Find the latest bookmaker offers available across all uk gambling sites www.bets.zone Read the reviews and compare sites to quickly discover the perfect account for you.
Home » پوھوزانت » چینی، گوادر، ءُ ھَر ۔۔۔ گلزار گچکی

چینی، گوادر، ءُ ھَر ۔۔۔ گلزار گچکی

چوناھا مئے ملک سرجمیءَ رسانکدرے جوڑ بوتگ۔ ھمک روچ نوکیں حالے مارکیٹ ءَ کئیت۔ برے بچار وَردِنی اَزبابانی تَھا ملاوٹ ءِ گپ چو لوڑءَ چول وران اِنت، برے ماں بیکری ءُ ھوٹلاں گھیتگ ءُ کٹیتگیں ورد ءُ وراکءِ پُجّارینگ ءِ کسہ اِنت ءُ برے بچار ھرءُ کچک ءِ گوشت ءِ بیھ ءُ شر اِنت۔ رشوت دیئگ ءُ زورگ، مردمءِ جَنَگ ءُ کُشگ، دُزّی ، ڈُنگی، لُچّی، لگوزی، پدگُشی ءُ مُناپکی وَ بئے نہ ینت کہ اے دروھ نوں چو ھونا چاگردءِ رَگ ءُ ریشگاں ھوار بوتگ ءُ دم نہ بروکیں گردشے کنگ ءَ اَنت ۔ احوالکارنی چہ یکے دومی ءَ باج برگءِ ھاترا یکیں پادءِ پشتا سپتے سپتے دُروگءِ بندگ ءُ راجی سروکانی کوھ پروشیں بٹاکانی کسہ ءَ بِل کہ دگے کسّے بکنت ئے۔چشیں ھچّ زَنڈءُ گونڈیں ھبرے نیست کہ بریکنگ حالے ءِ دَرچ ءَ مہ گیپت۔ھمک دَھ ملٹاپد چینل یک نوکیں بریکنگ نیوزے مارکیٹءَ کارَنت ، سھتوکے ءِ حالرسانی ءَ پد نامداریں کمپنی ءِ اشتھارے ھمے نیمونا مھلوکءِ دیم ءَ چگل دیئنت ءُ دگہ نوکیں نیوزے ءِ شوھاز ءَ دَرکپنت۔ منی جندءِ ساھ نوں اے بریکنگ نیوزاں ھچ کمار نہ کنت بلے یک نیوزے کہ بریکنگ نہ یت منی دل ءُ دینے وتی نیمگءَ یکپارگی کشّ اِتنت ۔۔۔ بگو کجام ؟۔ شما کہ جست کنگءَ اِت، گڑءَ گشاں گوں۔کسہ کوتاھ، زی جھل ءِ حالءَ منی دلگوش وتی نیمگ ءَ بُرت ۔
’’ چین ءِ سفیر ءَ وزیراعلیٰ خیبر پختونخواہ ءَ را گشتگ کہ چین پشاورءَ ھرانی فارم اَڑ کنت ءُ ھرءِ پدریچ ءِ ودّینگ ءُ آئیءِ بیھ ءُ شر ءِ بابتاگوں کے پی کے ھکوماتا ھرچ وڑیں کمک کنت‘‘۔
اے حالءِ وانگ ءَ پد منی سِتک’’ واجہ حداءَ زور مان‘‘ ، ءِ سرءَ چہ پیسرا گیشتر مھکم بوت۔راستے کہ کسمت ءِ بدل بوھگ ءَ وھد نہ لگیت۔ حدا کہ دَنت گڑاگوھءِ سرءَ دَنت۔ھمے بزّگیںھرکہ چہ سداں سالاں بارکشی ءَ بڈَّے ریش ءُ کچکرے دِرتگ اَنت ، ھمک سھب ھیسک ءُ ھمپان ، واھُندءِ بیھار ءُ چابُکانی دیمپان اِنت، آؤوکیں وھداں ’’ ھَر رُدوم جاھاں‘‘ سارتیں ساھگاں وَپسیت، ساپ ءُ پلگاریں وردِن وارت،زَردوئی، کٹنگری، سُھرُک، کُلگ، پشّانک، روشمی تَپ ءُ لاپ دردءِ ٹُکہّ ءُ دارو ءُ درمان کنگ بیت۔