جنین ئے زندگی او مئے عجبیں دنیا

مئے دنیا بلاہیں، مئے دنیا ءَ چہ منی مطلب بلوچستان۔۔۔ بلوچستان مزن انت۔۔۔ بزانکہ سئے بلوچستان۔۔۔ ہما بلوچستان کہ افغانستان ءُ ایران ءَ انت آیانی چاگردی زند ءِ باروا منی کِرّا سرپدی نہ بوہگ ءِ برابر انت۔ منی دل ءِ مراد بوتگ کہ من بگرداں، اے جاہاں بگنداں، بلے کسانی گوست، مزن عمری ءَ وانگ مصیبتے ات، وانگ ہلاس نہ بوت کہ زرباری ایشیا جنگاں گِت، ما کہ نوں تَر ءُ گردی ئیں بزانکہ ایوکا سفر کت کنیں، نوں جاور بدل انت۔۔۔ ایرانی بلوچستان ءَ بلوچ ءِ چاگرد چون انت؟اودا بلوچیں جنین آدمانی زند چوں گوزگ ءَ انت۔ اے بابت ءَ منی دیما ہچ نبشتانک نہ گوستگ۔ ہمے وڑا افغانی بلوچستان ءِ چاگرد ءِ بابت ءَ ہم ہچ وڑیں حال نیست۔ افغانی بلوچستان ءِ ادیبانی چیز ہم مئے نیمگا شنگ نہ بنت۔ یکے عبدالستار پُردلی ءِ گدار انت کہ سوب ءِ نام ءَ چھاپ بوتگ ءُ پدا ڈاکٹر شاہ محمد مری ءَ گندم کی روٹی ءِ نام ءَ سک شر رجانک کتگ۔ ہمیش انت، مروچاں چیزے وہد انت کہ واجہ پردلی ءِ آزمانکے بلوچی زند ءَ پیداک انت، دگہ عبدالرحمان پہوال ءُ ولی محمد رخشانی ءِ یک کتابے دیما گوستگ۔ دگہ ہچ۔۔۔۔ بلے اے کتابانی تہا اود ءِ چاگردی زند ءِ بابت ءَ وَ ہچ نیست۔۔۔۔
آیاں بِل مارا ادا وتی بلوچستان ءِ باروا ہم شری ءِ سرا سرپدی نیست۔
من میڈیا ءَ کار ءَ کہ بوتگاں اودا من ءَ بازیں رپورٹے دز کپتگ، رپورٹانی تہا سیاہ کاری ءِ بہتام ءَ بازیں جنین آدمے کُشگ بوتگ۔۔۔ بلے جاہے جاہے مردم نوکیں رپورٹرانی رپورٹانی سرا بھروسہ ہم نہ کنت۔ پرچا کہ مروچاں زردیں حوالکاری ءِ دور انت۔
لہتیں گپ منی یاتی انت ءُ لہتیں منی چم دیست انت ءُ لہتیں گپ ہما انت کہ منی نزینکیں مردماں من ءَ حال داتگ انت۔۔۔
1999 یا 2000 ءِ زمانگ ات۔ مئے نیمگا حالے شنگ بوت فِلانی ءِ جَن ءَ وت ءَ ٹَنگ ءُ کُشتگ۔ بلے راستی مُدتے ءَ پد دیما اتک کہ اے مرد ءَ وتی جن ءِ سرا شَک بوتگ ءُ مدام وتی جن ئِے لٹ داتگ۔ برے آسِن گرم کرتگ ءُ آئی ءِ بڈ داغ داتگ ءُ برے گوں تَوَر ءِ دستگ ءَ بڈ چو پِیش ءَ جہت کرتگ۔ لہتیناں گشت کہ جنین چرے زند ءَ بیزار بوتگ ءُ وت ءَ ٹَنگ اتگ ئِے۔ بلے لہتیناں گشت کہ مرد ءَ جتگ ءُ کُشتگ۔ پدا برتگ ٹَنگ اتگ کہ ایش انت منی جن ءَ وت ءَ کُشتگ۔
لوگی دپ جاکی، چمپل جنُکی، مات ءُ گوہارانی زاہ دئیُکی اے وَ دائمی دودے کہ مئے نیمگا وڑے ناں وڑے ءَ مدام بوتگ ءِ انگہ ہست۔ پونز ءَ بجن مُشتے، آ انت پونز حون بوت، جنین کُنڈے ءَ کپت، لگ ات دعا ءُ زرمبو ءَ، مرد کیت جنین ءِ ہما جاہاں گوں لگتاں بندیت کہ تورناک انت ءُ ٹپ نہ بنت۔ اگاں ٹپ بہ بنت، اے جاہاں جنین ہرکس ءَ پیش نہ دارنت۔
من جنیں آدم مردانی دست ءَ اَنچو لٹ ورگ ءَ دیستگ انت کہ چو کس دژمن ءِ حر ءَ ہم لٹ نہ دنت۔۔۔ جنین زھر کننت۔ وتی مات ءُ پت ءِ لوگ ءَ رؤنت۔ ھفتگے کپے گوزیت مرد نرم بیت، پدا فیصلہ بیت، جنین ءُ مرد پدا وشان بنت، زندگی پدا روان کنت، مرد پدا ہما حساب ءَ کیت ءُ زال پدا لٹ وارت۔۔۔۔ گڈسر ءَ زال وتی مات ءُ پت ءِ لوگ ءَ رؤگ ءَ بیزاری بیت ءُ لٹ ءِ ورگ ءَ ھیل کنت۔
