Find the latest bookmaker offers available across all uk gambling sites www.bets.zone Read the reviews and compare sites to quickly discover the perfect account for you.
Home » پوھوزانت » پوسٹ عبداللہ جان بلوچستان ۔۔۔ شاہ محمد مری

پوسٹ عبداللہ جان بلوچستان ۔۔۔ شاہ محمد مری

براث و براہندغاں
منی سئے ارمان انت:
یکے اے کہ کاش اے پُریں ہالہ اندرا مامائے شش ہشت جنک دِہ نشتیا بیثیں۔
دوہمی اے کہ مامامائے دوشاگرد ایذا سٹیجا موجودوں۔ من او بشیر بیدار۔
منی ارمانیں کہ کاش منی دوہمی پلوا مامائے سیمی شاگرد کامریڈ واحد بلوچ دِہ نشتیا بیثیں۔ منی سیمی ارمان ایشیں کہ سال دو سالاں پذاما مامائے روشا’’ پوسٹ عبداللہ جان بلوچستانہ‘‘ باروا مقالہ و ریسرچاں پیش داروں۔
ماما عبداللہ جان نا میں روشا نودوچار سالا پیش گل بی بی ، جیند اور شاہسوار نا میں سامراج دژمنانی ڈیھاٹک داثہ۔ میر یکدم تیر دھوری جلشکثہ نہ ، آں تہ نوشکی، کوئٹہ او پشینا ٹمکاناں، ودھاناں، گیہلاناں، سہنکاناں، پونشاناں شتؤ انسانی کاروانا گوں گپتہ۔
ماما گوئش کہ 1945 آ شعوری ڈولا ادبی اور سیاسی پڑا سہرا بیتہ۔ ہماں زمانغا نائب تحصیلداری گوئش کہ کمشنری اے ات۔ مئے جوائیں مڑدا وتی دوہمی ملوکیں سنگتاں پجیا افسری یلہ داتہ او 1950 آلٹ خانہ سنبھالتہ۔ اے یک نیم سیاسی نیم ادبی اور نیم سائنسی تحریکے ات۔ ہمیدا بلوچی زبان و ادبئے دیوان نہ ناما ادبی تنظیمانی پیرک پیدا بیثہ ۔ ایذا میر گل خان نصیرہ شاعری ئے اولی کتاب درکپتہ۔ ایدا آنہاں سوشلزمہ کتاب بہرکثنت ،پمفلٹ لکھث و بہر کثنت، او بحث کثنت۔ لٹ خانہ دلیلہ گپت و داثئے ڈیپارٹمنٹل سٹورے ات۔ دلیل گوں عامیں مردماں، گوں سٹوڈنٹ و عالماں، گوں سجاد ظہیر و خیر بشکا، گوں ٹانگہ و ریڑھی والایاں۔ ہمے پنچ سالی extensive بحثاں مئے سیاست و ادبہ قبلہ مقرار کتہ کہ دانڑت و مرشی برجاہ و relevant انت۔
لٹ خانہ ئے میلہ مزارانی پرشتہ تہ ماماوتی پیغامہ تالان کنغا کراچی ، نوشکی و مکرانہ نیاما گرپیڑی گھولاں بیتہ۔ نوائے بلوچستان، نوائے وطن نامیں اخبارانی کار سنبھالتئی۔ دیمارووکیں اولس سیاسی پارٹی کثئی۔ آزاتہ ’’بلوچی‘‘ آپہ کار کثئی۔ ہندے سوب وکامیابی ئے شکلیں آف نصیب بیتئی، ہندے ناکامی ئے جور تنگتغنتی۔ بلے منتہ نہ، پرشتہ نہ، سلامی نویتہ ، او امیدہ مریدی ھچ بر نہئیشتئی۔ نیشنل عوامی پارٹیا کہ آتکہ تہ سوشلزم پجیا آڑتؤ گوں نیپا سلھاڑتئی۔ سڑداراں گوں وختے کواں جنگ جھوئتئی او وختے براھندغی گاٹتئی۔
