کنا داغستان ۔۔۔ رسول حمزہ توف/غمخوارحیات

بندغ نا دوہی آن لوزاتے تالان مننگ آ اُرے اووخت مفک کہ بندغ چچ مرے بلکہ ہمو وخت ہم لوزاتے شینک مننگ آ اُرے تمک وختس بندغ ءِ موقع غا المّی وگچینو دونولوز دوبف ہرافک عقل و زانت نا اظہارءِ کننگ کیر۔ انداڈول ‘ لوزاتہ آسرہ ٹی ای نہ کس ءِ تینا علم واذانت نا داشت ءِ شاغنگ خواوانہ ای چچ اُٹ۔ ہیت دادے کہ ای مناسوبرو لوزپَٹنگ اُٹ انداڑن ای وار وارءَ سلیوہ۔۔۔
ابوطالب نا زَرنوشت ءَ سے : ’’کہ کتاب نا سرلوز ہمو بوچ نا ڈول ءِ ہرادے اسہ شرک پرستو اُراگودی ئس ہمو وخت اسکان تینا دنتان تا نیامٹ تورک ہراوخت اوتینااِرَ غ نا میل*تا کاس تے آن جوڑ کروکا زوڑ* (۱)ءِ دُزنگءِ مرے ۔ لس عقیدہ دادے کہ دُزی وخت ءَ اگہ اودُن کپ تو ہمو زوڑ اوڑکن کفن ئس ہم مننگ کیک :‘‘
ابوطالب نا اسہ پین زرنوشت ءَ سے : ’’ای ہمو بندغ نا وڑاُٹ ہراتارمئی ٹی درگہ ئس پَٹِک یاہمو درگہ غا رسینگانے ولے یخین کننگ اف کہ دانہ تہٹی ہننگ مریک یانہ‘و داٹی ہننگ آن فائدہ ئس دوبرویانہ‘ و ہندانیامٹ درگہ ءَ ٹَک ٹَک ہم مریک ٹَک ‘ٹَک ‘ٹَک ‘ٹَک۔۔۔
’’تہٹی تولوک انگا! اگہ نے سوبسوئی ءِ تو بش مہ ‘ انتئے کہ وخت کم سلوکے ‘‘:
تہٹی تولوک انگا! اگہ نے پِرین نا چَٹنی ئس جوڑ کروئی ءِ تو ہچو گڑتی ئس اف‘ وخت بازءِ ‘ بَش مننگ کہ ہچو اشتاف ئس اف‘‘:
تہٹی تولوک انگا!اگہ نا اِرادہ بوزا*(۲)تنگنگ نائے تو ہمسایہ ءِ صلاہ خلنگ ءِ ہوش آن دپیس‘‘:
ٹَک ‘ٹَک ‘ٹَک ‘ٹَک۔۔۔
’’ای تہٹی بریو‘ یا نے کنا ضرورت اف‘‘؟
چنااِراسال ٹی ہیت کننگ ہیل کیک و انسان 60سال نا وئی غا سر مننگ آن گُڈداسرپند مریک کہ ہیت آن بائے تینا امہ توریرہ!
نہ ای اِراسال نا چناسے اُٹ نہ 60سال نا پیروس۔ ای تینا زندءَ نا نیام تیائی وئی ٹی اُٹ ۔ولے عمرءَ نا گُڈیکو مِزل آن خڑک اُٹ۔ انداڑن ہمو لوزہرا داسکان کنا دوہی آن پیشن متنے کنا خڑکا دا غٹ لوزاتے تا مون ءَ ٹی زیات قیمتی ءِ ہرافک زبان آن شینک مسونو:
ہمو کتاب ہرادے ای داسکان لکھتانُٹ‘ کنا ہمو غٹ کتاب آتے آن زیات قیمتی ءِ ہرافتے ای لکھانُٹ۔ اوبے بہاءِ ‘ کنا اُست آن زیات خڑک ءِ او زیات گشادوجیرت نا طالبگارءِ:
اسہ پوسکنو کتاب ئس کناخڑکا ہمو گَٹ نا مثال ٹی ءِ ہراٹی ای ہچو وختس پئے ءِ تہ نُٹ‘ ولے کسرک مَلنگسہ ہننگوو دَنز اٹ ڈھکوکا شابیتیک مون مستی بننگو۔ اسہ پوسکنو کتاب ئس ہمو ہُلی ءِ ہراڑا ای اسُل سواری کتانُٹ‘ ہمو ذَمغ ءِ ہرادے ای ہچو وختس اوناکِپ(نیام) آن کشتانُٹ:
