Home » پوھوزانت » سائبر سیکیوریٹی او سائبر کرائم ۔۔۔ زاھدہ رئیس راجیؔ

سائبر سیکیوریٹی او سائبر کرائم ۔۔۔ زاھدہ رئیس راجیؔ

آکہ انٹرنیٹاشپ روچ کارمرز کن اَنت پَہ شرّی سرپد اَنت کہ ھما انٹرنیٹا مردماں زند ءِ بازیں آسراتی او ایمنی داتگ،چَہ گُمنامیا نامداری داتگ، دیریں مردم ءِے نز یاورتگ ، سرجمیں دنیا ئے مردم ءِے یکجاہ کُتگ او ھیالانی درشانی ءِ پاس و وھد ءِے بے گواز کُتگ اَنت، برے برے ہمے انٹرنیٹ مردما انچو نگیگ کنت کہ مردم پَھکا چَہ نیٹ ءَ دلپروش بیت۔
اے نگیگی ءِ گیشتریں دیمپان ھما مردم یا ادارہ بنت کہ آھاں شَرّیں پجّارے گون اِنت یا پَہ مھلوکاگیشتریں نپے گون اِنت۔ اِے نگیگی ءِ جاورانی جوڑ کنوک ھما گیچینیں مردم یا ادارہ بنت کہ آھانی بنکی کارئے ند ھمیش اِنت ۔ ایشاں سائبر دُز یا ھیکرز (Hacker)گوشنت اوانٹرنیٹ ءِ اِے نگیگیں جاورا ھیکنگ(hacking ) گوشنت۔
ھیکنگ یا سائبر دُزّی ءِ کار چونائیاارزانیں او سُبکیں کارے نَہ اِنت کہ ھرکس دیم پَہ وت بِہ کنت۔ اِے گیشترھما مردم کُت کن اَنت کہ آھاں نیٹ ورک ، پروگرامنگ اوسیکیورٹی ھولز ئے باروا گوں جھلانکی ءَ ونتگ ءُ کار کُتگ۔ سیکوریٹی ھولز بُن اسلا ھما جاور اَنت کہ برنامہ یا مراگش یا پروگرام یا سافٹ ویئرءِ جوڑ کنگ ءِ وھدا چَہ کسانوکیں بے دلگوشی ءَ پشت کپ اَنت۔
آئی ٹی دنیا ءَ انچیں ھم دُزّ اَست اَنت کہ آھانی کار چَہ تند جاہاں سیکیوریٹی ھولز درگیجگ ءَ رند وتی ادارہ ءِ دستا دَیگ اِنت۔ اے سیکیوریٹی ادارہ ھما ادارہ اَنت کہ تندجاھانیwebsites شَرّی ءَ دلمانگ اَنت ۔آ چَہ وتی ادارہا سَنَد گپتگیں ویب سائٹاں بازیں رَھشونی ھم دَینت ۔بلے چَہ ایشاں ابید ھم انچیں ادارہ است اَنت کہ آ وتی ھیکرزاں پرماینت کہ آ نیٹ ءِ سرا انچیں ذاتی ءُ ادارہی ویب سائٹاں شوہاز بِہ کن اَنت کہ آھانی تہ ءَ سیکیوریٹی ھولزمان اِنت۔
چَہ اے ھولز یا ٹُنگاں آ انچیں اسکرِپٹ یا مراگش دیم دَینت کہ آھانی گوازینگ ءَ رند ویب سائٹ وائرس ءَ پُر بنت اگاں نَہ ویب سائٹ سرجمیں ڈیٹا یا مالومداری برباد بنت۔ اِے دومی گروپ ءِ سائبر دُز یا ھیکرز گیشتر گوں ھما ادارہاں ھمگرنچ اَنت کہ آ رند اویب سائٹ واھنداں بلیک میل کن اَنت یا آھانی گورا ایمیل دیم دَینت کہ چَہ مارا وتی ویب سائٹ ءِ ھرابکاری ءَ شر کنائین اِت یا مئے مردمے ءَ وتی کرّءَ کارءَ بہ داراِت۔
