پوسٹ ماڈرنزم

پوسٹ ماڈرنزم مردم دژمنیں لیکھے، اے مردما  را چہ مردمی کٹّا در کنت۔ ہرکس کہ گوں ایشی  پاداں روت آ وتمن و وتواھے جوڑ بیت۔ پوسٹ ماڈرنزم بلوچی لبزانکارا ٹوھیں تاوانے دات کت کنت البت ایشی آپہ لبزانکا ھچ نپ و سیت گون نیست۔ لبزانکا کہ تاوان رس اِت بزاں چاگرد ھم تاوانمند بوت۔ لبزانک و چاگرد ئے سیا سیادی انچیں سیادی ئے کہ ھِچبر پرشت نہ کنت۔

 

پوسٹ ماڈرنزم لبزانکا چہ سیاست، نپسیات، شھزانتی، گْزرانک و ایندگہ چاگردی او سیاسی لیکھاں دور دارگ ئے نام اِنت بزاں ایشی منّوگر گش اَنت کہ لبزانک یک آجو او جتائیں چیزے بہ بیت۔ (بلے اگاں چوش بہ بیت گڑا لبزانک لبزانکے نہ مان ایت پرچا کہ لبزانک ئے جند چہ ھمے چاگردی چست و ایرانی سببا ودی بوتگیں چیزے)

 

بلوچی ئے مزن نامیں ندکار وتی شراب ورگ ئے  سر ا پھر بند اَنت او مدام اندری مارِشت، اندری جزبگ، وجودیت، وحدت الوجود او دگہ وڑ وڑیں بے سیتیں چیزانی نیمگا لس وانوکا گٹّ کن اَنت۔ اے وڑ ا نوک باھند وتی مارگ ئے بور ہ گیشتر ھما نیمگا تاچینگ ئے  جھد ا کن اَنت او ھمایانی رندگیر جوڑ بنت او گِندئے پوسٹ ماڈرنزم ئے چشمک ھرکسی کہ چمّاں نِشت آ ترنداپا ھم درمان گشگ و ورگ ئے چکّ ئے پد نہ بیت۔

پوسٹ ماڈرنزم ئے باروا رامین بلوچ ئے اے گپ منا سک دوست بوت کہ “پوسٹ ماڈرنزم سکّیں سِلّیں لیکھے۔۔۔ ایش تضاد ا پْرّ اِنت، ایشانی اوّلی گالرد کنپیوڑن ئے آماچ اِنت۔ ایش گش انت کہ “راستی نامیں شے نیست” اگاں راستی وجود نہ داریت گڑا اے گالرد کہ “راستی نامیں شے نیست” چون راست اِنت؟”

 

بیا نوں منیر مومن ئے شئر ا ٹپّاس ایں:

 

ایوکی آ بدل نہ کنت گوں منا

گوں منا ھور بیت و تھنا بیت

 

منیر ئے اے شئر پوسٹ ماڈرنزم ئے گْڈّی سیمسران اِنت او اگاں مانا یے بہ داریت ھم ھِچ مانا نہ داریت۔۔۔ منیر ئے  پیشیگیں کتاباں چوشیں شئر باز کم گندگ بیت بلے بیا کہ نوکیں کتاب چہ اے وڑیں شئراں چکار اِنت کہ وانگا وشّ انت بلے سکّیں بے مانا او  سبکّیں شئر اَنت۔

 

ایوکی چوں بدل بیت؟ ایوکی چیزے وَ نہ اِنت۔۔۔ ایوکی زرّے زاناں منیر آئی آ بدل دنت ءِے؟

“ھور بوّگ و تھنا بوّگ”

اے گپ ھچ مانا نہ داریت۔۔۔ دو مردم وت ماں وت ھور بنت، آ چوں تھنا بنت؟

 

بلوچی زبان ئے مزن نامیں ندکار اے آر داد ھمیشی ئے  منّوگر اِنت۔ داد یک جاگھے آ گشیت “ماڈرنزم ئے  اے گپ راست نہ اِنت کہ نوکی وتی کوھنیں لبزانکا نہ منّ ایت” او  دگہ جاگھے گشیت “ھر ھما ندکار و شائر ا ما نوکی ئے ندکار گشیں کہ چہ وتی گوستگیناں جتا او یکتا نبیسگ ئے  جھد ئے کنت۔” داد ؤئے اے دوئیں رِداں وت ماں وت دور دور اسیادی نیست، دوئیں رِد یک دگرے ئے بگیری آ َ کنگا اَنت۔ اے لیکہ منّوگر سک مانگیشّ اِتگ اَنت

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*