مَشی تے ٹی اسہ مَتل ءَ سے کہ ’’بید عقلی وسبب ءَ سے آن ذَمغ ءِ اوناکِپ آن کشپہ اگہ کشوئی مرے تہ تو ہندنو وار ئس کہ ‘ کہ اسہ وار تون سوارو اولاخ ناقصہ خلاس مرے:‘‘
مَشی آ مخلوق !نما ہیت آک راستو:
واہم ذَمغ ءِ کِپ آن کشنگ آن مُست داتسلی کروئی ءِ کہ اونا سگار تیزءِ یہ نہ۔
اے کنا کتاب! کنا اُست نا روتہ تیٹ عمرءَ سے آن نااُرامسونے ۔ نی ہمو زیباء انگا لاڈی امباراُس ہرادے ای مُرمُران ہُرسہ کرینُٹ‘ ہراناتغ تے ای خنانُٹ ولے اودے چوک ہلنگ نا ہمت کنے ٹی اسُل متنے ۔ بازوخت دُن ہم مس کہ اوکنے آن بازخڑک بس‘ انداخس خڑک کہ ای دوئے مریفسہ اودے دوہم خلنگ کریٹہ۔ولے داوڑ نا ہراسہ ساہتءَ ای لَجی مرسہ ہز کرسہ پدی مسونٹ:
ولے اوزمانہ ہناداساای فیصلہ کرینُٹ کہ اونا خڑک آ کاوہ و اوڑتون دولخی مننگ نا شیراکی ءِ کیوہ ۔ لجی آ عاشق نابدل داساای دلیر و جیرت مند و انسان ئس مننگ خواواہ:
داساای ہندا پوسکنا ہُلیءَ سوارمریوہ اودے مُسہ چار چابک خلیوہ و سرہلیوہ ‘ مونی انتس مس ہُرینہ کانہ ۔
واہم ای کلان مُست مَش تیٹ جوڑمروکا تماخ ءَ تے آن اسہ سگریٹ ئس جوڑ کیوہ ‘ و لوز ارفسہ ارفسہ جوڑ کیوہ ۔ وختس سگریٹ ءِ جوڑ کننگ اٹ داخس چَس برے تو سگریٹ ءِ چکنگ ٹی امروچَس ئس بروئے :
اے کنا کتاب! نے بناء کننگ آن مالہوای داپاننگ خواواکہ کنا شخصیت نا وجوداٹ امر نی تِرک کریس ‘ امر ناپن کنا دھیان ٹی بس‘ ای نے انت ءَ کن نوشتہ کننگ اُٹ و زندگی ٹی کنا تینا انت منصوبہ غاکو:
_________________________
* ۱:زوڑ: میل *تہ کس تے آن جوڑ مروکو برساتی وباسُنو کوٹ ئس
*۲:بوزا: بئیر نا وڑو اسہ داغستانی شربت ئس

ای تینا مہمان تے تینا دالان ٹی تولفیوہ ہراڑے پوسکن حلال مروکو خڑءَ سینا سِل ءِ خلنگو۔ کباب ءَ تا گَند داسکان بننگ اف۔ دالان ٹی دتر ‘ سوو پوسکُن کشوکا سِل نا گندءِ ۔
ای تینا سنگت ءِ ہنداکوٹی ٹی توار کیوہ ہراڑے ای تولیوہ لکھیوہ خوانیوہ ہراڑے ہر پارہ غا کنا مسودہ غاک شیکی شیکی تالانو۔ ای اودے تینا مسودہ غاتے ہُرنگ نا بید شک آن موکل ایتوہ
حالانکہ باوہ پاریکہ ’’ کہ ایلوتہ مسودہ غاتے داپار ایپار کروکا بندغ نا مثال ہندنءِ دُنکہ کس ئس کس نا جیب ءِ پَٹءِ ‘‘:
باوہ دُن ہم پاریکہ ’’کہ سرلوز ہمو بندغ نا وڑءِ ہرانا کوپہ غاک سَبّرمریر۔ کاٹم ءَ تہ فروالی بھلن و بڑزو پاپاخ ٹوپ ئس مرے ہرا سینمانا اولیکو رداٹ نا مونا تولوک مرے ۔ داسا دانا بخت کہ او سدھا تولوک مرے یا دانگ اینگ شیف بڑز کے تینے ۔ اگہ ای راگ (ڈرامہ )و تماشہ ئس ہُرنگ اُٹ و کنا مونا انداڈول نا بندغ ئس تولوک مرے تو کنے باز خار بریک و ای سوختہ مریوہ:
