آہ ! واجھیں برات مھندس اُمر ا ھم شُت

سک سک پدردیں او بے باوریں ھالے کہ دلپھکیں مھروان او وشروئیں کواس و زانتکاریں ندکار و زبان پول ، مھندس مھراب اُمرا ءَ اے دُنیا پہ دائمی یل داتگ ۔
اِنّا لِلّٰہ وَ اِنّا اِلَیہِ رَاجِعُون
راستے کہ ھمک ساھدارے آ اے دنیا یل دیگ و کبر ئے باھوٹ بوھگی اِنت بلے چوشیں مھروان و گچینی سرانی انچو زوت روگ پہ بلوچ ئے رنگیں پدمنتگیں راجے آ سک گران و تورینوک اِنت کہ مھراب اُمرا ھما جُھدئے نام اَت کہ پہ وتی راج و زبان ئے دیمروی آ بازیں پڑاں گوں بے تواری آ کارا بیتگ او وتی کش گورئے مردماں ھم سکین دیگا بیتگ ۔ نزیکیں مردمانی گوشگئے ردا بیرانی ئے وھدا پروفیسر مھراب اُمر ائے سند 45 سال بیتگ ۔
بلوچ زانتکار،ندکار ءُ استاد مھراب امرا ماں چابھار ءَ ” ادارہ فن و حرفه ای چابھار“ ءِ وانگجاہ ءِ سرکماش بیتگ۔ آئ ءَ بلوچی زبان ءَ کُران پاک (پاک تاک ) رجانک کُتگ۔ چُکانی لبزانک ءِ سرءَ کتابے نبشتہ کُتگ (اے کتاب پہ چاپ ءَ مھتل انت )، بلوچی زبان زانتی ءِ پڑءَ ھم پٹپول کنگ ءَ اَت ،بلوچی ءِ بازیں کتابانی چاپگ ءِ بارئِے ھم وتی کوپگاں زُرتگ اَت۔
وانگجاہ ءِ اُستاد بوھگ ءَ ابید مھراب چابھار ءُ سراوان ءِ شھرستان ءِ نیک کاریانی تہ ءَ ھم گون بیتگ۔ دشتیاری ءِ ھارءِ باریگ ءَ آئ ءَ پہ بزگیں مردماں کمک مُچ کُتگ ءُ چاگرد ءِ نشھی مردمانی درمان دارگ کنگ ءَ ابید آھانی کھولانی ھم کمک کنگ ءَ اَت ۔
آیک وانندگ ءُ سرپدیں انسانے اَت کہ آئءَ چہ بلوچستان ءُ سیستان ءِ زانشجاہ ءَ میکینیکل انجینئرنگ ءِ پڑءَ ونتگ ۔چہ اے اکیڈمک وانشت ءَ پد آئی ءَ انفارمیشن ٹکنالوجی ءِ تہ ءَ چہ ”پیام نور زانشجاہ تھران“ ءَ چار سالی ڈپلومہ ھم گپتگ۔
چُنت سال پیش سراوان ءَ ھُدامُرزی گوس بھار ءِ وسیلہ ءَ گوں دوچار کپتگیں مھندس مھرا ب اُمرا ءُ آئ ءِ کہول ءَ گوں اولی بر ءِ گندگ ءَ انچوش گمان بیتگ گوش ئے اے کُٹم چَہ زمانگے ءَ مئے نزیک اِنت۔ وھدے منی ایم فل ءِ تھیسز ءِ موادانی درجنگ ءَ من گوں نااُمیتی ءَ وتی چپ چاگرد ءَ سرسر جنگ ءَا تاں کہ اے ھما گچینیں مردمانی سرپ ءَ گون اَت کہ رھشونی ءُ کمک ءَ دمانے ءَ ھم مھتل نہ بوت ۔

چوشیں زندگیں انساناں ھُدامُرزیانی سرپ ءَ ھور کنگ آسان نہ انت بلے ملکموت ءَ زور مان ءُ ھاوند وتی پیسلھاں وت گھتر زانت ۔
چَہ اللہ پاک ءَ دُوا انت کہ اے برات ءَ وتی گنجیں رھمتانی ساھگ ءَ جاہ بہ دَنت ، آئ ءِ لوگ بانُک (منی مھروانیں گُھار ) ، آئ ءِ کسان سالیں بچ معراج ءُ جنکوھاں گوں آئ ءِ برات ءُ ازیزاں اے گرانیں تاوان ءِسبر ءُ اوپار ءِ ھاٹیگ بہ دَنت۔ آمین یا رب العالمین
گمانی شریدار
باسک لبزانکی دیوان ءِ کار مستر ،زاھدہ رئیسی
گوں باسک لبزانکی دیوان ءِ کارگُشاد ءُ باسکاں
محمد سلیمان رئیسی گوں وتی کہول ءَ
بیست ءُ ھشت اگست 2020