Find the latest bookmaker offers available across all uk gambling sites www.bets.zone Read the reviews and compare sites to quickly discover the perfect account for you.
Home » کتاب پچار » گیلیلیوئے زیندھ ۔۔۔ بریخت ؍شان گل

گیلیلیوئے زیندھ ۔۔۔ بریخت ؍شان گل

1616: کولیجیم رومانم، دی ویٹیکنز انسٹی ٹیوٹ آف ریسرچ گلیلیوئے دریافتانی تصدیقہ کنت
چیزعجبیں ڈولے بدلہ بنت
وختیکہ عالمیں مڑد پہ ہیل گرغہ ڈولوبنت
ماگوں مستا گہ گشوں کہ کلاوی ؔ اسا
گلیلیو گیلیلی ٹوک راست گوئشتہ
رومہ اندرا کولجیم رومانمئے ہالہ لافا
اے شفیں ۔ چرچئے مزائیں معتبر، پادری او سکالر گڑوانی لافا۔ یک پلوے گیلیلیو جکثی ایں۔۔۔ ایکا
بازہُلجا بیغیں۔ منظرہ شروع بیغا پیش گرندوخیں ٹہکوآنی گُرہاٹ کاینت۔
دَوری ایں صدر پادری مستاگاگوں وثی لافا زوردیاناں: اوہ احمقی ! اوہ احمقی!۔ دل شی کسے آمناں یک قولے ڈسثیں کہ آنہی چکا اعتبار کثہ مہ کُثیں!
سکالر: واژہ پہ مثال، کہ تہ سفارغاپہ یک قابو کثہ نہ ویوخیں نفرتے دارئے۔
دوری ایں صدر پادری: ہمے ٹوکہ چکاآں باورہ کننت ! ۔ آں ہمشی چکا دِہ باورہ کننت۔ چھڑومعقولیں ٹوکہ چکا باور نہ وی۔ کہ یک شیطانے استیں۔۔۔۔۔۔ آنہی چکا شکہ کننت۔ پراے کہ زمین رونڑے اندرہ یک کہنوں اے ڈولہ چری ۔۔۔۔۔۔ آنہی چکا باور ہ کننت۔
یک پادری ایکٹنگہ کنت: مئیں سغرچرغیں۔زمیں باز اشتافی چرغیں۔ پروفیسرمں وثارتر اگوں ٹیکا دیاں داراں؟۔
آں جھونٹغہ ایکٹنگہ کنت او یک سکالر ے ءَ گوں لگڑی۔
سکالر لیوا اوار بیاناں: ہا۔ مرشی مئے دوستی ایں پیریں ماث زمین ،اغدہ شرابہ نشہ ءَ اندرئیں۔آں یک دوہمی ءَ تکڑائی ءَ گرنت دارنت
پادری: بوشت اوزمیں بوشت۔ ما چراناں تلشکغاؤں ۔ بوشت بوشت ۔مں گشغاں بوشت!
یک دوہمی سکالرے: وینس پیشاکبڑائیں۔ مں چھڑو آنہی مُسکی کوٹغہ دیثہ کناں۔ مذت!
پادریانی گڑوے مچہ بی۔ کندغایاں۔ آں ہمنگا ایکٹنگہ کننت چو کہ طوفانے اندرا یک بیڑی اے آژہ سٹے جیغا ژہ وثار بھچینغابنت۔
یک دوہمی پادری اے : ہمنگامہ وی کہ ما ماھہ چکا بروں کفوں۔ براثاں۔ گشنت کہ آنہی ٹیٹرانی چونبی باز تیز انت۔
اولی سکالر: وثار تکڑاکں دار
اولی پادری: او جھلامہ گند۔ منی سغرتری۔
دَوری ایں صدر پادری ہانسکاری گیلیلوئے پلوا، زورا ٹوکاکناناں:نا ممکن۔ کولیجم روما نمہ اندرا سغر ترغ۔بیثہ نہ وی۔
مزائیں ٹہکو
مسکی دروازہ غاژہ کالجئے دواَ سٹرونومر پیہی۔ ہر کس چُپ بی
یک پادری اے : شما دانڑتی تحقیقا کنغائیں! رسوائی ٹوکے ۔
سری اَسٹرونومر زہراگوں:نہ مانخنغاؤں!
