منی شیرانی دو می کتاب

شاعر: قاسم فراز
تبصرہ: شاہ محمد مری
قیمت: 150
پبلشرز: استین شنگکار کیچ
مر شی مں کہ ہماں کتا بہ یچا را کنغا ں آں عجبیں ٹو کاں ژ ہ پُر یں ۔ اے قاسم فرازئے شیئرانی کتابیں کہ اشی کل128تاکنت ۔کل گیست وسہ نظم انتی اوسی او سہ غزل ۔ اشی بہا150 کلداریں او اے اِ ستین شنگکا ر کیچ ءَ چھاپ کثہ۔
اولی عجبیں ٹوک تہ اے کتابہ نا میں : ’’منی شیرانی دومی کتا ب‘‘ ۔ کتابانی ہمنگیں نام مں اولا نیش کثہ۔
بلے دوہمی عجبیں ٹو کا تہ منا ں چٹ حق حیرا ن کثہ ۔ پیش لفظ لکھو خیں برا ہند غا وثی عنو ان چو ش داثہ :’’عطاشاد اپد ۔۔۔قا سم ۔۔۔‘‘بس ہماں وختامنی دفادرکپتہ ’’پزل اللہ‘‘۔۔۔۔ہمے ’’پیش لفظی ‘‘منی سنگت، وا حد بز داریں ۔
بزدار صاحوہ بلوچی؟۔ اغدہ پزل اللہ۔ باورا کنیں کہ مں وثی مثر گئے عینک دو تل کثؤہمے براہندغہ بلوچی پڑ ھثہ گڑ ہ دِ ہ سرپد نویثغانیں ۔ مشرقی بلوچ گنجاں مغربی لجہہ آلکھی او پڑھی۔پراکھر سختیں مغر بی بلوچی ؟؟۔چومئے ملاّ عربی آدلہ حباّ گوں گُٹہ شیراژہ پڑھنت۔ اغرمری اے یا بگٹی اے اردو آ ،یوپی سٹائلا پڑھغا بی تو مڑدمہ کندغ زیری کہ نہ؟۔ بزدار صاحومنا ں تئی ’’لو کل سرٹیفیکٹہ‘‘ سر ا شک کپتہ ۔یا گڑہ مکر ا نئے قبیلہا ں ژہ ’’بز دار ‘‘ نا میں ٹکر ے اسیتں کہ منا ں آنہی باروا سما نہ یث۔ مں وثی دل جوانیا اچّا کثو ہمے پیش لفظ دو دھکا پڑھثہ۔اِنّہ۔ ننہ!!
براہندغیں بزدارہ لفظاں گند یں: گستا ، شبین ، چہر ، ربیتی چید گی ، جہگیر ی ، لچہ ،درانکن۔ غُٹی نا در ائشت ، چید گی، رمز ، پا ر ست ، چید گ پسد ، گیگا نی ، سنچ ، مجا نکی ، سا چا ن ، زیمر یت ، ژ پی ، مٹی و سٹی ، شو نز، در شا نیگ، تند و بند، وزم ، گو ا جا ر ، کا ر ست،با ہینگ، جسیں، ہو د گیر ، تمثیلا تی ، اشا رگی، اوشت ،ڈاہ(Communication) ، در شا نیگ ما نہی (Intellectual) ، با تنی ((Esoteric، رجینک (Paint) ،ہمبندسنچ(vision) ، تند و بند(Composition) ، وزم۔۔۔۔
من حیرانا ں کہ ہمے لفظا نی گواِٹ وہڑادھڑ ی اند را بز دار صا حب و ثی راھہ شو ں کشیّ او پیشگا لے لکھی ۔۔۔۔مں تہ گَٹا ترثؤ وثی پروش منثہ۔
اے آ ر دادئے ہشت تا ک دِ ہ ہمے کتا بئے پجھا راپہ دا ثیا انت۔ بے و ختی ئے دا نہہ او شکایتا کنا ناں کناناں دِہ ،پیلویں چیار پنہ لکھثئی۔
