حساب کیسا؟

میرے سر پہ جو گٹھری رکھی ہے
اس میں اور کُچھ نہیں ہے
بجُز
کتاب زندگانی کے
چند بوسیدہ سے اوراق ہیں
یہ تمہارے کام کے نہیں
ان میں لکھی سب کہانیاں
ادھوری ہیں
۔۔۔۔۔۔۔۔۔۔۔۔۔۔۔۔۔
اس میں کوئی خواب نہیں
صرف عذاب ہیں
روح کو ریزہ ریزہ کرنے والے
نوکیلے عذاب
کچھ زخم ہیں
جو میں نے اپنے ہاتھ سے سیئے ہیں
۔۔۔۔۔۔۔۔۔۔۔۔۔۔۔۔۔۔۔
کچھ کوئلے ہیں
جن کی کالک
میرے چہرے اور ہاتھوں پہ لگی ہے
تھوڑی سی راکھ
جو مانگ میں بھری ہے
۔۔۔۔۔۔۔۔۔۔۔۔۔۔۔۔۔
اور ہاں اِک سوالنامہ بھی ہے
جس میں لکھے سوالوں کے جواب نہیں ہیں
اِن کے جواب کھوجتی ہوں
بڑی عجیب سی بات ہے
جواب مِل جائے تو سوال بدل جاتا ہے
اور تلاش کا سفر ہمیشہ جاری رہتا ہے
۔۔۔۔۔۔۔۔۔۔۔۔۔۔۔۔۔۔۔۔۔
خُدا پرست کہتے ہیں
کہ اے بشر نالہ مکُن
اِن کانوں نے کبھی سُنی نہیں
وہ “صدائے کُن”
نِرتکی کے پیَر میں زنجیر ہے
جائداد نہ جاگیر ہے
اَن لکھا دستور ہے
جسم بھی اپنا نہیں
مغموم دل
پھر کیا کرے؟
۔۔۔۔۔۔۔۔۔۔۔۔۔۔۔۔
کاروبارِ حیات!!!
حیات تو اِک حباب ہے
عجب سا یہ نصاب ہے
خسارے کا ایک باب ہے
پل کی کہانی ہے
نہ کوئی خواہش، نہ آرزو
بس رائگانی ہے
تو
رائگانی کا حساب کیسا؟
میں نے کہا تھا نا
کہ اس گٹھری میں کُچھ بھی نہیں ہے
۔۔۔۔۔۔۔۔۔۔۔۔۔۔۔۔۔۔۔۔۔

12th November 2020