اے رنگیں گیشتر کار منی جند ءَ انڈین او روسی گروپ یا ادارہانی دیستگ اَنت کہ اول ءَ تئی ویب سائٹا ھیک کن اَنت پدا ترا ایمیل یا گپّال ءِ سرا سہیگ کن اَنت کہ بچار تئی ویب سائٹاسیکیوریٹی ھولز باز اَنت مارا کار ءَ بِہ داراِت ءُُ ما شمارا چَہ اے درستیں نگیگیں جاوراں رکین ایں۔ نوں گپ ایش اِنت کہ اگاں ویب سائٹ ءِ جند ترا یک کلدارے دَیگ ءَ مَہ بیت ءُ تئی جند ءِ مالی جاور ھم چوشیں مَہ بنت کہ تو مردمے پہ اے جاور ءِ گیش ءُ گیوار ءَ پگار ءِ سرا داشت بِہ کن ئے گُڑا بزان کہ تئی دست وپاد دوئیں گُڈّگ بوتگ اَنت۔
یک زمانگے بوتگ کہ مردمانی ایمیل اکاؤنٹ دُزگ ءِ سافٹ ویئرز انٹرنیٹ ءِ سرا انچوش تالان بوتگ اَنت کہ ھرکسالوٹ اِتگ دومی ئے گپّال وتی دستاں زرتگ اوآمردم ءِ ذاتی یا ادارھی سرجمیں کلوہانی دیرکنگ ءَ رند آئیءِ سرجمیں ایڈریس بُک ءَ وائرس دیم داتگ ۔
پدءَ یک انچیں وھدے ھم اَتک کہ photo maker ؍ editor video maker ؍ editor سافٹ ویئرز دیم ءَ اتک اَنت چوکہ فوٹو شاپ، فری ھینڈ، یولیڈ ، سونی ویگاز ءُ دگہ بازیں۔ ایشانی اَڈ کنوک ءِ بلکیں وہم وگمانا ھم نہ بوتگ کہ سائبر دنیا ءِ ھرابکارانی دستا اے سافٹ ویئرز وھدے کاینت آ انچیں انچیں کار سازاَنت کہ دنیا ءِ چم جَہل بِہ بنت۔ آھاں لہتے نامداریں اوشرپمندیں مردمانی سرگ ءِ اَکس دیر کُتگ اوھمے رنگ ءَ برہنگیں جسم ءَ گوں لچینتگ کہ بید چَہ گرافک ایکسپرٹ ءِ دگہ ھچ چاروکے ءَ پجّایاورت نہ کُت۔ اِے ھرابکاری ءِ پُشدر گیشتر ھمے بیتگ کہ آ مردم ءِ نام و کرد ،دُنیا ءِ دیم ءَ ھراب پیشدارگ بِہ بنت۔
چَہ اکساں مردماں بلیک میل کنگ یا مردمانی زاتی اکسانی بے جُست ءَ شنگکاری ءِ کار اَگاں من رَد مہ باں گُڑا مئے ھردو نیمگ ءِ بلوچستانا چَہ کمپیوٹر ءَ گیش سیل فون ءِ وسیلہ ءَ اتکگ ۔ وکتاں کہ ڈیجیٹل فون مردمانی گورا نوک بوتگ آ وھد ا ھم لہتے شِرّیں مردماں شریف و خانودائیں مردم اذیت کُتگ اَنت ءُ سی ایل آئی نَہ بَیگ ءِ سوبا کس ءَ نزانتگ کہ آئی ءَ پریشان کنوک کئے اِنت۔
بلے ٹیلی کمیونیکشن ادارہاں پیس پیسرءَ ڈیجیٹل سی ایل آئی ءِ پجّار کنائینت تاں ھرکس بِہ زانت کہ آئی ءَ کال کنوک کئے اَنت پدءَ آھاں کال بلاکنگ سسٹم دیم ءَ یاورت تاں مردم وتاچَہ نادوستیں شمارہ یا مردماں پہریزات بِہ کنت۔
