Home » پوھوزانت » بلوچی زبان وسیاہیگ ۔۔۔ شرف شاد

بلوچی زبان وسیاہیگ ۔۔۔ شرف شاد

نبشتانکانی نزّآرگ ءُ کتاب Compileکنگ لبزانکءَ مُدام ستاکرزیں کارے زانگ بیت ، پرچا کہ یکیں بُنگپ ءُ سرحالءَ نبشتہ بوتگیں نبشتانکاں کتابےءَ نزّآرگءَ ، یک نیمگے وانوکاں اے آسراتی رسیت کہ آہاں وتی لوٹ ءُ مطلبءِ چیز یکجاہءَ دست کپ اَنت دومی نیمگا دُرستیں نبشتانکانی یکیں بُنگپءِ بوؤگءِ سببءَ سرجمیں کتاب بحث ءُ ترانےءِ دروشمءَ بدل بیت۔ اے یک انچیں بحث ءُ ترانے بیت کہ وانوک ہمے بُنگپءِ دُرستیں تک ءُ پہناتانی سرا چار ءُ بیچارکن اَنت ۔اگاں بُنگپ مانگیش اتگیں جیڑہے بہ بیت گُڑا آئیءِ گیشءُ گیوارءِ واستہ راہ ءُ در پولگءِ کوشست کن اَنت۔
کتاب Compileکنگ یک حسابےءَ زانشی ءُ پٹ ءُ پولی کارے تہ دومی نیمگا ایشیءِ تہا یک کساسےءَ سائنس ءُ ازم ہم ہوار اِنت۔ زانتکارانی گشگ اِنت اگاں اے کارءِ کنگءَ لہتے جُست دیما ایر کنگ بہ بیت،گُڈا اے کار سائنسءِ رہبندانی تہا کیت چو کہ :
(۱)یک کتابے compileپرچا کنگ بہ بیت؟
(۲)کتابCompileکنگءِ مول ءُ مُراد چی اِنت؟
(۳)اے کارءَ کجام کار کنگی نہ اَنت؟
۔ اگاں کتاب Compileکنگءَ اے جُست دیما ایر کنگ بہ بیت کہ یک کتابے کجام وڑا پیش کنگ بہ بیت۔؟ ہمے کار آرٹ ءُ ازمءِ حدّ ءُ سیمسرانی تہا کیت۔
گوستگیں روچاں اسحاق خاموش ءِ بلوچی زبانءِ بابتءَ نزّآرتگیں کتاب ’’بلوچی زبان ءُ سیاہگ‘‘ بلوچی اکیڈمی ، کوئٹہءِ نیمگا چاپ ءُ شنگ بوتگ ۔ کتاب compileکنگءِ ربیدگ بلوچی ءَ کوہن اِنت ءُ اے چہ بلوچی اکیڈمی ءِ نیمگا بندات کنگ بوتگ ، بلے چشیں باز کم کتاب اَنت کہ آہانی نزّآرگءَ سائنس ءُ ازمءِ بُرزءِ شون داتگیں فکری ءُ جمالیاتی Appraochکارمرز کنگ بوتگ ۔
دُنیاءِ ہما ملکاں کہ علم ءُ زانت ءَ دیمروئی کتگ، پٹ ءُ پول ءُ کتاب Compileکنگءِ ارزش ءُ بستارءَ سرپد اَنت گوں ہمے فکری ءُ جمالیاتی سرپدیءَ کارگِرگ ءُ زانشتی ءُ پٹ ءُ پولی نپ ءُ سیت چست کنگءَ اَنت۔ اسحاق خاموشءَ وتی کتابءِ Compileکنگءِ ہاترا ہمے سائنس ءُ آرٹءِ فکری ءُ جمالیاتی Appraochکارمرز کتگ ۔
بلوچی زبان ءِ اڑ ءُ جنجالانی بابت ءَ یک کتابے نزّآرگ پرچا بہ بیت ءُ ایشی ءِ مُراد چی اَنت؟