دوہمی اسٹرونومر: اے قصہ دا ں پکو روث؟۔ مں کلیویئس ءَ پوہ بیثہ نواں ۔۔۔۔۔۔ گوئستغیں پنجہ سالانی اندرا دعوی کثغیں ہر چیزسُچائیں راست منے جی! 1572 ءَ سالا، فکس ایں استارانی کلاں ژہ بڑزیں سفیئر، بزاں ہشتمی،ایذاژہ لمبوآنی یک نوخیں استارانی مچی اے کہ وثی گاوانڈایاں ژہ باز روژنائیں، اوبازمزنیں۔ او ہژدہ ما ہ گزغا پیش اے اغدہ جہی، او گڑدی گارو گمبھار بی ۔ کسے پولہ کثہ کنت:آزمانانی دائمی معیاداودوام چوں بی ؟
فلاسفر: اغر آنہاں کسے بلی، تہ آں تہ مئے دراہیں کائناتہ درٹیننت۔
سری اسٹرونومر: ہا ۔ ماتاں پلوا روغاؤں؟۔ پنچ سالا پذاڈین، ٹائکو برا ہے یک دُمبوئیں استارے دگّہ مقرار کنت ۔ اے مائخانہ برزاژہ شروع بیثہ او یک یک کناناں کرسٹلیں سفیئراں بھورینا ناں شتہ، کہ چروخیں استارانی مچی آنی پکوئیں سواری انت!۔اشی مطلبیں کہ اشیا ہچ مزاہمتے نہ وی ، اشی روژنائی ءَ ہچ ریفریکشن اے نہ وی ؟۔۔۔۔۔۔ کسے پولا کنت: سفیئرپکوانت؟
فلاسفر: سوال پیدانوی۔ اٹلی ، او چرچئے کلاں ژہ مزائیں اسٹرونومرکرسٹوفر کلے ویئس انگیں چیزہ بارہا پکرہ دِہ شوں کثہ کنت؟
دَوری ایں صدر پادری: رسوائی ٹوکے۔
سری اَسٹرونومر : بلے آں ہمے ٹوکہ چکا پکراکنغیں ۔ آں ہموذانشتی ایں او ہماں شیطانیں ٹیوبہ اندرا جھاتیا جثی ایں!
دوہمی اسٹرونومر: اے دراہیں قصہ مئے بے ھذائیں کوپرنیکسہ ٹیبلا ژہ بازیں چیزانی حساب کتابہ کنغاژہ شروع بیثہ ۔ سالانی سالاں ماہمے ٹیبلاں ژہ شمسی سالانی، ماہ گو او روش گرانی تاریخ اوآزمانی اجسامانی پوزیشانی بارہا لیکو چیکو اکنغاؤں۔
یک پادری اے: مں ترا پولہ کناں کہ تاں جوانیں:یک ماھگو ے تجربہ کہ کیلنڈرہ لافا سے روشہ رندا بی ،یا دائمی نہ آزادی؟ ۔
یک باز لاغریں پادری اے بائبلا بوتکیا دیمہ کیث ، وثی موڑد انغا جنونیانی ڈولا یک آیتے چکا زورداثیا: اے پاکیں کتاباچے لکھثی ایں؟’’ روش تہ گبیوؔ نہ چکا چُپیا بوشت، او ماہ تہ اجالوؔ نہ وادی چکا ‘‘۔
شوں روش چُپی ءَ جکثہ کنت دانکو کہ اے مہ جزی، چو کہ اے ملحدگشنت؟۔
دوہمی اسٹرونومبر: مشکلات استنت کہ مارا سٹرونومراں پیش انت۔ بلے مردما ہر چیزہ پوہ بیغ ضروری ایں چہ؟
دوئیں درکفنت