چیزے روچ پیسر سنگتے پسنی ءَ مئے پجہ آروکیں مردمے ءِ گپ ءَ ات کہ اے مرد گارین ئِے، وتی جَن ئِے پہ لٹ کُشت ءُ ایر کُت۔ من گشت گڑا جنین زھر نہ کنت ءُ وتی مات ءُ پت ءِ لوگ ءَ نہ روت۔ گشت ئِے انناں۔۔۔ من گشت پرچا؟ گشت ئِے۔۔۔ اے مرد ءِ جن گشیت۔ مرد اگاں وتی جن ءَ مہ جنت گڑا کئے جنت؟
ایشی مطلب ایش انت کہ بازیں جنین مرد ءِ دست ءَ لٹ ورگ ءَ پمیشکا ہچ نہ گشنت کہ آیانی دل ءَ اگاں مرد مارا مہ جنت گڑا کئے جنت۔
بلے راستی ایش انت کہ ہمے جن ءُ مرداں سر ءُ سوج کنوک نیست۔ اے جنین ءَ را کسے بہ گشیت کہ بانک تو پہ لٹ ءِ ورگ ءَ مرد ءَ دئیگ نہ بوتگ ئے۔ ترا لہتیں حق ہست ءُ مرد ءَ را ہم گشگ بہ بیت کہ کس وتی نازاکیں چُکاں پہ لٹ دئیگ ءَ شمارا نہ دنت۔ بلے ہمے کار ءَ کئے بکنت؟ ہمے سرپدی ءَ مئے دمگ ءِ مرد ءُ جنیناں کئے بدنت؟
دگہ کسہے۔۔۔ مرد ءَ وتی جن دوست نہ بیت۔۔۔ مرد مدام وتی جَن ءَ جنت۔ جَن مدام کیت وتی پت ءَ را گشیت ابا اے مرد ءَ من ءَ کُشت۔۔۔۔ بلے پت وتی جنک ءِ گپاں اے گوش ءَ اشکنت ءُ دومی گوش ءَ کشیت۔۔۔ یک روچے جنک گشیت ابا اے مرد ءَ منی نند جاہ بزانکہ لِنگ گوں گرمیں استری ءَ داغ داتگ انت۔ من نشت نہ کنیں۔ پت انگہ اے گپاں گوش نہ داریت۔۔۔ گڑا جنک بیزار بیت۔ دگہ مردے سنگت کنت ءُ ہمے مرد ءَ گوں تچیت۔۔ رند ءَ مرد جہہ جنت ابڑے بابی جن گار انت۔۔۔۔ ہما جن انت نوں کہ گار انت۔۔۔ تو باریں کجا شت ئے۔۔۔ یک نیمگے پت ءُ مات گریوگ ءَ انت ءُ یک نیمگے گونڈیں چُک۔۔۔
پت ءُ مات اگاں وتی جنکانی حیال ءَ نہ دارنت گڑا باید انت، سرپد ءُ وانندگیں برات وتی گوہارانی حیال ءَ بکن انت ءُ مروچی موبائل ءِ دؤر انت۔ حال ءُ حوال کنگ ارزان انت۔۔۔ باید انت سرپدیں برات ءُ سرپدیں گوہار وتی گوہارانی حال ءَ بگرنت کہ باریں مردانی لوگ ءَ مئے گوہارانی زندگی چون انت۔ روچ ءِ چِنچو رند ءَ لٹ وارت ءُ چنچو رند زاہ ءُ بد کنگ بیت۔۔۔
چونا ءَ من چار اتگ مئے دنیا ہم عجبیں دنیایے۔۔۔ سوشل میڈیا ءَ مئے بازیں سنگتے لبرل انت، فیمنسٹ انت، سوشلسٹ انت، انسان دوست انت۔۔۔ بلے اسل زندگی ءَ اے چیزانی فوٹو ہم آئی ءِ کیسگ ءَ نیست۔ مئے دنیا ہم عجبیں دنیایے۔۔۔ ما ہما زاہاں وتی آزمانکانی تہا نبشتہ کت نہ کنیں۔ بلے لوگ ءِ تہا مدام ہمے زاہاں دئیں۔۔۔۔
یک روچے لوگ ءَ جان محمد دشتی ءِ رِد ءُ بند داتگیں کتاب بادشاہ حدا وند وت ات، ءَ گونڈو وانگ ءَ بنت۔ یک سیادے کیت ءُ گونڈواں گشیت اے کتاب ءَ مہ وان ات۔۔۔ اے چہ زاہ ءَ پُر انت۔۔۔ گڑا گونڈو آئی ءَ پسہ دئینت۔۔۔ ما دمکانی تہا ءُ وتی مسترینانی دپ ءَ چد ءُ شرتریں زاہاں اشکنیں۔۔۔ پیسر ءَ برو ہمایاں شر کن ءُ رند ءَ بیا مارا بگش۔۔۔۔ مئے دنیا ہم عجبیں دنیایے گندئے۔۔۔

تورو: حال حوال