اے جُستءِ پسوءَ گوْشگ بوت کنت کہ، بلوچی زبان ہزاراں سال کوہن ءُ قدیم اِنت، بلے ایشی ءِ بُنزہ ءِ بابتءَ سائنسی رہبندءَ پٹ ءُ پول نہ بوتگ ۔ مزنیں مُدتےءَ وانگ ءُ نبشتہ بوؤگءَ پد ہم بلوچی زبان یک میّنیں نبشتہ رہبندےءَ زبہر اِنت ۔ بلوچی زبانزانتیءِ سرا چشیں کتاب سک کم اَنت کہ ماں آہانی تہا بلوچی زبانءِ درستیں تک ءُ پہناتانی سرا بحث ءُ تران کنگ بوتگ ۔ صبا دشتیاری ءَ بلوچی زبانءِ عاقبتءِ نامءَ دو جلداں بلوچی زبان ءِ سیاہگ ءُ اڑ ءُ جنجالانی بابتءَ 90ءِ دہک ءَ دوکتاب Compileکتگ۔ پمشکہ اسحاق خاموشءَ المی زانتگ کہ ہمے سرحالاں جتا جتائیں زانتکارانی نبشتہ کتگیں نبشتانک چنئگ ءُ نزّآرگ بہ بنت دانکہ بلوچی زبانءِ بُنزہءَ پولگءِ ، نبشتہ رہبندءَ اسٹینڈرائزڈ کنگءِ ءُ یک اسکرپٹے گچین کنگءِ بحث ءُ تران دیما برَگ بہ بیت۔
اسحاق خاموش ءِ ’’ بلوچی زبان ءُ سیاہگ‘‘ءَ28جتا جتائیں زانت کارانی نبشتانک ہوار کنگ بوتگ اَنت کہ بلوچی زبانءِ راجدپتر، بُنزہ ، سیاہگ ، نبشتہ وڑ ءُ زبانزانتی ءِ بابتءَ اَنت۔ ماں اے کتابءَ یک نیمگے اکبر بارکزئی ،عبدالغفارندیم، ڈاکٹر نعمت اللہ گچکی، ع ص امیری، م طاہر، محمد حسین عنقا، میر عاقل خان مینگل ، واحد بُزدار، ڈاکٹرکہورخانءُ حامدعلی بلوچءِ نبشتانک ہوار اَنت کہ آ بلوچی زبانءِ راجدپتر ءُ بُنزہ ءُ اے دگہ زباناں گوں نزیکی ءِ بابتءَ اَنت ۔ دومی نیمگا زبانزانتی ءُ توارزانتیءِ سرا اکبربارکزئی، کارینا جہانی، غفورشاد، حامد علی بلوچ ءِ نبشتانک ہوار اَنت۔ بلوچی زبانءِ سیاہگ ءُ اسکرپٹءِ سرا سید ہاشمی، زاہدہ رئیسی راجی، غوث بہار، پیرل شے تگریءُ منصوربلوچءِ نبشتانک ہم وانگ کرزاَنت۔
ہستیں دَورءَ بلوچی زبانءِ سرا بحثءُ تران گیش بوتگ اَنت۔اے وھدءَ کہ بلوچی زبانءِ سیاہگ ،نبشتہ رہبندءُ اسٹینڈرائزیشن ءِ سرا دیوان ءُ مجلس گیش بوتگ اَنت، یک نیمگے عربی ءُ رومن اسکرپٹءِ جیڑہ، دگہ نیمگے ءَ ، ءَ ، ءِ ، ءُ ءِ زورگ ءُ نہ زورگءِ گپ ءُ تران ءُ سیمی نیمگا عربی آبانی ہوار کنگ ءُ کشّگءِ ڈاہ ءُ شورءَ بلوچی زبان اجبیں جاورحالےءَ دُچار کتگ۔ہمے جاورحالءَ اسحاق خاموشءِ کتابءِ ارزشت ءُ بستار اے واستہ گیش بیت کہ مارا دعوت دنت کہ مَا وتی زبانءِ جیڑہ ءُ جنجالانی سرا یک رندے پدا فکرءُ بیچار بہ کنیں ، گوں ہمے شرطءَ کہ بلوچی زبانءِ جیڑہانی گیش ءُ گیوارءِ راہ ءُ دَر شوہازگ بہ بنت۔

Spread the love

Check Also

خاندانوں کی بنتی بگڑتی تصویریں۔۔۔ ڈاکٹر خالد سہیل

میں نے شمالی امریکہ کی ایک سہہ روزہ کانفرنس میں شرکت کی جس میں ساری ...

Leave a Reply

Your email address will not be published. Required fields are marked *