بازلاغریں پادری: آں انسانی نسل ءِ لوغہ گوں یک لڈوبوژی استارے ءَ برابرکننت۔ انساناں، جاناوراں ، درشکاں، او ڈغارہ جندا یک ریڑھی اے چکا بند نت او اشیا یک خالی ایں آزمانے اندراژہ یک دائرہ اے اندرا چَریننت۔ آنہانی چناں زمین و آزماں نِیں وجودہ نہ دارنت۔ زمین نِیں اے خاطرا نے کہ اے آزما نہ لافایک استارے؛ او آزمان اے خاطرانے کہ اے زمیناں گوں ٹھیثی ایں۔ نِیں بُڑزی اور جہلی ئے نیاما ہچ فرق نے ، دائمی او عارضی نیاما ہچ فرق نے۔ کہ مازانوں کہ ما مِروں ۔آں نِیں مارحالہ دینت کہ آزمان دہ مِری۔ روشنت، ماہنت او استارنت، او ما زمینہ چکا ساہڑوں، ہمنگا گشغ بیثغہ، او ہمنگا لکھثی ایں۔ بلے نیں آنہانی گشغیں کہ، زمین ہم یک استارے ۔ دگہ ہچ نے بس استارنت ! ۔ مار ہماں روشاں زیندغ بیغی ایں کہ آں گشنت: بس نیں مردم او جانور نیستاں، مردم یک جاناورے ، دگہ ہچ نے بس جانا ورنت۔
اولی سکالر گوں گیلیلیو آ: واجہ گیلیلی ، تہ چیزے فرشہ چکا پرینتہ۔
گیلیلیو کہ وثی جیباژہ وثی سنگ کشتئی ، ہما نہیا گوں لیو کثئی، او پذی پذی اے ڈغارہ چکا کفغا اشتئی ۔ نیں اشی زیر غا پہ ڈولو بیاناں: انا واجہ ۔ اے مئیں چکا کپتہ۔
دَوری ایں صدر پادری دیر بیاناں: بے حیائیں بد ذاتیں کمینہ۔
پیہی یک باز پیریں کارڈینل اے کہ یک پادری اے ٹیکا داثی اَیں نیں۔ ہر یکے عزتا گوں آنہیا دگّہ داث۔
باز پیریں کارڈینل: آں دانڑتی ہموذایاں؟ آں جائی ہمے معمولی شئے ءَ اشتاقی چوڑائینتہ نہ خننت ؟ کلاویئس بایدیں وثی جندہ اسٹرونومی آ سر پدبی۔ مں اَش کنغاں کہ گیلیلیو صاحب انسان ذاتا کائناتئے مرکز اژہ جلا وطن کنت او کنڈو کا مبیلے ءَ باڑت۔ ہمے خاطرا ، آں تہ انسان ذاتہ سُچائیں دژمنے۔ او آنہیا گوں بایدیں دژمنہ ڈولا کنغ بیث۔ انسان تخلیق ئے تاج ایں، چکے آدِہ سمائیں۔ ھذائیے برز ترین او دوست ترین ایں تخلیق ۔ آں شوں ہمے ڈولیں معجزہ ، اے ڈولیں ماسٹر پیس اے یک کستریں دیریں او یکو گُھرے آئی ایں استارے چکا باڑت ہندہ داث؟۔ آں وثی بچہ ہمنگیں ہندے ءَ بڑتہ کنت؟ ۔مں حیراناں ہمنگیں مرد دِہ استنت کہ وثی جندہ میتھی میٹکل ٹیبلانی ہمے غلامیں مڑدمانی ٹوکاں باورہ کننت ؟ خدائے تاں مخلوق ہمنگیں چیزاں باورہ کنت؟
دوری ایں صدر پادری: آنہی گوشہ گشی۔ ہماں مڑد ایذا سانڑیں ایں۔