نوں کہ کمپیوٹر ءِ رنگ ءَ سیل فونزاں ھم نیٹ ءِ آسراتی سک ارزانیں رنگے ءَ مردماں رسگ ءَ اِنت ،آ درستیں شَرّی کہ کمپیوٹر ءِ توکا مان اَنت آ ھم ترا اِد ءَ رس اَنت چوکہ وتی یوٹیلیٹی بلز (لئین ، گیس او فون ) ءِ پُرکنگ ءُ سوشل میڈیا ءِ سرجمیں آسراتی ھمے رنگ ءَ ترا آ درستیں نزوری یا ھرابی ہم رس انت کہ اُوداَست اَنت۔
چونائیا اے دیریگیں گپّے اگں من رد مہ باں بلکیں سال دوھزار ھپت یا ھشتءِ وھد اَت ۔ من وتی مُلک ءَ اِتاں کہ ھالے رس ات کہ ایران ءِ یک شاہ دربرجاہے ءِ لہتے جنِکیں نودربراں وتی ہاسٹل ءَ یک وت ماں وتی دیوانے اِیر کُتگ اَت کہ اودابید ءِ چَہ جنِکاں دگہ کسے نہ بیتگ۔ آھاں ٹیپ چالو کُتگ ءُُ ناچ ءُ سُہبت کُتگ او یک دوجَنِکاں وتی موبائل ءِ سرا پیت بند (ریکارڈ ) کُتگ ۔ رندا چَہ اے جنکاں یک جنکے ءِ موبائل ھراب بیتگ اوآنہیا پَہ شر کنائینگا فرنچائیزا دیم داتگ او چَہ ھمودا اِیشانی ویڈیواو اکس چپ و چاگردا شنگ و تالان بیتگ۔
چَہ اے چیز ا رندآدرستیں جنکانی گوں لوگ ءِ مردماں بازیں بنّامی یے بوتگ ، لہتے جنکانی سانگ پروشتگ او لہتے جنکاں چَہ مَھلوک ءِ شگان و ٹوک ٹالی ءَ وت کُشی کُتگ۔ اِے جاورءِ بیم آوھد اانچوش گیش بیتگ کہ مئے مُلک ءُُ آنہی کش گورءِ لوگانی جنین و جنِکاں وتی نزیکیں سیادانی سرا ھم بیسہ نَہ کُت کہ آھانی اکس وتیگانی موبائل ءِ سرءَ بِہ بیت۔
ھمے رنگ ءَ یک سالے منی سربلوچستان ءِ دگہ یک سرسبزیں دمگے ءَ کپتگ اَت او اودا لہتے جنکانی ٹولی ءِ ھمرائیءَ منا پلّ ءَ گردگ ءِ موہ ھم رس اِت گُڑا راہ ءِ نیما موٹر سائیکل ءِ سرا سواریں دومردک یا دوبچک ھرکُجا گندگ بیت اَنت درستیں جنکاں وتی دیم چِیر دات اَنت ءُ رند ا کہ من اِے چیزءِ سوب جُست کُت گُڑا آھانی پسّو ءِ سرا تپاک کنگ ءَ من ھم مجبور بیت آں کہ بے جنِکانی سہیگ کنگ ءَ بچک چیروکائی آھانی اکسا گرنت اونیٹ ءِ سر اشنگ کن اَنت او وھدے آ اکس مئے مردینانی دیما کپ اَنت آ ایشی ءَ مئے ردی زان اَنت کہ ستر آ وانندگ ودنیا گند اَنت بلے وتی جنین و جنکانی باروا آھانی پگر ومارشت انگت ھم پیسریگینانی رنگ ءَ اِنت۔
