہ دُز ا۔
ساحتے آ رند دِگہ سوارے گؤئست ، کڈکا پدا توار کُرت او سوارو! او سوارو اَسپے دلدل دارو ذینے کابل دارو مشُکا گندہ ریشکا بگش کہ بی بی صندل خاتون من تہہ ئے چاہ کپتہ ھے کہ بیائے ‘‘۔ مرد حیران بُوت۔ انگو آنگو چک ئے جت چارتے کس ئے نہ دیست ، رہ گپت او شت ۔
بادشاھے گشا دیوان اَت ۔ میر او امیر نشتگ اَتنت کہ چہ کُنڈے آ مشکے در آحت او سِٹّاناشت او چیر بُوت۔ مردا آ مشک دیست دلائے آحت گُشتے’’ من پیداک اَتن کہ توارے اُشکرتن یکے گشگا اَت
اوسوارو او سوارو،
اَسپے دلدل دارو
ذینے کابل دارو
مشک او گندہ ریشکا امپانے چیندوک او ڈلہ دُزابگش کہ بی بی صندل خاتون مں تہہ ئے چاہ کپتہ‘‘۔
مشکا کہ اے ہبراُشکُرت ھلا ھوش بُوت ، اِنگو تتک آنگو تتک، شُت تانکہ بانور ا پرچنگا اَنت ، بانور ئے پُلک ئے دُزّت او دپاکُرت جست دیم پہ وتی ھونڈا۔دیستے تانکہ کڈک مزنیں دگ ئے پہناتا گوک ئے پد ئے آ پہ تہا کپتہ لگنو کی جنگا ات۔ مُشکا را کندگا گپت ۔ کندت و کندت لاپ دردبوت او گوئشتئی: دستا بدے کڈّک ئے تُسّی ۔
کڈکا گشت برو اَمانگو مشک اوگندہ رِیشک۔
موشکا گشت: دست بدے بی بی صندل خاتون۔ گشتے دستا بگر واجہ مشک ئے پشیّ بروت۔مشکا کڈکا رادستا گپت او چہ آپا درکُرت ۔بانور ئے دُزّتگیں پلک ئے چہ دپاکشت او کڈک ئے پونزا دات ۔ او ہر دو گل کنان او وشی کنان وتی ھونڈا پُترتنت۔