باز پیریں کارڈئینل گوں گیلیلیوآ: تہ وئے ہماں مڑد؟ ۔مں جوانیادیثہ نہ خناں، بلے ہمکھر دیثہ کناں تہ بالکل ہماں مڑدہ دروشماں دئیے ہماں کہ ما ہمانہی وختا ایذا سوتکغہ۔ آنہی نام کئے اث۔؟
ٹیک دیوخیں پادری: سائیں وثار زہرمہ یار ۔ ڈاکٹرا۔۔۔۔۔۔
باز پیریں کارڈینل: آنہیا تیلانکا دیاناں، گیلیلیو آگوں : تہ گل زمینہ بے عزت کنغا باڑایئے، حالانکہ تہ اشی چکا ساہڑغائیے اور شمشیا ہر ڈولیں چیزاں گرغائیے ۔ تہ وثی جندہ جالو آپلیت کنغے! ۔بلے من ہمنگانہ خناں۔
آں ٹیک دیوخیں پادری ءَ تیلانکہ داث او وڈائیاگوں اگھہ پذا گاماں جنت
مں یک کستریں استارے چکا معمولی چیزے نہ یاں کہ یک گوئنڈیں وختے آیک ہندے آگِڑدی آچرغیں۔ مں مضبوطیں زمینہ لتاڑ کناں۔ اے گوں آراما جکثی اَیں۔ اے کائناتہ مرکزیں۔ مں مرکزہ چکایاں، او پیدا کنوخہ چم چھڑو ،او ایکا منی چکا ینت۔مئیں گڑدا ہشت کرسٹلیں فِکس ایں استارانی سفیئراں گوں سلھاڑتیا سفیئرانی نیاما فکسیں استار او مزں شانیں روش کہ منی چیارمں کنڈاں روژنائی دیغا پہ پیدا کنغ بیثغہ۔ او منی چکا دِہ ، کہ بلاں ھذا مناں دیثہ بہ کنت۔ او ہمنگا، او شیشیا اوسہرائی۔ ہر چیز منی سرا، بزاں انسانہ سرائیں ، کہ خذائے ماسٹر پیس ایں، تخلیق ءِ مرکزیں، حذا یہ جندہ اکسیں ، لافانی ایں او ۔۔۔۔۔۔ پادری تُسی
ٹیک دیوخیں پادری: پاکیں، تہ وثار ڈکّی کثہ:
ہمے وختا مسکی دروازغ بسکی او مزں شانیں کلیوئیس وثی اسٹرونومرانی سربری آ کناناں پیہی۔ آں اشتافی ہالہ ژہ گزاناں روث، او چُپی آ، نَیں راستیں پلوا گندی او نَیں چپیں پلوا۔ ہالہ درکفغہ بی تہ یک پادری اے ءَ گشی۔
کلیوئیس: آں راست گشی۔
آں درکفی روث گوں اسٹرونومراں پجیا ۔ مسکی دروازغ بتکیا سرہ کیث ۔ یک مُڑدغی چپی اے کفی ۔ باز پیریں کارڈینل بوذہ کیث۔
باز پیریں کارڈینل: چے بیثہ؟ ٹوکے آپجثغنت یا نہ؟
آنہی حالہ دیغہ ہمت کسہ نوی
ٹیک دیوخیں پادری: گراں قدر بایدیں لوغا برغ بی۔ پیریں مڑدہ درہ برنت۔ کل ہالہ ژہ ھک، ہیران بیثی آ درکفنت۔ کلیو ئیس ءِ تحقیقی کمیشن ئے کستریں پادری ے گیلیلیو ءَ نزیخہ اوشتی۔
کسائیں پادری چُپی چُپی ءَ کیث: واجہ گیلیلی ۔ لڑغا پیش فادر کلیوئیسا گوئشتہ: نیں گندوں کہ تھیالوجی والا وثی آزمانی گولائیاں دوارشوں اوار کننت! ۔ تہ کٹثہ۔
درکپتہ
گیلیلیو آنہی دارغہ کوشیشہ کنت : اشیا کٹثہ ! ۔مں نہ فہم و عقلاکٹثہ!
