Home » پوھوزانت » بندرعباس ءِ سفر ۔۔۔ ذوالفقار علی زلفی

بندرعباس ءِ سفر ۔۔۔ ذوالفقار علی زلفی

(دومی بھر)
“واجہ تو اسٹوڈنٹ ے نہ ئے باریں ترا کِلّ ایت یا نیل ایت” , گاڑی ءِ ڈگی ءَ چے سرجاہ ءْ کمبل کشّانا اسماعیل ءَ منی سرا بمبے دور دات…”اے چونیں گپ انت گڑا من کجا بہ وپساں؟” منی وَ گوشے توارہم گار بوان اَت…”ہیر بیت” کسانیں پسو آتک۔۔۔ما ھاسٹل ءِ دفتر اَ شْتیں , مئے وش بھتی اودا یک مینابی بندری یے نندوک اَت , مارا گوشت ئے ہچ مشکل نہ انت شما وتی بلوچے بروے اے شمے کوٹی انت , کوٹی نمبر 205۔۔۔
من سردیں ساھے کشّ اِت , کوٹی ءَ دہ تھت ات انت بلے مردم ھچ نیست اَت۔۔۔.فریش بوگ ءَ رند من دیم اسماعیل ءِ نیمگا کت “بریں تیاب ءِ لمبا چاہ وریں”۔۔۔.اسماعیل ءَ گوشے سیاہ مارے دیستگ اَت , ھشک بوت۔۔۔..من زانت ایشی ءِ سْرینگ لئیب نہ انت بلے من ہم کراچی ءِ پٹھان ہوٹلانی چاہ وارتگ ات…من وتی دیم 1960 ءِ انڈین فلمانی ہیرو ءِ پت ءِ پیما کت , دراھیں جہان ءِ بزّگ ئے وتی توار ءِ تہا مان گپتک ءْ منت سنت ءِ راہ گپت , سادھیں بلوچ , اسماعیل گڈسر ا پروشت۔۔۔.
جھل ءَ مینابی بچک ءَ وھدے ما چاہ شوھازی ءِ ھال دات آئی ءَ ھما دمانا مئے دیم گپت , “شما مئے مہمان ات , چاہ مئے سرا انت” , بلے , ما درکپتیں۔۔۔
پوہ ! اینچو گاڑی۔۔۔مرکزی سڑک ءَ منی ساہ کشّ اِت۔۔۔ما ہم رمبا ھوار بوتیں۔۔۔مغرب ات پمشکا رش ات۔۔۔میزان میزانا ما یک چار راھے ءَ رستیں۔۔۔.خیابان ساحل , بورڈے ءَ جنوب ءِ نیمگا راھنمائی کت۔۔۔تیاب چوں بمبئی ءِ چوپاٹی ءِ رنگ ءَ کسانیں دیوال ءِ پشتاَ ات , ھرکجا جنک ءْ بچکانی جوڑی سک سکی کنگ ات انت , لہتیں مردم وتی فیملی ءِ ھمراہ ات انت۔۔۔منی ھیال ءَ تہنا من ءْ اسماعیل بے جنین اتیں۔۔۔ھیر ما چاہ ءِ شوھاز ا دیوار ءِ لمبا روان داں یک مزنیں عمارت یے گورا رستیں , اودا یک سڑکے دریا ءِ تہا روگ ءَ ات۔۔۔”اے چی اَنت ؟” منی دپا چے دراتک۔۔۔”قشم ءِ جزیرہ ءَ روگ ءِ اسٹاپ انت” اسماعیل ئدرائینت۔۔۔کشا دوکانے ءَ گونڈوے اوشتوک ات , ما چہ گونڈو جست گپت کہ چاہ کجا رس ایت۔۔۔آئی ءَ مئے دل پروشت “ھچ جاگہ”۔۔۔
اناگاہ مئے پشتا کوکارے چست بوت۔۔۔چَک تراینت , مزنیں جنگ ءْ چوپ اَت , زاہ ءْ بدیانی طوفان چست اَت۔۔۔.لہتیں ورنا وت مہ وت جنگ اِت انت۔۔۔.اسماعیل ءَ وش بوگ ات , جنگ ءِ ندارگ ءَ انچوش گار اَت منی چاہ ئے ہم بیھال ئے کتگ ات۔۔۔جنگ ھلاس بوت ما پدا گام جنان ترّان اِتیں۔۔۔.