ھمک روچ جانے شودگ ءُ سپاھ کنگ بیت، پہ جاندُراھی ءِ ھاترا پٹّ ءُ میداناں ، سئیل ءُ وردش ءَ پہ برگ بیت۔ راستے کہ وھد بدل بوتگ ،نوں ھرآپیشءِ لاچار ءُ بزّگ ءُ بے بستاریں ھر نہ اِنت۔ھرءِ بابتا نوں بتل ءُ گشتن ھم بدل بنت۔ مئے کرّا کہ چیزے باز بیت گڑءَ گوں ھرءِ ریشءَ ھمسنگے کن اَنت۔ چش کہ’’ آمینا کیچءَ ھرماگ ھرءِ ریش بیت‘‘۔ ’’سندھ ءَ اِمب ھرءِ ریش اِنت‘‘۔ بلے آوؤکیں وھدابتل چُش ھم بوت کن اَنت۔ ’’ ھر بے اَرزِشت نہ اِنت‘‘۔’’ گوک ءَ سوچ کہ ھر ھرید اِنت‘‘۔’’آ وَ انسانے نہ انت کہ ھر مہ وارت‘‘۔ ھرکساکہ ھرَ است یا ھرے زانت کہ کجا اِنت ءُ چتور وتی کنگ بیت اَلم ءَ جُھدے بناکنت کہ ھر سک ھرید بیت ۔چیاکہ چینی ٹرالرزانی ڈلیور اکنامک کوریڈورءَ ھرجاھ کہ گْوزَنت ،ھرءِ گوشتءِ تلبا کن اَنت۔ اے ھساباھوٹلانی دیمءَ بورڈ چو اے پیم ءَ بنت۔’’ مئے گورءَ شمارءَ ھر کڑاھی، ھرکلیجی، ھربریانی،ھر بٹ ءُ سَرَگ، ھر شاشلیک، ھرنھاری،ھر چنگ پنگ، ھر ینگ چن مین ، ھر چاؤمن دست کپنت‘‘۔
ھوڑیں بلوچاں وتارءَ چہ زمیناوَاِلّ اللہ کت، چہ ھراھم زبھر اش کت۔ ھرکسابچار زمینءِ زَّرانی وسلیہءَ ھرءِ بدلءَ ویگوءَ سوار بوت ءُ ھرے چہ وتی چاگردءَ پھک دَرکت کہ نو ں دستے ماں سرءَ اَنت ءُ ھٹررے کنگ ءَ اَنت ۔بلے باھدیں کہ نوں اے دگہ ھوش بکن انت ءُ اگں زمیناں بھا کن اَنت جھندم بکن اَنت،بلے پہ حدائیگی ھراں بھامکن اَنت کہ دیمترءَ ھرچو تلاھءِ ریٹاھرید بیت۔ گوادرءِ چاگردی ءُ لبزانکی سنگت باھدیں کہ ھرءِ اَرزِشتءِ سرا لس مھلوک ءَ سرپدی بدی اَنت۔ ھرءِ بابتاشعرءُ رم بہ نویس اَنت، سوج ءُ سری مجلس برجاہ بدارنت ءُ ھاس گرانڈانی ، شِنِکاکی دَر، زیارت مچّی، چِب ریکانی ، نیگور دیم ءُ اے دگہ ھندانی مھلوکءَ را سھی ءُ سرپد بکن اَنت کہ زمینءِ بھاءَ دستا مدار ات بلے نباھ کن اِت وتی ھراں بھا نہ کن اِت۔ گوں زمینانی بیھ ءُ شرءَ ما وتی دیم وَ چوناھیءَ سیاھ کتگ، بلکیں ھمے ھر نوں مارا پونزے دیمءَ بدی انَت۔’’ھرزندگ بات، ھروار سلامت بات‘‘۔

Check Also

March-17 sangat front small title

گوادر، ادب اور سمندر۔۔۔ فاطمہ حسن

گوادر جو کبھی اپنے خوب صورت، پُرسکون ساحلِ سمندر کی وجہ سے پہچانا جاتا تھا، ...

Leave a Reply

Your email address will not be published. Required fields are marked *