کسائیں پادری در کپتؤ شتغث ۔ گیلیلیو دِہ در کفی۔ دروازغا آں دراژیں پادری، ’’ ججیں کارڈینل آ گوں تریٹی۔ یک اسٹرونومرے ہما نہی پجی اَیں۔ گیلیلیو ڈولوبی۔ درہ در کفغا پیش آں دروازغہ چکا نوکرہ گوشہ اندرا پولہ کنت۔
نوکرپُس پُسہ کنت ولدی ءَ داثی:مزں شانیں ججیں کارڈینل ۔ اسٹرونومر ججیں کارڈینلءَ دوربینہ پلوا باڑت۔
(6)
بلے ملحدانی سزا دیوخیں عدالت کو پرنیکسی تعلیماں اعتراض والی لسٹہ اندراایر کنت
(5 مارچ1616)
گیلیلیو کہ روما اث
یک کارڈینلے آ لوغا لوٹا ئینتہ
مہماں کثو شراب داثئی نغں داثئی
اویک معمولی دز بندی اے کثئی
رومہ اندرا کارڈینل بلا رمن ئے لوغ۔

یک ڈانسے چلغیں۔ برانڈھہ لافا، کہ دو کلرک شطر نجا لیوکنغاینت اومہمانانی باروا نوٹساں ٹاھینغاینت۔
بوکاری کثغیں زال او مڑدا نی یک ٹولی اے تاڑیاں و جینی گیلیلیو آ وش آہت کنت۔ آں وثی جنک و رجینیا او آنہی منگ لڈویکو مارسیلی پجیا پجی۔
ورجینیا: لڈوویکو، مں دوہمی کسی پجیا ڈانسہ نہ خناں۔
لڈوویکو : تئی کوفغہ بیلٹ سُستیں۔
گیلیلیو: ’’ پریشان مہ وی جنک اغر کزینہی تہ شوخیں نغاہے چِکئے۔
آں چم کہ یک لڑزوخیں تسمہ اے گندنت آں دلہ دریپغئے اشتاف بیغہ اندازھہ کثہکننت ۔ زیبائیں زال تنتگا بیثہ بی بے پرواہ گوں وھش بیغا‘‘
ورجینیا: منی دلا گند۔
گیلیلیو: وتی دستہ آنہی دلہ چکا ایر کنت: اے دریپغیں۔
ورجینیا: مں لوٹاں کہ زیبامانایاں۔
گیلیلیو: ضرور ۔ یا مخلوں اغدہ جلدی حیران بیغہ شروع بی کہ زمیں جائی چرغیں۔
لڈوویکو: پراے نئیں۔
گیلیلیو کندی سجہ ایں روم چھڑوتئی بار ہا ٹوکا کنغیں۔
پر مرشی ایں شاما پد، واجہ مخلوک تئی جنکہ پچارہ کنت۔
گیلیلیو: گشنت کہ رومہ بہار گا ھہ موسماز یبا ما ناغ آسانیں۔ حتی کہ مں دہ بایدیں کمیں دَوری ایں مڑدے گھاڑا دیاں۔
دوئیں ورنائیں کلرکاں گوں۔ مناں ایذا کارڈینلئے انتظار کنغی ۔ ورنائیں جوڑی آگوں۔ بریت وثی دلاوش کننت۔
ڈانسہ ہالہ پجغا پیش ورجینیا اغدہ رمباناں گڑدی کیث۔
ورجینیا: وایا ڈیل ٹراینفوئے ہیئر ڈریسرا سری سری مناں بڑتہ او دوہمی چیاریں بانکاں گوئشتئی انتظارا کنیں۔ آنہیا یکدم تئی نام پجھارتہ۔
گیلیلیو شطرنج لیو کنوخیں کلرکاں گوں : شوا اے کہنیں فیشن والا شطرنجا پچے لیو کنغائیں؟ تنگ تنگیں ۔ مروشاں مخلوک ہماں ٹُکراں گوں لیوہ کنت کہ دراہیں بورڈہ چکا رواننت۔ چوش ۔ آں کنت ڈسی۔۔۔۔۔۔۔ او بشپ چوش، او کوئین ایذا ، اوذا ۔ شمشیا ہند پیدابی او شماوثی منصوبہ بندی ءَ کثہ کننت۔