قاسم فرازہ غزل با ز زیبا ، با ز روان ، او زیمراباریں ۔وش اوزیبائیں نظم بے نصیبی او سیا ہ بختیا نی چیذ غ انت۔ لفظ نو خ مورنتی ٹلینگو خنتی ، ندارگ و کر دار نو خنتی ، خیال تا ز غنتی ۔ مطا لعہ اِش بازیں ۔نیں ہمے درا ہیں نیا مت پہ وث شو ں پو ئغی انت شو ں چرِ دیغی انت ، مز ائیں چیلنج ہمشیں۔ وثی خیالانی ٹو ک وانو خاداں پجینغ مز ائیں جو ئے کہ لا نگھغی ۔
اے ٹو کہ گندغ بلے سک ضروری ایں کہ آنہی وانوخ کئے انت۔اَن پڑھیں افسرنت،کہ گلا سے دستا بیث اش و کتاب دیما؟، یا جواں و انتغیں 0.05فیصد یں ہپتا د سا لی ایں پیریں مڑ دانت ، یا گڑہ مئے تعلیمی ادار ہا نی ’’فار غ التحصیل ‘‘ انت کہ ڈگر ی نام اش ہر چی کہ بی علم و علمیت یاز دہ جماعتا زیات نیں ۔یا گڑہ اشی و انو خ عا میں ٹیڑ و گو اش و میتگ و مال جیذی بلو چ انت۔ قاسمہ شاعری کہ مں دیثہ تہ آں پہ 0.05 فیصد والا یا نیں ۔
قا سم شروع کنت ژہ ہمنگیں نظمے آ کہ او ذا آ ں ڈسی کہ آنہی رذوم و ار تقا بس او شتا ثہ ۔ آ ں نَیں سمبر ی ، نَیں رُذی،اونَیں گیمر ی ۔ اے مڑ د و ثی ہم قو ما نی ڈولا وثی دوستی ایں چیز اں آ ڈو داث، وثی عمر ہ جنت پہ جہدا ،پہ ودارا، بلے آنہی و طنہ لافافلاسفر و زا نند غانی دراہیں پیش گوئی درو غہ بنت ،اومنز لئے قلو پتر ا دستہ نیئے ۔
’’ من ماسٹر‘‘ زبردستیں نظمے کہ سماجہ لافا جیرت و برداشتہ نہ ویغئے بے بخت ایں نشکاں ڈسی۔ آنہی ارماناں پُریں نظم’’ فدا شہید چارراہ‘‘ جائی کہ پڑھغہ چیزے۔ باز سنجیدہ ایں۔باز ڈکھی کنت۔
بلے باور نیئے کہ ہمے شیئرہ واژھیں قاسم جان ہمنگیں شاعری اے دِہ کنت کہ وانوخ پوہ مہ ونتی۔ مں پکاں کہ مخلوق اے کتابہ و انغا رند ضرور گشنت کہ قاسم فراز حیرانیانی صندوخے ۔آنہی نظم ’’ من پروفیسر سیسی فس‘‘ اشی یک جوائیں مثالے، اشی آضرور پڑھیں:
من دریا آ
کوہن و قدیمیں
دارئے جوڑیں شیلفے آچہ
ڈن کشاں
لوٹاں دریا آبواناں
نِیں؟وانوک ! دیما مہ گوئز ۔ ہمے بڑزی پنچیں ٹپایاں پڑھ ، گندتہ چی اے پوہ بی اے ؟۔۔۔۔۔۔شاید آں، دیمی نظمہ اندراوث نتیجہ ءَ کشی:
’’ اے لچہ آہچ مان نیست‘‘۔
او اغرلچہ آہچ مان نیست تو گڑہ ۔۔۔؟ چوں بہ کنوں؟۔۔۔۔۔۔ من وثی بارہاتہ چو گوئشتہ:
’’ سبزیں دستانی زردیں لکیرانی وانگ کجا،
من کجا!‘‘۔

