وت مہ وت ۔۔۔ ضیاءشفیع

بچار اے جوانیں وڑے نہ انت۔۔۔۔۔۔۔۔نہ کہ تو شر کنگاے، من ترا سرا ہم سرپد کرتا۔ انوںہم گشگ لوٹاں کہ وتی قبلہ راست کن۔۔۔۔۔۔۔ چوں راسراں ہرکسا گنوک کنگ پہ تو عیبے۔ بلیں ترا کئے سرپد بکن۔۔۔۔۔۔ تو کجا منی گپاں سرپد بوت کنے، چیا کہ تو اے کدی زانت نہ کنے کہ دلانی درد مردما چون بے چاڑ کنت۔۔۔۔۔ چیا کہ ترا دلہ جند نیست، نہ تو ۔۔۔۔۔۔ من چے بگشاں ، ترا منی گپ ہچ اثر کنگانہ انت۔ نہ کہ تو منا بنی آدمے لیکے۔۔۔۔۔۔۔ تئی نگاہاں من یک بے تواریں بت ے آں کہ دور ما جنگلا یک پرشتگیں مندر ے میار انت۔ نہ منا پجاری ے ہست نئے کہ لوٹوک۔۔۔۔۔ منی بستار دگے چے بوت کنت بگش نا۔۔۔۔۔ ۱             بلیں ترا انوں سرپد بوھگ لوٹیت کہ تئی وھد ہلاس بوتا۔ انوں نئے کہ کسے پہ تئی رنگا عاشق بیت نئے کہ پہ تئی دیدارا روچ و شپ سڑکانی سرا تئی وداریگ بیت۔۔۔۔۔۔۔ چیا کہ تو مردم باز رد دات، انوں کس تئی سرا باورنہ کنت نئے کہ ترا پہ وت زوریت۔۔۔۔۔۔ ترا یاد بیت اولی رندا کہ تو گوں دلشاد مہر کرت ، آئی ترا انچو داشت کہ کسے وتی یکوئیں زھگا ہم چو ں دست و دلا نازینت نہ کنت۔ بلیں تو۔۔۔۔۔؟ دلشاد ہم رد دات پہ سمیر ے واستہ۔ دلشاد ے ہرابی ہمیش ات کہ آئی ماس دگرانی گسا پہ رزان ے شودگ و گدے کارا شت۔۔۔ بلیں تو اے بگش تو سمیر ہم یل دات۔۔۔۔۔ سمیر تئی چے ہراب کرت۔ آئی وتی ماس ہم دیم دات پہ سانگ بندیا۔ بلیں تو۔۔۔۔۔۔۔ پہ زبادے واستہ سمیر ہم یل داست۔ ترا گوں زبادا ہم دلی دوستی نیست انت۔ ۔۔۔ بس تو پہ ہمے اوستا کہ زباد ے پس دبئی والاے۔ دگہ نہ منا مپتں سینٹ ے رسیت۔ تئی اے وائش ہم پورا بوت انت۔ بلیں تو بے تواریں زباد چیا سجیں میتگ ے دیما بے شرپ کرت ۔۔۔۔۔۔۔۔بگش نا۔۔۔۔۔۔ ترا منی جستانی پسو دیگ لوٹیت۔۔۔۔۔ اگاں تو انچوہاموش بوت ے۔ گڈا برو من و تو مرگ و زنداں ۔۔۔۔۔۔ نئے تو منی نیمگا بیا نئے من ترا گندگ لوٹاں۔
پدا ہم من مجبور اں من زاناں تو ردی باز کرتا۔۔۔۔۔۔ بلیں چون کناں، بے تئی ہمراہ داریا منی اے جہان و آ جہانا زندگ بوھگ ھرامیں۔۔۔۔۔۔۔ دست بنداں۔ پہ ھداے ناما دومیانی دلے رنجاں منی سرا بڈ مکن۔۔۔۔۔ منا تئی سوگند کہ من برداشت کرت نہ کناں، نئے کہ منا رسوائی دوست بیت۔۔۔۔۔۔۔ زی تہ وت دیست تئی دیما دلشاد ے گہارا چے گشت۔ ” تو منی براس ے زند برباد کرت، شہ تئی وجہ منی براس نشہ ے تہا کپت۔ شہ تئی وجہ منی براس نہ گسی انت نہ کہ بازاری، منی دعا انت تو رسواہ بہ بئے، سجیں میتگ تئی سرا بہ کندیت۔ شہ شرما تو شہ گسا ہم درات مکنے،“۔۔۔۔۔۔۔۔ بلیں تو۔ من چے بگشاں انگت ہما رسواہ۔
تئی کردانی وجہ شہ منی دزگہاراں منا یل دات۔ کسے منی چارگا ہم نئیت۔ پہ کلو و قاصد من دم برت۔۔۔۔۔ اے درست شہ تئی وجہ بوتگ۔ انگت کنگ لوٹ ے بکن۔۔۔۔۔۔۔۔ بلیں من ترا اے سرپد کنگ لوٹاں کہ بچک درا شہ کرداراں سرپد انت۔۔۔۔۔ کسے پہ یک چم ے اشارہ وتا پرتئی سرا قربان کرت نکنت۔۔۔۔۔ نہ کہ کسے ترا چاریت۔ ڈن ے مرماں بل تئی وتی ناکو زھگ شامیر کہ تئی سرا گنوک ات۔ چے چے تئی واستہ نہ کرت ے۔ بلیں تو۔۔۔۔۔۔؟
بس انت انوں گوں من چشیں لبز نیست کہ ترا من راستی ے سکین دات بہ کناں۔۔۔۔۔ بس انچو گشگ لوٹاں کہ تو داں کد گوں وتی آسکی گردن، قبلیں بوران گوں سوریں کلک و گوں تچکیں ماپراں بچکاں رد دات کن ے۔۔۔۔۔؟ اے درست بے وفا انت۔ کسی رنگا گوں کسا وفا نہ کرتا۔۔۔۔۔۔ نہ کہ تئی شیپگیں پونز و کتابی چم تئی وتی باں۔۔۔۔۔۔۔ تو کور بئے، بزگانی دلانی لاڑ پہ تو جوانیں روچے نیارنت۔۔۔۔۔ تو وت گندے، مچ مھلوک گندیت،۔۔۔۔۔ او۔۔۔۔۔ وآ ہم گندانت کہ تو آیانی دل پروشت انت۔ ۔۔۔ برو تو منا درکار نئے۔ نہ من ترا لوٹاں۱۔۔۔۔۔۔۔ من ترا۔۔۔۔۔نہ۔۔۔۔نہ۔۔۔۔۔ نلوٹ۔۔۔۔اں    سیمک آدینک ے دیما گوں وتی جندا ہبرا ات و چم ے ارساں کیل اتاں۔۔۔۔۔۔۔۔۱۱۱۱