سُرخ لکیر

لفظ تو بے جان ہے
اسے وجود کیسے ملتا ہے
کیوں بہت سے معنی رکھتا ہے
زندگی، اِک عام سا لفظ
ہر کسی لیئے اس کے معنی الگ ہیں
پیمانہ آدھا بھرا ہے یا آدھا خالی ہے
روشنی اِک الیوژن ہے
روشن آنکھ بھی
ہمیشہ روشنی نہیں دیکھتی
منظر ایک ہو تب بھی
ہر نظر کا زاویہ اپنا ہی ہوتا ہے
کہانی بدل جائے تو
دل کا موسم
باہر کا موسم بدل دیتا ہے
رات کے اندھیرے میں
تن ڈھانپنے کی ضرورت نہیں رہتی
اپنی نظر کے سامنے
ہر انسان برہنہ ہے
تو کیوں؟۔۔۔۔۔۔۔۔۔۔
رات کا اندھیرا بھی
یہ برہنہ پن چُھپا نہیں پاتا
یادوں کی مقفّل الماری میں
کچھ لفظ صدیوں سے بند ہیں
پر نجانے کس طرح
اُن کی بازگشت گاہِ بہ گاہِ
تالا توڑ کر باہر نکلتی ہے
اور اسی اندھیرے میں
درد کی سُرخ لکیر سے لہو
قطروں کی صورت ٹپکتا ہے
لکیر کی لالی گہری ہوتی رہتی ہے
“زندہ رہو گی، جی نہ پاؤ گی”
لفظ کو معنی زندگی ہی دیتی ہے
۔۔۔۔۔۔۔۔۔۔۔۔۔۔۔۔۔۔۔۔۔۔

10th November 2020