خیالانی بژلتی بانثر لتی دیثئے؟۔ قاسم جانہ خیال زالے دراژیں مستغیں ملگورانت کہ اے مڑدا اشانی گی ایشغا پہ مہر گڑھی سررند پہ کارنت۔
بلے او ذکہ خیال و لفظ ہڑدوئیں ہم تپاک و ہم صلاح بنت، او ذا آنہی شاعری شیئراں جنت، ٹلینگی ، دلاں سیراف کنت۔’’ بوسگا آں ترا‘‘ آنہی ہماں نظمیں کہ شہرانی مڈل کلاس سہ دھکا ’’ لاھول‘‘ پڑھنت واننتی ۔ بلے آں ہمے عریانیت و کیندری اندرا دِہ یک ٹُکرے ہمنگیں داث کہ مئے دراہیں بلوچ دانشورانی نمائندگی ءَ کنت:
جنگئے اے موسما
بمب و توپانی گبھاراں جسکینتغنت
درشک و نیل بو میں زرِ
جیڑ گا آں دلا
من اے لچّہ نویس
اَرزُنئے دان ءِ نیاد ءَ بہا ہم نہ باں
دمک دمکاّ شرابی ءِ ناما گوزاں
ہر کجا بے دراں
پہ منی لاش ءَ بازار ءَ کئے بند کنت؟

ایذاگندئی تہ چنکس ڈونگھا فکر یں مڑدے ۔ چنکس ہیڑت نغاہیں براہندغے۔ او چنکس حقیقت پسندیں دانشورے۔قاسم خیالانی بھاگیائیں واژہے۔ مشاہدہ ہیڑت ، لفظ غلام:
پچ کں دروازگانی دیوالاں،
چول جنت درچک و لُڈگائنت زِر،
آف ہچ جانہ سوچیت دست آسہ ترنہ بیت
لفظ دیثغنتے ؟ اغدہ گند !! بینغ مہسک کسے ءَ چو بیان کثہ؟۔
تو کہ رنگانی، وابانی سازندے ءِ
شیر کنیں گا لوارئے ہدا بُندے ءِ
زیمرین ئے تہاری ئے دمکاں مدام

بلے خیال ؟ یا ھذا ! قاسم جانا خیال و فکرئے دشتا بے سمتی او بے تکی آژہ رکھ ۔ اے کتابہ اندراتہ داں آخر ءَ سما نہ کفی کہ قاسم فراز تاں ٹولی آ اواریں۔ وختے گندئی تہ وثار جام درک ءَ لڈ ءَ اوارکنت ، وختے گندئی نہ اوذادِہ نئیں۔نیلیں آزمانہ کاغذے ڈولہ دِنغہ لوٹی، بلے شوں ؟۔ کہ آنہی گونچانا نئیں تیر مانیں ،نئیں آنہی کلانچا اسپرے استیں۔ پُرس تاں لوغئیں او اے سنگت دستاں تاں لوغہ داری۔
بلے،راستیں ٹوک اشیں کہ حالتانی ہمے کنفیوژنہ لافا مئے سجہ ایں دانشور زیندغنت۔ ایذا واچنڑانی باورنے۔ گندئے روش ٹکا ژہ شافنت تو مڑدم شموذاں ایر گواثے پولی گندی ،بلے یکدم بے سما اوبے ڈا ہا روش ٹبی شیموش گرنت۔غداری ئے سرٹیفیئنت کہ ژہ قرناں بہر بیغایاں، ہچ نہ کُٹنت ۔ بے بختی ئے براث کُشی، سیاہیں جمبر بیثؤ مئے سراں گُڈغیں۔ زورا خانی تلی ڈوبراں چیتاڑاناں روغاں۔ راہ نے ، راہ بر نے۔ قاسم فراز مئے ہمے جاورانی زبردستیں نمائندگیں شاعرے۔
مں پیشا گوئشتہ کہ آنہی غزل دِہ ہمکھر زوراخیں چو کہ آنہی نظم ۔ بلوچی صنفانی ہچ چی اے اے کتابا اوار نئیں۔