گرندئے شاعر

نوکیں بلوچی شائری ئے سروغان ، مزن نامیں شاعر و رائٹر ، دپترزانت ، دیمروی پسندیں سیاستکار و کواس ، شوھاز کار میر گل خان نصیر ؔ مروچی گوں مانیست ایں۔ بل آئی ئے یلہ داتگیں میر ات و مڈی گوں وتی پیلویں تواناں گوں ما موجودیں۔
گل خان نصیرؔ ئے پجار و جند ئے ہمکر باز پہناذ انت کہ آنہانی چاگرد کنگ اَش منی وسا درنت ۔ اگاں کسے یک پہناذے جھلانکیانی نیاما سوج و بیچار بہ کنت گڑا ہمکر تھی پھناذسھرا و پدربنت کہ ہماہانی دہ یکے ایکھویں پجار ے گندغ بیت۔ اے نوشتانگ ئے نیاما من نصیرؔ ئے شائری ئے پہناذہ بارہاگپ کنگ لوٹاں۔
نصیر ئے وتی شائری ئے بارہا اے ھیال ات کہ شائری یک ھدا ئے داتگیں او الہامی جاورے ۔1983آ سینائی گیچگ ئے دیم درائی دیوانا نصیرا گوشتگ ات۔ ’’شائری یک ھدا ئے داتگیں تاکتے ۔ لاہوتی زور و الہامی جاورے کہ آ نہیا اگاں ما وحی گوشت نہ کھنوں۔ گڑا ہ وحی ئے ڈولا گوشت کھنوں آنکہ شائر ئے دلا نازل بہ بیت و شہ شائر ئے زوانا بے دودیں لوزانی ز نزیرے ئے زیملی روانی آ گوں یک وزن و ردبندے آ درشان بیت۔ اے یک چوشیں المے کہ آں شہ ھدائی پلو ابے استادے آ شائرارسی۔
(میں اور میرافن ، گل خان نصیر اور شخصیت۔ وتاکدیم 17)
شائری اسلا مڑدمئے وتی زات ئے وسیلہ آ وتی سماج ئے پکر و پھمانی درشانی یے ۔ بلے اے درشانی ئے موہ ھما دیر و جھل گندیں مڑداں رسی آں کہ شہ ھماں سماج ئے دری و اندری سُر پُرا زانو گرنت۔
سماج بستگیں چیزے نہ ایں۔ بلکن آں ھر وھدگوں بدلوکیں جاوراں بدل بیت ۔ شہ سماج ئے اے سُر پُر ا سماجی کانون و رھبند پدر بنت۔ شہ اے سرپر ئے اسراانسان دری راستیانی و سما آ زیر یت۔ ہمے دری معروضی راستی انسانی رژنا سکین دینت او پہ ر ژنا اے دری اندری کار ورد عمل ھیالانی درشانی ئے سوب بیت۔مکسدایش ایں کہ ھیال ئے درشانی ہمے رد عمل ئے لازمی آسرانت ۔ اے آسرھندے آ شائری ڈولاھندے آ مصوری ڈولا او ھندے آ دومی ازم کاری دروشم و رنگا سھرابیت۔ ہمے ھاتر اماگوئشت کھنوں کہ شائر ی الہامی یا ھددادیں چیزے نہ انت۔ بلکن اے سماجی کار پد ئے بھرے ۔ واجہ گل خان نصیرؔ ئے کر ا اے سماجی کار پد ’’آمد‘‘ ئے سنچ آ سوار نت۔ اگاں ماشائری آ ،یا کجام ادبے آ الہامی گوشوں گڑا ایشی مانا ’’ادب پہ ادبا ‘‘ بیت کنت بلے ’’ادب پہ زند‘‘ بیت نہ کنت انچوش کہ وا جہ غنی پرواز گوش ایت۔
’’ لبزانک یک ہاسیں کردے بیت و آکردراجی جاورانی بندی بیت۔طبقاتی راجاں لبزانک جانبدار بیت و آبے کرد و بے جانبدار بیت نہ کنت ۔ بے جانب داریں لبزانک ئے مانا ہمیش بیت کہ ’’لبزانک پہ لبزانک ‘‘انت بلے ’’ لبزانک پہ لبزانک‘‘ نامیں چیز نہ بیت و نے بوت کنت۔ر استی ’’لبزانک پہ زند‘‘ آ بیت‘‘۔
(بلوچی لبزانک : غنی پروازؔ سنج :تا کدیم 201)

