عالم ئے اسرار

کوہ باریں بِچکند اَنت؟
گوات باریں گُژنگ بنت؟
نود باریں تُنگ بنت؟
مور باریں سر شودانت؟
باریں پُل ہم گند اَنت؟
رَنگ ہم نپس کش اَنت؟
روچ وَشدلی زانت اِنت؟
ماہ باریں سُہبت کَنت؟
آس باریں آپُس بِیت؟
آپ واب ہم گند اِنت؟
باریں سِنگ وڈوک و ڈل
چُک وپیر و ورنا بنت؟
باریں مُہرگ و مُشتک
وَپت و واب ہم زان اَنت؟
باریں مُرگ وماہیگ ہم
شعر و سوت پر بند اَنت؟

ھست ہنچیں دیوال ہم
بِہہ نہ اِشکننت کرّاَنت؟
باریں مُرد گ ہم گند اَنت؟
باریں مے سرا کند اَنت؟
باریں سے سرا گند اَنت؟
روچ و شپ زبان دار اَنت؟
باریں موتک ہم کار انت؟
باریں گُنگیں ساھدار ہم
ہندو و مسلمان اَنت؟
باریں کوھکر و جمبر
آسمانا ہم گوار اَنت؟
باریں درچک ودار وگُل
سُور و سانگ ہم زان اَنت؟
کُمب وکور ودریا ہم ؟
درد و دور وغم مار اَنت؟
پورو کلکشاں باریں
چم وگوش ودل دار انت؟
باریں زُھرہ و مریخ
مہر و دوستی زان انت؟
شعر و شاعری زان اَنت؟
مئے اے گُل زمینا ہم
عاشقی کتگ باریں؟
درد مارِتگ باریں؟
باریں چُنت کس پہمیت
جُہد کننت و سرپد بیت
عالم ئے اے اِسراراں؟
اکبر ئے اے گُپتاراں؟

ماہنامہ سنگت کوئٹہ