نوشین قمبرانی کی شاعری کا مختصر انتخاب

نخلِ دل کے برگ و باراں کو مُیسّر، تُو نہ تھا
بج رہے تھے ساز تیرے چارسُو پر، تُو نہ تھا

جنگلوں کی نیند پہلو میں مِرے جاگی رہی
نیم بیداری کی شِریانوں میں شب بھر، تُو نہ تھا

چاپ سے تیری تَھرک جاتیں زماں کی وُسعتیں
آگہی کا رقصِ آخر تھا زمیں پر، تُو نہ تھا
۔۔۔۔۔۔۔۔۔۔۔۔۔۔۔

یہ ریاضی پھر سہی کہ جو کِیا بے جا کِیا
گفتگو یہ کل کریں گے کہ خدا نے کیا کِیا؟
۔۔۔۔۔۔۔۔۔۔۔۔۔۔۔۔

اک طَشتِ گُل میں سُوکھتی جاتی ہیں خوشبوئیں
اِک خاک دان، جس مِیں جڑیں بو گیا ہے خواب

یہ خواب ہے یا خواب سا منظر ہے آنکھ میں
پہلو میں تو ہے، تجھ میں پڑا سوگیا ہے خواب

بہنے لگی ہے اپنی سیاہی میں رات بھی
میں دیکھتی ہوں خواب میں گُم ہوگیا ہے خواب
۔۔۔۔۔۔۔۔۔۔۔۔۔۔

وہ کون ہیں جو گلے سے لگائے رکھتے ہیں
سِرے سے ہیں ہی نہیں پھر بھی سائے رکھتے ہیں

وہ میری آگ کو رکھتے ہیں اپنے سِینے میں
وہ میری لَو سے مِرا دل بچائے رکھتے ہیں
۔۔۔۔۔۔۔۔۔۔۔۔۔۔

زمین اُٹھتے ہی خود اپنے رِحِم میں گرتی
سراب اپنے ہی سائے سے کب جُدا ہُوا تھا؟

میں خاک بن کے کسی جسم و جاں سے جھڑ رہی تھی
وہ بُت تراش مِرے گارے سے اَٹا ہوا تھا
۔۔۔۔۔۔۔۔۔۔۔۔۔

نفرت کی دنیا میں دُکھ کی آگ میں جلتی آگ
اندھیروں کی قئے کرتی صُبحوں میں پَلتی آگ

کچی خوشبو کے رستوں کو لَو سے مہکاتی
لالہ کی پوشاک پہنتی شفق سی کِھلتی آگ

رگوں میں پھیلے اور جلادے ہوش کے سب ہنگام
ذات کے ویرانوں میں جَھّکڑ بن کر چلتی آگ

کُھرچ کے سینے صحراوں کے باہِر آئے پیاس
پیاس کے سینے سے پھر نکلے خواب اُگلتی آگ
۔۔۔۔۔۔۔۔۔۔۔۔۔۔

رُکے جہاں پہ موسموں کے سُر وہیں ٹہر گئے
گئی جہاں بھی سِنجِدوں کی رُت، دل و نظر گئے

تِرے دھیان کی امان میں تھے ہم کِھلے ہوئے
نکل گئے تو پھر ہوا سے روشنی سے ڈر گئے
۔۔۔۔۔۔۔۔۔۔۔۔۔۔۔

دِکھتے نہیں نیکی کے پرخچے بھی زمیں پر
ایسا ہے کہ ملتے نہیں پُرزے بھی خدا کے

سینہ ہے کہ حبشہ کہ غلاموں کا بدن ہے
کوڑے مِرے کانوں میں سُلگتے ہیں صدا کے

قدرت نے بنایا ہمیں خوراک کسی کی
ہم سے بھی سِیاہ بخت وسیلے ہیں بقا کے

تہذیب و ادب علم و ہنر تم پہ کُھلے ہیں
پھر بھی تمہی قاتل، تمہی وحشی ہو سدا کے
۔۔۔۔۔۔۔۔۔۔۔۔۔۔۔

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*