چادر کی گواہی

وہ ۔۔۔
اپنے ہاتھوں میں
بے داغ چا درلیے
چیختا بھونکتا اورگرجتا ہوا
گھرکے سارے بزرگوں کوجتلا رہا تھا
اسے دیکھیے ۔۔۔۔۔۔۔۔۔۔
دیکھیے۔۔۔۔۔۔۔۔۔ یہ کہانی جوچادر پہ لکھی ہے
پڑھیے اسے
جا ئیے ۔۔۔۔۔۔۔۔۔ سرخ جوڑے میں لپٹی ہوئ
اس غلاظت بھری پوٹ کو چو میے
پوچھیے اس سے
کس کس کی برتی ہوئ ہے ۔۔۔۔۔۔۔۔۔۔۔۔۔۔۔۔۔۔
بزرگوں کے چہرے پہ
عزت کا جاہ جلال اور شرافت کی وحشت
کا وہ طنطنہ تھا کہ آنکھوں سے چنگاریاں
اورہونٹوں پہ پھنکارتی گالیوں کا تعفن بھرا
ا یسا کف اڑ رہا تھا کہ سارے محلے میں ایک گونچ تھی
خدا اس پہ لعنت کرے
اگرباکرا کوئ لڑکی نہیں ہے
تو سنگسارکرنا ہی اس کی سزا ہے
شریعہ کواطلاع دو
اس کو سنگسارکرنا ہی سب لڑکیوں کے لئے تجربہ ہے
میری برداشت کی تلملا ہٹ نے جھنجھلا کے پوچھا
گواہی میں چادر ؟ جہالت کی حد ہے
تمہارے یقین کا سبب اورکیا ہے
’’ مجھ کو بچہ نہ سمجھیں مجھے تجربہ ہے
کئی لڑکیوں سے
میرا معاملہ سولہویں سال کی عمر سے رہ چکا ہے ’’
تمہیں تجربہ ہے ؟؟؟؟؟
’’ہاں ۔۔۔۔۔۔ مرد ہوں تجربہ ہے ’’
اورپورے محلے کے دین دار
ہونٹونپہ میں اک مسکراہٹ دبائے
ذرا اپنے سینوں کو کچھ اورچوڑا کئے
سرخروتھے
مرد بچہ ہے، بیشک اسے تجربہ ہے