ہڑتال

نیپلزا  ٹرام ئے کارندہاں ہڑتال کتگ ات ۔ ریویرادی کیایا آ چے سرا تا چا سرا ہشکیں کنڈیکٹر ، ڈرائیور و اوشتاتگیں ٹراما ابید دگہ ہچ گندگا نیاتک ۔ وشدل و گپّوئیں نیپلزی آنی یک مزنیں مچّی یے پیازادیلاویتوریا آ مچّ ات ۔ چہ ہمیشانی سر ئے برزی آ و پارک ئے سیمانی سربری نیمگا یک فوارہ یے ئے آپ ئے ایرریچ چو تیزیں زہمے ئے زہا ترپگا ات ۔ او ہمے مچّی ئے دیم پہ دیما مردمانی دگہ مچّی یے اوشتاتگ ات کہ اے شہر ئے ہما مردم ات انت کہ اشاں وتی وتی کارانی سر ا رؤگی ات ۔ ہمیشانی تہا لہتیں دکاندار ، درزی و دگہ مزدور ہوار ات انت کہ دل ئے مئیلا ہڑتال کنوکاں زبرّگ و ککرّگا ات انت ۔سکّیں نہ وشیں حبر یکے دومیگا کوکّار کنانا گشگا ا ت انت و دومی دیما چہ وتی دستانی اشارہاں ہم کست و کینگا درشانگا ات انت ۔ چوناہا نیپلز ئے مردم ہمینچو کہ گوں زبانا حبر ا بلد نت ہمنچو وتی دستانی اشارہاں گوں حبر کت کن انت ۔
چہ زر ئے نیمگا گوات تیز تیزا کشّگا ات و پارک ئے برزا شتنکیں بام ئے درچکانی تاک و شاہڑ ٹیٹ چیکّ ورگا ات انت بلئے اے درچکانی بنڈ گشئے چو تمردیں لوسی ئے پاد ا ات انت ۔
ورنا و نیپلز ئے نیم برہنگیں چکّ گوں وتی کندگ و کوکّاراں اے دیم و آ دیما تچگا ات انت ۔
شہر ئے جند چو سڑتگیں عکسے آ درا بوہگا ات روچ ئے زبریں برانزاں سرجمی آ وتی امبازاں زرتگ ات و یک دردناکیں سُرے نالگا ات ۔ زر ئے سبزیں چول وہدے گوں تیاب دپ ئے کوہاں ٹکرّ ات انت تہ ہمے جاک گشئے چو دمبورگ ئے تاراں یک شیرکنیں آوازے ودی کنگا ات ۔
درائیں ہڑتال کنوک بزّگی و بیچارگی آ اوشتاتگ و یکے دومی آ چارگا ات ات۔ کس حبری نہ ات بس برے برے پہ مصیبتے مچّی ئے نعرہ یے ئے جوابا دےئگا ات انت ۔ چہ ہمیشاں لہتیں پارک ئے سیمانی سرا سر کپت و اوشتاتگیں مردمانی مچّی ئے پشتی نیمگا چار اِتے تہ آہاں ہمے سما کت کہ دومی دیما شکاری ئیں کچک اوشتاتگ ات انت و اے وہدی آ چو بزّگیں تولگا ہمے شکاری ئیں کچکّانی نیاما درا بوہگا ات انت ۔ اے حبر وَ تچک ات کہ اے وردی پوشانا ہر وڑا وتی حبر منّارینگی ات ہمے واستا آ گل یک ردا اوشتاتگ ات انت و ہمے حبر ا ہڑتال کنوک سکّ بے وار کتگ ات انت ۔ بلئے مچّی ئے تہا ہم سرپدیں مردم است ات ، آ آرام آراما سگریٹ کشّانا دومی دیم ئے اوشتاتگیں مردماں سرپد کنگ ئے جہدا ات انت ہما کہ چو دریا آ مست چو ل جنان ا ت انت ۔
،، مئے حبرا گوش کن ات ! اگا ں مردمے وتی چکّاں چنڈے نان ہم دات مہ کنت گڑا آ چے بہ کنت ؟،،
میونسپل پولیس ہمے حاترا دو دو سئے سئے نفرانی ٹولیاں بہر ات انت کہ ہڑتال کنوک رؤآ کنوکیں گاڑیاں پرشت و پروشت مہ کن انت ۔ آہاں گوں کسّا کار نیست ات ۔ ہر وہدے کہ ہڑتال کنوک یا دومی دیما اوشتاتگیں مہلونک ئے مچّی ئے نیمگا زیادہ کوکّار و جاک بوت یاکہ دستانی اشارہ زور بوت انت گڑا پولیس ئے کار بس ہمیش ات کہ دوئیں دیم ئیگا ں گرو دار بہ کنت ۔ کارا بینری ئے یک ٹولی یے گوں وتی توپکاں نزیک ئے ماڑیانی دمکاں چو دزّیں تولگا ٹپّ اِتگ ات و ہمے ودار ا ات کہ ہروہدے جنگ و مڑ بنا بیت گڑا آ بیچّا دور کن انت ۔
گوں وتی سئے کنڈیں کلا، لکّیں پشک و حونی رنگیں دولکیر والا تنکیں شلواراں اے ٹولی سکّ ترسناک ات ۔
کوکّار و جگّا ، مشت و مکونڈی ، گرودار ، شگان و پیگور ،دراہ یکپارگی آ ہلاس بوت انت ۔ سرجمیں مچّی یک نیم وابیں روحے یے آ مان پتات ۔ ہڑتال کنوک دراہ ا بزّگ بزّگا کنزانا یکے دومی ئے نزیکا اتک انت و درائینانی دپا پہ بزّگی یکپارگی یکیں آواز در اَتک ،
،، فوج ،،!