نوں غرماگل خان نصیرؔ ئے اے ٹوکا منوں کہ اے الہامی جاورے یا ھدادادیں تا گتے گڑ ا آنہی شائری بایدنت کہ بے پلوئی بہ بیت بلے نصیر ؔ ئے شائری پیلوی آ جانب وار و پلوئی انت۔ پرچے کہ آں پہ بلوچی راج و الس ئے بزگی آ نال ایت ۔آنہی اے نالگ مرگ ئے موتگ نہ انت بلکن زند ئے گرند و گروک انت۔ نصیرؔ ئے شائری ئے گرند پہ لغورا موت انت و پہ مڑاھداراں کاروان ئے جنز ئے واھی انت و آنہی شپ گروک منزل ر اہ ئے نشان بری انت۔
واجہ نصیرؔ وت دِہ ’’ادب پہ ادب‘‘ آ ردکنت و ادب پہ زند ئے پلا مرزی آ کنت۔ انچوش کہ آں گوش ایت ’’ ادب پہ ادب بزاں ھما شائری بیرہ پہ دپ و زبان ئے شرکنی آ بیت ۔ بے کارانی ساھت تیری یا ھستومندانی وش مجلسی ئے یک لیبے یا پر مابزگ و زھمت کشیں مھلوک ئے واب دیگ و چہ وتی ھکاں زبھرکنگا پہ یک ناروائیں کارے ۔ پمیشا من ’’ ادب پہ ادب‘‘ آ نہ مناں ، شائری و شھنویسی یا ادب ھما انت کہ زندگی ئے جھد اماں الس ئے کمکار بہ بیت ۔
(گر ند ئے پیشگال : تاکدیم15)
پہ گل خان نصیرؔ ایک ایرا دے ایش انت کہ واجہ آ ’’ سینائی گیچک ‘‘ ئے دیم درائی دیوانا بلوچی آ را بے مڈی زبانے گوئشتہ و اے نصیر ئے ’’کمتری مارشت‘‘ ئے نشان بری کنت۔ منی ھیال ایش انت کہ اگاں گپ ئے سیاق و سباقا چہ جتا اے ھبر اگندوں گڑا گپ راست بیت کنت بلے گپ و تران ئے شم و شینک ئے تہا ماایشی آ راست گوشت نہ کھنوں ۔ پرچے کہ شہ اے ٹوکا نصیر ؔ ئے متلب ایوکا ایش اِت کہ بلوچی زبان دانڑتی وتی تحریری دپتر ئے ھسابا دیما شتگیں و دیما رووکیں زوانانی سرپا پد کپتگیں و کم امبریں ۔پمیشکا پرمادومی زوانانی ادب ئے ماں بلوچی آترینغ باز گرانیں کارے۔
بلوچی زوان ئے بارہا گل خان نصیر ؔ ئے ھیال ایش انت کہ اے ر استی مدام مئے چمانی دیما بیت کہ ماوت یک کومے اوں۔ وتی یک زندگیں زبانے داروں۔ البت آنہیا اے گوشگا دِہ ھچ میارنہ زانتگ کہ ’’مئے زبان دانڑتی یک چوشیں زبانے جوڑ نہ بوتگ کہ ھر بلوچ آئرابہ وان ایت و پوہ بیت ۔ البت مئے جھد ہمیش انت کہ وتی زباناچوش بودناک و ہمہ گیر کنوں کہ ھر ھندی بلو چ پوہ ئے بیت‘‘۔
(گرند ئے پیشگال)
نصیر ئے گوشتنا رندآنہی سرا اے ایرادوتی سراوت رد بیت کہ آں’’’ کمتری مارشت‘‘ ئے شکارات۔
شائری ئے وسیلہ آ دہ یک ایرادے آنہی سرا گرگ بیت کہ آنہی شائری ایوکا احتجاج ئے شائری انت۔ گاں ایشی مطلب ایش انت کہ آنہی شائری ئے تہا شعری نازر کی و اآرٹسٹی راہ نیست و زگریں مکسدیت ازم کاری بڑتؤ چیرجتگ گڑا اے تنقیدامن گوں دلیلا رد کنگ ئے کوشست کناں۔بلے آنہی احتجاج وبغاوت ئے گپ شائری لافا منگ بیت او اے ھبر ا نصیرؔ وت دِہ من ایت۔
ہمراز گوش انت نصیر!تھل انت تئی زبان
ہچی نہ گوش ئے بیدچہ شمشیر و سناں
من دست بستگ ارزگوں بیلاں بہ کناں!