اسماعیل ءَ یک وشیں جاھے درچت ءْ نشت۔۔۔مئے دیم پہ دیم اسپیتیں مسیت ءِ ماڑی ءْ مینار ات انت۔۔۔رندا منا خبر کپت اے “دلکشایں مسیت” انت۔ اے بند عباس ءِ کوھن تریں مسیت گوشگ بیت۔۔۔کساس 280 سال کوھن۔۔۔مسیت ءِ پیم ءَ اے میتگ بزاں “سورو” ہم بندر عباس ءِ کوھن تریں میتگ انت چہ مسیتا ھم کوھن تر بلکیں راستیں گپ ایش انت آ شھر کہ مروچی بندر عباس ءِ نام ءَ زانگ بیت آ اولا ہمے “سورو” بوتگ۔۔۔ایرانی دپتر زانتانی رد ا سورو اسل ءَ “سارو” بوتگ ءْ اے چہ ھندوستان ءِ جنینانی پوشاک “ساری” ءَ چے زورگ بوتگ چیاکہ اے بندن ھندی ساریانی برگ آرگ ءِ جاہ بوتگ…بلے۔۔۔من گوں ایشی ءَ تپاک داشت نہ کنگ اوں , سورو شھر ءِ کوھن تریں ھلک انت , اے ھلک ءَ دنیگا “بندری” جہہ منند انت ءْ اے بندری منی ھیال ءَ اسل ءَ ھما بلوچ انت کہ مروچی وتی پجار اش گار کتگ۔۔۔
سورو تچک ءَ بلوچی نام ے , سورو نام مارا باز جاہا گندگ کئیت , انچوشکہ “مند ۔ سورو” , “زرآباد ۔ سورو” , “کنارک ۔ سورگ” , “گوادر ۔ سْر” دگہ بازیں۔۔۔.بلوچ ءِ تاریخ ءَ وھدے دگریں نبیس ایت گڑا انچیں “ساری” کشوکا بیت۔۔۔
بندر عباسا کوھنیں زمانگ ءَ “جرون” ھم گوشگ بوتگ بلے اسل ءَ جرون “ھرمز جزیرہ” ءِ نام بوتگ کہ شھر ءِ نزّیک ءَ انت۔ رندا عرب تاجراں سورو ھم جرون گوشتگ , پرتگالی دز وھدے کاینت آ ھمے جرونا “گیمبرون” کن اَنت۔۔۔.
اے پرتگال ءِ دزاں ھم دگہ جاہ نہ رستگ , بندر عباسا گر داں اورماڑہا مئے گٹا لوپ بوتگاں , واہ ڑے “ھمل جیئند”۔۔۔.کرسٹیانو رونالڈو اگاں فٹبالر مبوتیں من پرتگالیاں ھرابیں زاھے داتگ ات ۔۔۔
ہبدمی کرن ءِ نیاما ایران ءِ صفوی بادشاہ “شاہ عباس” ءِ فوجی جنرل “امام قلی خان” پرتگالی ءَ گوں جنگ دنت ءْ شھرا پچ گریت , شھر ءِ ایرماد بوگا پد بندن ءِ نام شاہ ءِ نام ءِ سرا “بندر عباس” ایر کنگ بیت۔۔۔
ہژدمی کرنئے گڈسرا گر داں نوزدمی کرنئے نیاما بندر عباس ایدگہ بلوچ بندنانی رنگ ءَ “سلطنت آف عمان” ءِ دستا بیت۔۔۔گوش انت , اومان ءْ ایران ءِ ایگریمنٹ بیت بلے رندا مشکت زورانسری کنت۔۔۔ نوزدمی کرن ءِ نیاما ایرانی سپاھیگ گوں انگریز ءِ کمک ءَ شھر ا یک رندیں پدا دزگر انت۔۔۔
پہلوی بادشاہانی زمانگ ءَ بندر عباس ایران ءِ مستریں بندن جوڑ بیت ،چہ ھمدا شہر انچوش دیمروی کنت کہ 10 , 15 ھزار ءِ آبادی مروچی پنچ لکھا برز اِنت…انّو ھم ایران ءِ درآمدات ءْ برآمدات ءِ مستریں بنجاہ بندرعباس انت۔۔۔
دراھیں چست ءْ ایراں پد شاھد “سورو” مروچی ھم اے داستانا ھاموشی ءِ زبانا گوشان انت۔۔۔سورو ءِ قدیمی بازار(مارکیٹ) دنیگا شھر ءِ مستریں بازار انت , سورو ءِ بازار کراچی ءِ کھجور بازارا یات دنت۔۔۔
شد اَ مارا چہ تیابا گلّینت۔۔۔ما جمہوری اسلامی روڈ ءِ یک رستورانے ءَ پناہ زرت۔۔۔عجب رستورانے ات۔۔۔.بگر آشوبی رستوران ات , جنینی آشوب۔۔۔رستوران ءِ کاؤنٹر ا وش رنگیں جنکے نشتگ ات , ٹیبل ءَ ورگ دیوک ہم جنک ات انت , کنور کنوک دراھیں مردین اِت انت…”بگر اڑے ادا وَ سسٹم چپ انت” اسماعیل ءِ کندگ دراتک۔۔۔”جنینی انقلاب زندگ بات” ما ہم کندان گوشت۔۔۔شاما رند پدا ھاسٹل۔۔۔