یک کلرکے : تراسمائیں مئے کستریں پگھارہ گوں ہمشی وس مارنے۔ ما چھڑوا ے ڈولیں چالاں جزثہ بوں۔ آں یک کستریں چالے چلی۔
گیلیلیو: معاملہ بالکل دوہمی ایں منی سنگت، بالکل جتا ۔ ہر کسے کہ مزائیں گاماں زیری ہما نہیا مزائیں بوٹ رسنت۔ مڑدم بایدیں وختا پجیا جزی، عزتمنداں ۔ تیا بہ بھانکر نہ ، وختے وختے لازمیں کہ شوا سمندراپیہیں۔
باز پیریں کارڈینل پیشی منظرہ ژہ سٹیجہ پار کنت، ٹیک دیوخیں پادری پجی ئیں نی ۔ آنہی نغاہ گیلیلیو چکہ کفی ، دیما گزی، گڑہ نا غماں پذہ گڑدی ، آنہی دراہی ءَ کنت۔ گیلیلیو نندی۔ ڈانسہ ہالہ ژہ چو روانی تواراش کثہ کیث کہ لورینزوڈی میڈیسی ءِ مشہوریں شیرا جنغایاں:
مں کہ دیثؤں آہاڑئے پُل مرغا
او سجہ ایں پن آنہانی زڑد ومژثغیں کپتیا چکا
ساڑتیں ڈغارئے، مں زاناں راستا
چکھراشتافی گزی ورنائی ءِ پُل ۔
گیلیلیو: روم مزں شانیں جشن اَنت؟
سری کلرک: طاعونہ سالاں پذا اے سری ایں میلہ ایں۔ مرشی ایں بیگھا اٹلی ئے سجہ ایں مزں شانیں خاندان ایذا سانڑیں بنت۔
دوہمی کلرک: مداخلتہ کنت: مزں شانیں کارڈینل بیلا رمن او کارڈینل بار بیر ینی۔
پیہنت کار ڈینل بیلا ر مین او کارڈینل بار بیرینی ۔ سری وثی دیمہ اگھا یک لٹے سر ءَ چکا یک گٹورے ما سکا زڑتی ایں او دوہمی شاثلوئے ۔
باربرینی گیلیلیو پلوا موڑدانغا کناناں: ’’ روش دِہ ٹکہ داث، او روش ٹبی ، او اشتافی رُمبی پہ ہواں ہندا کہ شموذاں آنہیا ٹک داثغہ ’’ ہمنگا گوئشتہ ، مسیحی استادا۔ اوچے گشی گیلیلیو؟
گیلیلیو:مزں شان، وختے کہ مں اِکھر مزنثاں۔ آں وثی دستہ گوں اشارھہ کں ڈسی۔مں یک آفی جہازے چکا کڑو بیثو جکثغاں او گوانک جثؤگوئشتؤں : تیاب دیر بیاناں روغیں۔ مروشی مں زاناں کہ تیاب ہموذا او شتیا تیا بیثہ او آفی جہاز دیر بیاناں شتغث۔
باربرینی: چالاک، چالاک۔ مڑدم چے گندی، بیلارمن، بزاں استارانی مچی جُزغیں۔ بلے آں چیز کہ راستیں ، بزاں اے کہ زمین چری، دیثہ نہ یئے ! چالاک ۔ بلے آنہی جو پیٹر ءَ مائخانہ سر پد بیغ مئے اسٹرونومراں پہ گرانیں۔ بے بختی کہ مں ہم یک زمانغے آ چیزے اسٹرونومی پڑھثغہ، بیلارمن۔
اے مڑدمہ یکڈھنگرے ڈولہ لگڑی۔
بیلارمن: بار بیرینی مار بایدیں وختا پجیا جزوں ۔ اغر یک نوخیں قیاسیبنیادا استار چارٹ مئے ناھدا آں پہ آفی جہاز انی روغ آغہ آسان کننت، تو بل کہ ہمے چارٹاں کار مرز بہ کننت۔ ما تہ چھڑو ہماں تعلیماں نا پسند کنوں آں کہ بائبلارد کننت۔ آں ڈانسہ ہالہ پلوا دستاں سلامہ ڈولہ جزرینی
گیلیلیو:بائبل گشی، ’’ ہماں کہ گڈو برہ ذخیرہ کنت، مخلوق ہما نہیا بددعاکنت‘‘۔بتل۔