چیزے سال پیسریک بلوچی روتاکے ءَ چَہ بلوچ جنکے ءِ نیمگ ءَ دزبندی یے شنگ کنائینگ بیتگ اَت کہ آئی ءِ لوگا سوری دیوانے ءَ آھانی یک دشمنے ءَ وتی مردمے دیم داتگ او موبائل ءِ سرا چیروکائی آ جنک ءُ آئیءِ خاندان ءِ اے دگہ جنکانی لوگی اکس گپتگ او دژمن ءِ دستا داتگ کہ آنہیا گوں وتی سنگتاں چَہ فیک آئی ڈیز ااے اکس سوشل میڈیا ءَ شنگ کُتگ اوآ جنک نگیگیں جاورانی توکا دَور داتگ۔ چَہ زانتکاریں برات گہاراں دزبندی کُتگ اَت ءِے کہ آ اِے اکسانی چَہ ایف بی ءَ دیر کنگا کمک بِہ کن اَنت۔ گُڑا آ وھدا کہ ایف بی ءِ ریپورٹنگ سسٹم وسیکیوریٹی سسٹم سک زرنگ ات ما بازیں آئی ٹی ئے برات گہاراں ھوری ءَ ایف بی ریپورٹ کُت او سرجمیں اکس گوں آئی ڈیز ا دیر کنائینت ایں ۔ بلے پدا ھم اے ترس مئے مجگ او دلا اَست اَت اگاں آ مردم ءَ اے اکسانی بیک اپ جاھے ءَ ایر کُتگ گُڑا دوبرکارمرزی گرانے کارے نَہ اِنت ۔
بُرزا من ھمنچو درور پیش کُتگ اَنت آ درست سائبرکرائم ءِ تہ ءَ ھساب بنت۔
سائبر کرائم ءِ اصطلاح پہ آ درستیں ھرابکاریاں کارمرز کنگ بیت اِنت کہ کمپیوٹرنیٹ ورک ءِ وسیلہ ءَ کسے ءَ جانی ، مالی یا پجّاری تاوانے بِہ رسیت۔
چَہ ھما روچا کہ نیٹورک ءِ وسیلہ ءَ ھرابکاریانی بندات بیتگ سائبر سیکیوریٹی ءِ زلورت دیم ءَ اتکگ۔
نیٹ کارمرز کنوکانی چَہ ھرابکاریاں پہریزگ ءَ زلوری ات کہ سائبر دنیا ءِ جرم ءِ ھم سزا قانون ءِ توکا بِبیت۔
سائبر سیکیوریٹی اے وھد ء یک مزنیں لوٹے اوچَہ ایشی ءَ گیش سائبر جرم کنوکا سزا دَیگ مزنیں زلورتے تاں کس گوں کسی جان و مال وعزتا لئیب کُت مَہ کنت ۔
چونائی ءَ سائبر سیکیوریٹی دیوک سد درسد ھما مردم یا ادارہ بنت کہ آھانی جند اانچو سنچ مان بِہ بیت کہ ھرابکاری ئے سرجمیں رَھبنداں پروشت بِہ کن اَنت بلے بژنیگیں گپ ایش اِنت کہ پاکستانئے توکا سائبر قانونئے بل(bill) ھمایاں جوڑ کُتگ کہ وت سائبر ئے باروا ھاک پُر نزان اَنت پمشکا آھاں وتی بل ءِ تہا مَھلوکئے ذاتی چیزانی سراریاستی ادارہانی سد درسد دخل اندازی منِّ اِ تگ کہ اے سوشل میڈیااو نیٹا پَہ وتی ھکّ ءَ کارمرزکنوکاں مزنیں تاوانے جوڑ بیت۔

Spread the love

Check Also

خاندانوں کی بنتی بگڑتی تصویریں۔۔۔ ڈاکٹر خالد سہیل

میں نے شمالی امریکہ کی ایک سہہ روزہ کانفرنس میں شرکت کی جس میں ساری ...

Leave a Reply

Your email address will not be published. Required fields are marked *