ھاسٹل ءِ دیم ئیک رندے پدا “استین ءْ پیاپیں ترونگل” مچ اِت انت۔۔۔”یار شپا ایشانی ھاسٹل ءَ جمپ جنیں” اسماعیل بے تاھیر ات , من دیوال ءِ سرا مکّیں شِکّانی نیمگا اشارہ کنانا گوشت “اے انچیں جاگہ ءَ پتر انت دراھیں زند ا جمپ وتی جاہا نشت ھم نہ کنے”…
ھاسٹل ءِ اوتاگ ءَ چہ مارا پیسر چار بچک ساڑی ات انت…دروت درھباتا رند پجار کنوکءَ بوت…یک محمد علی نامے سراوانی ءْ دگہ یک ترک بچکّے مئے سنگت بوت ھاس سراوانی ، بلوچ ءِ دردابلوچ مارایت۔۔۔
شپ گوں وابا تتک , سھبا ما شھر ءِ سئیل ءْ سوادا درکپتیں۔۔۔محمدعلی ھم مئے ھمراہ ات۔۔۔بندرعباس ماڈرن شھرے وَ نہ انت بلے پراہ ءْ شاھگانیں سڑک , مزنیں مزنیں بلڈنگ , آبی رنگے مزنیں ءْ خوبصورت ایں مسیت ءْ پدا گاڑیانی سیلاب وت گوش ایت اے شھر انسانانی وش بوئیں باغ انت , اولسرا من شہراصفائی ءْ نفاست ءِ ڈگری دات بلے وھدے منی سر شھر ءِ شمال مشرق ءِ نیمگا یک بلاھیں میتگے ءَ کپت منی رومانس صابن ءِ گجّانی رنگ ءَ گار بوت۔۔۔تنکیں گلّی , چڈ ءْ کچرا , کسانیں کسانیں لوگ , گلّیانی تہا چلم کشوکیں بندری جنین۔۔۔..بندرعباساہم لیاری ھست ؟؟؟ منی ٹیلگ دراتکاں۔۔۔اے شھر ءِ اسلی مردم بزاں بندریانی میتگ اَت۔۔۔.
بندر عباسا بندری سک کم گندگ کاینت شھر ءِ سرا دری مردمانی رنگ گیشتر انت۔۔۔سورو ءِ کوھنیں بازار ا ابید ایدگہ دراھیں مارکیٹ ءْ شاپنگ پلازہ دری مردماں دستاں آں۔۔۔پدا یک دگہ مصیبت ایش انت کہ داں نزّیک ءَ چے مگندے بندری ءْ گجر جتا زانگ نبنت چیا کہ اے ہم گجرانی ڈول ءَ پینٹ شرٹاں۔۔۔تیاب دپی ھنداں مردین چِرّک بند اَنت ءْ بش شرٹ گورا کن انت بلے شھرا “شھری” ترّیتگ آں۔۔۔بندری چِرّک چہ پنجابی ءْ سندھی ءَ چٹ جتا انت البتہ مشکتی چِرّک ءَ گوں نزیک انت… مردین گیشتر مزدورنت یا سڑک ءِ لمبا سگریٹ ءْ پفک بہا کن انت ۔۔۔
بندری گوشے لیاری ءِ ھند شاہ بیگ لین ءْ کلاکوٹ ءِ مردمانی سیاد انت , چوشیں ھمرنگی۔۔۔ سڑکانی کشا بندری جنین ہم بے کساس گندگ کاینت , اے جنین وتی کلچرڈ گدانی تہا بزاں پراھیں پشک , تنکیں پانچگ ء گل دار چادر ءِ گوما سڑکانی کشا ٹھیّہ ءِ سرا کسانیں کسانیں چیز بھا کن انت۔۔۔لھتیں جنین وتی چمّانی سرا یک دوچی پٹی یے بند اَنت , گوشے دوچی عینک اش چمّا کتگ۔۔۔اے پٹی ءِ دوچ کیچی دوچ ءِ یاتا پِرین ایت۔۔۔.سنگتے ءَ منا گوشت ہرچی ءَ چم ءِ سرا پٹی بستگ بزاں سیر کتگین انت…من باور وَ نہ کت بلے جنینا جست کنگے جرات ہم نہ کت۔۔۔(روان انت)۔۔۔۔۔۔

Spread the love

Check Also

خاندانوں کی بنتی بگڑتی تصویریں۔۔۔ ڈاکٹر خالد سہیل

میں نے شمالی امریکہ کی ایک سہہ روزہ کانفرنس میں شرکت کی جس میں ساری ...

Leave a Reply

Your email address will not be published. Required fields are marked *