پہ تژن ہڑتال کنوکانی دیما سیٹّی جنگ بوت و ہمے سیٹیانی تہا اشانی آواز ہم بیگواہ بوت ۔ گوں سیاہ چکیں پوشاک و پناما کلاہے آ یک مردے درا بوت کہ فٹ پاتھ ئے سرا وتی پاداں گوں زورا درہکّ درہکّا جنانا پیداک ات ۔ کنڈیکٹر و درائیں ڈرائیور میزاں میزانا چہ مچّی آ درآہان و دیم پہ ٹرامانی نیمگا روان بوت انت و لہتیں چمیشاں گاڑیانی سرا سر کپت ۔ چہ مچّی ئے تہا گوزانا مہلونک ئے تژن و تیہارانی پسّواں دیانا آ گیشتر نیم جان و بزّگ بزّگ گندگا آہگا ات انت ۔ کوکّار و جگّا ہلاس بوتگ ات ۔
چہ سانتاچولیائے تیاب دپ ئے نیمگا گوں ہاکی رنگیں وردیاں سپاہیگانی لشکرے تیز تیزا آہان ات ۔ سپاہیگانی گام درہکّ درہکّ کنان ات انت و چپّیں دست اِش پہ تمردی چنڈان ات انت ۔ گندگا گشئے آسن ئے سپاہی ات انت و چو لیبوکا نزور نزور ات انت ۔ ہمیشانی سروک یک برز بالادیں وشرنگیں افسرے ات کہ بروانے برزی نیمگا چست ات انت و لنٹے بز بزا جہلا لونجان ات انت ۔ ہمیشی ئے کش ماں کشا دگہ یک تمردیں مردے سکّ باز حبرکنانا دستا برے یک دیمے شانگا ات و گشئے زمینا درّانا پیداک ات ۔
مچّی چہ گاڑیاں پد کنز اِت۔ سپاہی چو مہرگاں یکپارگی آ شنگ و شانگ بوت انت و گاڑیانی نزّیکا ہما جاگہ آ کہ مچّی جم اِتگ ات روان و اوشتان دراج کلاہیں مردکا ایندگہ مستریں مردم کہ آنہی ئے چپّ و چاگردا مچّ اِت انت دراہ چو گنوکاں دست شانی و کوکّار ا لگّ اِت انت ۔
،، گڈّی رندا ۔۔۔۔۔۔ بس نوں گڈّی حبرا گوش دار اِت ۔ ،،
افسر یک دیمے اوشتاتگ ات و وتی بروتاں تاب دےئگا ات ۔ ہما مرد گوں وتی دراجیں کلاہا ، کلاہا چنڈینانا تچان تچانا اتک ہمیشی ئے کرّا و گوش ئے تہا کوکّار کت و حبرے گشتے ۔ افسر ا ہمیشی آرا روکّ روکّا چار اِت و پدا پاد اَتک و اوشتات سینگے مکّ کت و کوکّار کنانا حکم دےئگا لگّ اِت ۔
ہمے دمانا سپاہی تچان تچانا گاڑیانی پلیٹ فارماں لکّ کپان بوت انت ۔ ہر پلیٹ فارمے ئے سرا دو دو سپاہی اوشتات ۔ درائیں ڈرائیور و کنڈیکٹر یکّ یکّا ایر کپان بوت انت ۔
مچّی آرا اے حبرا سکّ تور اِت ۔ دراہ کوکّار دےئگا لگّ اِت انت و سیٹّی جنان بوت انت بلئے زنڈیں دمانے آ پد درائیں آواز ہلاس بوت انت و دراہ ترس و بیمّ ئے آماچ یکّ یکّا جنزان دیم پہ اوّلی گاڑی ئے نیمگا روان بوت و مچّ بوہان بوت انت ۔
اودا گاڑی ئے ٹیرانی دیما دو انچ ئے پسّندا یک ڈرائیور ے دراج دراجا راہ ئے سرا دل بلاپا تچک ات ۔ سپیتیں سرے پچ ات و رنگ و دروشما سپاہی یے درا بوہگا ات بلئے چہ زہرا بروتے پیچ ورگا ات انت و چمّے آزمانا سکّ ات انت ۔ درائیں مچّی ئے چمّ ڈرائیورا سکّ اِت انت کہ ہمے دمان ئے جندایک شادو رنگیں بچکے آ دور کت و ہمے ڈرائیور ئے کشا اتک و تچک بوت گوں پدا انچو یکّ یکّا دگہ بازیں مردم آہان و تچک بوہان بوت انت ۔