تینا نوٹ بک آن : ’’کنے گیشتری ماسکوو روس نا ایلو شارتیٹ تینا نظم آتے بنفوئی مریک ۔ دا شارتیٹ مخلوق کنا لمہ ئی بولی ’’آوار‘‘ ءِ سرپندمفک ۔ لہذا بناء ٹی مخصوص لہجہ ٹی ای تینا بارواٹ گڑاس ہیت کیوہ ولدا کنا روسی شاعر سنگتاک کنا نظم آتا بدل (ترجمہ ) ءِ بنفرہ۔ ولے بدل /ترجمہ ءِ بنفگ آن مُہٹ زیات تر جاگہ تے آ مخلوق کنے آن فرمائش کیک کہ نی دافتے آن تینا بولی ٹی گڑاس شعر بنف’’کہ نن آوار زبان ناسازوزیمل و نا نظم نا شعریت آن واخب مننگ خوانہ :‘‘ای فرمائش ءِ پوروکیوہ ‘ ودا ہندن ءِ دُنکہ شعر پاروک ئس شعرءِ گُٹ وسازاٹ پاننگ آن مُہٹ سازئنا تاراتے بے مسخت وڑاٹ چھیڑفک :
انت اسہ کتاب ءَ سینا سر لوز ہم مچٹس انداڈول نا گڑاس اف؟
تینا نوٹ بک آن : ’’ ہراتم ای ماسکو ٹے خواننگ ٹی اسُٹ ‘ باوہ کنکہ زرس پیسہ راہی کرے کہ دافتے آن تینکہ باسونو کوٹ ئس ہل ۔ ہیت دُن مس کہ پیسہ غاک کنے آن خڑچ مسُرو ای کوٹ ہلنگ کتؤٹ۔ یخ ئنا چھٹی تے تدفینگ کن کنے ’’داغستان ‘‘ آ بروئی تما۔کنا بدن ءَ ہموپُچ آک اسُر ہرافتے بنسہ ای باسونی تیٹ ماسکو آ ہناسُٹ:
اُرا غا سرمسُٹ تو ای وڑ وڑ نا نیمون پٹاٹ ولے کنا ہرنیمون ہلنگاو ناقابل ءِ اعتبار ثابت مس ۔ وختس کہ ای تینے دادام اٹ سرجم اختہ کریٹ تو باوہ اوارتمسہ پارے :
’’بس کہ رسول ! ای نے آن بیرہ اِرا ہیت سوج کننگ خواوا‘‘
’’پا۔۔۔‘‘
’’نی کوٹ ئس بہائی کریس یہ نہ ؟‘‘
’’اَخہ۔۔۔‘‘
’’ توپیسہ تے خڑچ کریس ؟‘‘
’’جی ہان‘‘
’’بس ہیت صاف مس‘ اگہ ہیت ئس کہ اِرا لوز اٹ مننگ کیک تو داخہ لوز پوک کننگ و مرغُن وپتَن و سرلوزئس تفنگ نا انت فائدہ؟:‘‘
جی ہاں باوہ کنے اندادے رُمائشت کرے :
واہم چنائس ودی مننگ تون ہیت کننگ ہیل کپک ۔ سرجم لوزئس ہیل کننگ آن مُہٹ اغوں اغو ں کیک ‘ ہنداسبب ءِ کہ بازوخت اسہ بھلو تکلیف ءَ سے آن تدینگ وخت آ چنااوغنگ اٹ مرے تو تینٹ اونا لمہ ہم دا تپک کہ اونا تکلیف انتے؟
انت شاعر ءَ سینا روح ہم چناسینا ڈول اٹ مفک؟
باوہ پاریکہ ’’مَش تہ کاوچَر تے آن اگہ کُرئس پدی اُراتے آبننگ آمرے توکلان مسُت ہرا گڑاخننگک او ہیٹ ءَ سینا مَرغ آکو ہرافک مدامی مون مستی کارہ‘ ولدا ہیٹ نا جند خننگک اوکان گڈ کُرننا مون آ بریک:
جَن یاجنازہ سینا انتظارمرے توکلان مُہٹ ڈہ تروک نگاہ ٹی بریک:
اگہ مَشی و خلق ءَ سے ٹی ڈہ تروک نا انتظارمرے تو کلان مُہٹ لوڑودنزئس خننگک ولداہُلی سوار:
وختس شکاری سینا واپسی مرے تو کل آن مُہٹ ہرا گڑاغا کہ نظرتمک او شکار ی نا کچک ءِ :
(برجاءِ )