باربرینی: ’’پوہیں مڑد علما مچ کننت‘‘ بتل۔
گیلیلیو: ’’ہموذکہ کاریغر نیستاں، آخُر اچاّئیں ؛ بلے زیات گیشتری گوں کاریغرہ زورئیں‘‘۔
باربرینی: ’’آں کہ وثی روحہ چکا حاکمی ءَ کنت گہتریں ژہ ہما نہیا کہ یک شہر ے سرا قبصہ ءَ کنت ‘‘۔
گیلیلیو: ’’بلے یک پرشتغیں روحے لوغہ حشک کنت’’ وقفہ ۔’’ راست زورا گوانکہ نہ جنت چہ؟‘‘۔
باربرینی: ’’ بیثہ بی چہ کہ کسے گرمیں ہنگرانی چکا برو او آنہی پاذمہ شُشاں ؟‘‘۔ رومہ اندرا وشاتکئے ، سنگت گیلیلیو۔ ترااِشی بنیادہ سمائیں؟ ۔کسّہ گشنت کہ یک ماذغیں گُرکے ءَ دو کسائیں چورواں شِیر او ہندداثہ۔ شماں ساھتا سجہ ایں چُکاں ہماں ماذغیں گر کہ شیرانی بہادیغی بیثہ ۔ بلے آنہی بدلہاماذغیں گرک دراہیں کیفاں پجینی، زمینی بنت یا آزمانی، کہ آں منی وانندھیں سنگت بیلا رمنا گوں مجالساں بگر داں انٹرنیشنل سگھءِ سے چیار بانکانی سنگتی آ۔ مں آنہاں تراڈساں؟
آں گیلیلیو ءَ مسکا باڑت ، تاکہ آنہیاڈانسہ مزائیں ہالاڈسی۔ گیلیلیو گوں ناکامیں دلا آنہی مسک مسکہ جُزی
باربرینی: نہ ؟ آں یک ہالینی ایں مجالسے سرا زور پرینی۔ باز جواں ۔ تہ پکئے سنگت گیلیلیو کہ شمااسٹرونومر گل وثی اسٹرونومی ءَ زیات ارزاں کنغا گوں ہچ دلچسپی نہ دارنت؟۔ آں اغدہ آنہیا دیما کاری۔ شما چڑو دائرہ او ماہ گو،روش گر،ا و برابریں ولاسٹی آنی بارہاپکرہ کننت سادہیں جزر پزرانی کہ شمئے دماغ پجثہ بنتش۔ بلے اغر ھذا یا وثی استار چوش جزر ینتے ثاں ، گڑہ؟
آنہی موڑ دانغ گواثہ اندرا یک سک پیچیدہ ایں دگّے آ مختلف ایں سپیڈا گوں سُری
گیلیلیو: عزتمند ، اغرھذا یا دنیا چوش ٹاہینتہ۔ آ ں باربرینی ڈولا مورڈانغہ جزرینیتو گڑہ آنہیا مئے دماغ دِہ ہما نرنگا ٹاہینتنت ۔آں اغدہ ہماں ڈولہ وثی موڑدانغہ سُرینی تاکہ اے دماغ ہمے دگا سادھیں ڈولا پوہ بیثے ننت۔ مں دلیلہ چکا باورہ داراں۔
باربرینی: منی چناں دلیل نا کافی ایں۔ ھذا ( آں) خاموش ایں ۔ آں اکھر نرم تواریں کہ نہ گوئشی کہ مرشی کہ آں مناں ناکافی گنڑیں۔آں کندی او پذا سہنڑائیں جنگلہ پلوہ گڑدی۔
بیلا رمن: دلیل ، منی دوست، باز دیر پجثہ نہ وی۔ چیاریں کنڈاں ماہچ نہ غندوں باج ژہ چالاکی اور روباہی ءَ ، جرم او نزوری آ۔

Check Also

March-17 sangat front small title

سنگت کے بکھرے موتی ۔۔۔ عابدہ رحمان

فروری 2016 ویمن مارچ آن واشنگٹن کے ٹائٹل کے ساتھ ماہتاک سنگت کھولا تو اداریہ ...

Leave a Reply

Your email address will not be published. Required fields are marked *