سرجمیں مچّی وت ماں وتا سک سکا لگّ اِت ۔ لہتیں مردم پہ ترس و لرز چہ بی بی مریم آ دعا لوٹگا لگّ ات انت ۔ لہتیں چہ زہرا دستاں لتارگا لگّ ات انت ۔ زالبول آواہ و زاری آ ات انت و گونڈیں زہگ چو پپکّا اے دیما آدیما لپور گران ات انت ۔
دراجیں کلا والا مردا گوں ترندیں گالوارے آ کوکّار کت ۔ افسر ا آنہیارا چار اِت و پدا کوپگے سرینت انت ۔ اے سپاہیگ ہمے واستا دیم دےئگ بوتگ ات انت کہ ٹراماں گوں ڈرائیورو کنڈیکٹراں بیار اَنت بلئے اشاں مڑگ ئے حکم دےئگ نہ بوتگ ات ۔
ہمے دمانا دراج کلاہیں مردک گوں دگہ برّے چاپلوسیں کارندہاں چہ مہلونک ئے مچّی ئے شما دیم پہ کارابینریانی دیمگا رہادگ بوت۔ کارابینریاں انچو راہ ئے سرا تچکیں مردمانی سرا دور کت کہ آہاں چداں ہر رنگا پاد کنگی انت ۔
نوں کشّ و چیلّ بنا بوت بلئے ہمے دمانا درائیں چاروکانی مچّی شنگ و شانگ بوت۔ کوکّا روزاری بوت و دراہ تچان بوت انت ۔ پناما کلا والا آ وتی کلا کشّ اِت و برزا چگل دات ۔ اے اوّلی مردم ات کہ چہ درساں دور تریں ہڑتال کنوک کہ زمین ئے سرا تچک ات ہمائی ئے کرّا شت و تچک بوت گوں و آنہی ئے بڈّے ٹپّ اِت و دلبڈّی دےئگ ئے لگّ اِت ۔
یکّ یکّا درائیں مردم راہ ئے سرا تچک بوہان بوت انت ۔ گشئے نوں درسانی پاداں جواب داتگ ات ۔ ہما وشدلیں و گپّوئیں مرد کہ دومنٹ سر پورا اے مچّی آ ہورا نہ ا ت انت زمین ئے سرا تچک بوت انت و گوں یکے دومیگا کندانا دپا چوٹ کنانا افسرا را باریں چے چے گشگا ات انت ۔ افسروَ گوں دراج کلاہیں مردکا گپّ و ترانا گیروشگ ات و گوں وتی مصنوعی بچکندا وار وار وتی دستا ہمائی ئے پونز ئے چیری نیمگا شہارانا وتی سرا لتارگا ات ۔
دگہ لہتیں مردم پدا زمین ئے سرا وپسان بوت انت ۔ زالبولاں وتی سپت و ساچی ہم دور دات انت ۔ گونڈ گونڈکیں بچکّ چہ کندگا لاپ لیٹ ورگا ات انت ۔ شرّ شرّیں وش پوشیں مردم ہم چہ دنز و ہاکا بار بوہان ات انت ۔
دیم دیم ئے گاڑی ئے پلیٹ فارما پنچ سپاہی ٹیرانی نزیکا گوں سیمّاں لچّ اِتگ ات انت دانکہ کسے آہاں چوداں دور کت مہ کنت ۔ آہاں یکّوئی دیمی سر کشّ اِت و پدا پُشتی پد کنزاِت انت ۔ اے ہم چہ کندگا پوست ات انت ۔ نوں ہچ رنگا آسن ئے سپاہی ئے رنگا نہ ات انت ۔
۔۔۔۔نیم گھنٹہ آ پد درائیں ٹرام نیپلز ئے دگاں چلیسک چلاسک کنانا رؤآ ات انت و پلیٹ فارم ئے سرا جنگا سوبین بوتگیں لشکر اوشتاتگ ات ۔ چہ گلا درسانی پاد زمینا درنگ ات انت و جہلا ہم سوبین بوتگیں لشکر ترّ و تاب کنان ات و وش وشا چہ مردماں جست کنان ات انت :
،، بیلیتی ،،؟!۔
مسافر یکے دومی آ چمّک جنانا بچکندانا پہ وش تبی دل ئے تہا نرنڈانا آہاں سہریں و زردیں نوٹ دستا دیان ات انت