سنگانہ کدی نہ سپتگ پلانی زبان
میر گل خان نصیر ؔ نوشکے ڈولیں گرم و تھاپیں ڈیھ ئے پیداوارنت۔ جغرافیائی چاگرد، مالی و سماجی و کلچری سَٹ و دور مڑدم ئے پکر و ھیالانی سر آ اسر مند بنت ۔ نوشکے ئے مھلوک ئے گریبی و بزگی ئے بارہا نصیر گوش ایت۔
مالوچ و لگڑوبے شام و روچن
نے مارا توشگ و نے آپ وردے
کپن نے مرتگینانی نسیب بیت
نہ پما زندگیناں زند ئے مرادے
چپ و چاگرد ئے اے حساس مڑدمے ئے سر ا لازمی اسرکن انت ۔چوکہ روچ ئے آس پہ سوریں زر ا اسر کنت و آنہی اے استیناں گرند و گروخ یا ہور و ترو نگلاں کجام امیت بیت کنت۔ اے نہ بیوکیں گپے کہ شہ اے کو کراں پل بہ گوار نت ۔ پہ بلوچی الس ئے سوریں زرا رژن ئے آتش و گرمی ایوکا گرند و گروک داریں ھیال ئے جمبراں دات کنت ۔البت شہ آنہیا نرمگیں نوددِہ شنزانت۔ھو ! ھمے نود گل زمینا زند ئے مستاگ دینت ۔ درشک و پُل گلز مین ئے نشک انت۔ گرند و گروک ھور و ترنگل ئے وسیلہ انت و درشک و پُل آسرانت۔
گل خان نصیر ئے شائری احتجاج یا گہہ گیری ئے شائری پہ ہمے ھاتر اانت کہ آں وتی کوم ئے اوحالا شہ سرپدانت و بدلوکیں جاورانی سرا آنہی چم سک اِت انت۔ آں وتی راج ئے مستقبل ئے جوان تری ھیل داراث۔ بلے بندات ومسقتبل ہماں وختہ جوان وشر بیت کنت کہ راج شہ وتی گراں وابی آ درکپ ایت ۔ وتی مستقبل ئے جوڑینگئے ھاتر ا وکت و جاوراں وتی ھک ئے نیامابدل کنگ ئے جھد ا کنت ۔انسان و ھیوان ئے تہا مزنیں پر کے ہمیش انت کہ ھیوان وھد و جاوراں وتی ھک ئے نیاما بدل کنگ ئے رژن و تاگت نہ داریت بلے آنہی چپا انسان ئے نیاما ہمے تاکت گوں وتی پیلویں رژنائی آ موجود انت۔
بیلاں پہ وتن کوشش و تدبیر کن ات
اے زیم و زراگاں چہ وتن دیرکن ات
کارے کہ اگن گوں ھیر و پنت مہ بیت
پادا ات گوں شیکگ و شبگیرکن ات

گل خان نصیرؔ ا وتی احتجاجی شائری ئے تہا دِہ شیرانی شعری و زیمل اچ دستا نہ داتگ ۔ پمیشکا آنہی رز میہ شائری ئے طبل ئے جنگ ئے توارانت۔
بیلاں بیلاں۔۔۔۔۔درگپ ات دیما
ترمب تواریں۔۔۔۔۔جنگانی
ریھتگ انت دشمن ۔۔۔۔میتگ و ھلکاں
لج ومیارنت ۔۔۔۔۔ ننگانی
مرچی مہ چارات۔۔۔۔موسم و وھدا
سنج و سلاھلاں۔۔۔۔نزارات
جیڑواں براتی۔۔۔۔بل ات مروچی
دنزاں بہ چارات ۔ ۔۔۔دنگانی

ماہنامہ سنگت کوئٹہ