رنگ , معنا ۔۔۔ ذوالفقار علی زلفی

ندکار نشتگ ات یا بگندے ھنچوش گندگ پیداک ات کہ نشتگ…کاگد ءْ ندئے دستا ات انت ءْ یک بے نام پگرے ءِ تہا گار ءْ بیگواہ ات…
کسّہ , کسہ , کسہ۔۔۔. سہ رند ءَ برزیں توارئے جت پدا ھاموشی ءِ دنز ءْ مجاں گار بیت۔۔۔
چپ چاگرد ءَ جاک ءْ ککار ات , بازار گرم ات , بدے ءْ بزیر ءِ وھد ات…ندکار ءَ سر چست کت , اینگو آنگو چار ات۔۔۔کس نیست ات۔۔۔
پاد اتک , پدا نشت یا بگندے اوشتات , زانگ نہ بوگ ءَ ات۔۔۔
کاگد ئے دیما کت ءْ نبشت ئے…
“رنگ”
پدا پہک ئے کت , نبشت ئے…
“معنا”
داں دیر ءَ لبز ءِ سرا چمّ ئے سکّ کت انت…لبز چپ بوت “انعم”…
زوت زوت پہک ئے کت…
“کسہ , رنگ ءِ کسہ , کسہ معنا ءْ بزانت ءِ کسہ”…
دل ءَ پگر ئے کت۔۔۔
“انسان ءِ کسّہ”
توار ئے ڈنّ ءَ دراتک۔۔۔
کاروبار برجم ات , دو کس سیر ءِ آرت ءِ سرا جنگ ءَ اِت انت , یک جنکے چوڑیک چارگ ءَ ات , بچک بے ھیالیں جنکّ ءَ ۔۔۔

ندکار ءَ کر ءْ گور ءَ چمشانک دات…تبد ءْ لوار ات , تہاری گیشتر بوان ات۔۔۔
“رنگ گپ جن انت”
کاگد ءِ سرا لبز اتک ءْ نشت انت…دیر نہ گوست کور دیم بوتاں پدا لہم لہم ءَ “جن انت” پش کپت۔۔۔جن انت , زنڈ تَرّات۔۔۔ندکار پچ لرزات , درھینگ ءَ ات , تبد ءْ لوار گیشتر بوان ات ءْ تہاری ءَ ھرگور مان پوش اِت۔۔۔.
چوڑیک گروک ءِ دست بْرگ ءْ چاروک ءِ چم کشّگ بوتگ اِت انت۔۔۔بازار بانورات۔۔۔دو کس ھیک ءِ سرا گپ ءْ تران کنگ ءَ اِت اَنت ءْ یکے نکیک ءَ ھلار کنگ ءَ گلائش ات۔۔۔.
ند کار۔۔۔۔۔۔نیست ات ، ند ھشک ءْ کاگد چنڈ چنڈ ات۔۔۔چنڈ گوات ءَ گون اِت انت۔۔۔.
“جن انت”
چنڈے یے ءِ سرا نبشتگ اَت۔۔۔.