ھپتادئے دھاگ ماما زند ئے اے ڈولا چیدغ بیثہ کہ بالآخر ادب و ٹیچنگ وتی سپیشلٹی ٹاہینتغنتی۔ برکتی ایں کلاس روم و ادبی دیوان، مضمون و ریسرچ، سیمینار و مشاعرہ اے مردئے چونڈ کثغیں مورچہ بیثغنت۔ اڑزانیں کار چغل داثؤ گٹیں گر گپتئی۔ ذہن سازی ئے ڈکھیائیں کار وتی کوفغاں زرتئی ۔ کسے آکتاب دستاد اثئی کسے آقلم۔ کسے ریڈ و آ پجھار و کنا ئینتئی او کسے سیمیارے آدیم داثئی۔ نان سٹاپیا اگھی پنجاہ سال ہمے پندھاں گوازینتئی۔ گوں سیوتیں ایمانا، گوں صافیں نیتا، گوں سنگت و بیلاں، گوں نظم و ڈسپلنا۔۔۔
میر عبداللہ جانا وثی آخری بیست سالاں تہ کمالہ کار کثہ۔ آں پلوے بلوچستان یونیورسٹیا مڑدماں انسان ٹاہینغایث، تہ دوہمی پلوا سنگت اکیڈمی و بلوچستان سنڈے پارٹی نامیں رجمنٹ عوامی کاروانا اوار کثغنتی۔ آں ماہتاک سنگت ئے تاک و ورقانی اندرا ژہ جھاتیاں جناناں وثی وانوخانی دلاں شمالانی گلیں ڈیوایاں تیل و گھاسلیٹ کنغایث۔ لٹ خانہ او شمع فروزاں نامیں کتاب بلوچ شناسی شہرئے مین گیٹ انت ۔ لٹ خانہ ئے سئے ایڈیشن در کپتہ۔
بذیں مڑداں ژہ راہ سِستئی بلے بذنہ گوئشتئی ۔ آنہی اَصَل دلگوش، اَصَل تعریف او اَصَل دست بھڑائی گوں جواں مڑدان اث۔ ہر مڑدمے اندرا جوانہہ ئے پولث دیثی او آنہی گلائش کثی۔ آں فردوسماجہ اندرا بذی ئے ڈوباروخ او خوبی ئے رذوما پہ مالی اے اث۔ آنہیا کسّی نام نہ گپت بس ’’ نا پسندیدہ باتیں‘‘ ڈسثنت۔ ترجمہ کثنت و ورنایاں ترجمہ کنغئے سکین داثی۔
مروشی بلوچستانا ہمنگیں بو لک و میتگ نے، ہمنگیں پڑومیدان ، او ہمنگیں پارٹی و ادارہ نے کہ اودا ماما ئے سانجیلتغیں ذھنے سانڑیں مہ وی۔ اے ہالہ اندرا او اے شہرہ اندرا ماما ئے follower سانڑیں انت۔ایدئے سجہ ایں سیاسی پارٹیانی منشور ماما ئے فکرانی بلہ زیرنت ، کل ادبی فرد و گل وتی پوہ و زانتا مامائے وامدارنت۔ گوادر و ڈاڈر، ماوندو مستنگ ، مہر گڑھ و خان گڑھ کل ماما ماذنئے میداناں۔
ھشکاوغیں کؤرانی ڈولا بلوچہ سیاست وادب ہم وختے لاغر بیثغنت او وختے چولاں جناناں آتکغنت۔ وختے سرے آ ب اثنت او وختے آب گم۔ وختے بک و بڑیلو اثنت او وختے دلیل و منطقاں بار۔ وختے رول و رولو وختے پارٹی وتنظیم۔ بلے مئے سیاست، مئے ادب ہچ وخت سفک نہ ویثغنت ہروخت عبداللہ جانے یا غوث بشکے پہ نازینغا اِش سانڑیں ات ۔
اے بیست ستمبر ئے نوشکی اَث۔ بلوچ ئے دو ٹیلغ پتیل بیثیا لکپاسہ دگا آتکہ۔ میت زیریں کاندھی اُفکاراں کشاناں شموذاں گڑتغنت ۔ او مرشی بیست نومبریں۔ گوادرابلوچانی تلخیں مچی ایں۔ سی پیک ئے زمبھاریں۔ معجزہ کہ بینگ بہا بیغاینت۔ لاغ و مشکانی جنازہئے رُوٹہ سرا جھیڑویں۔کسے گشی آہوپرے کسے گشی سیاہیں کرے۔ گوادر مزں کوہہ بنا، رنداں وتی دیوان کثہ۔ ماما وتی گیرآرتگث۔ آنہی آدم دوستی، آزادی آبادی ئے ارمان ، او علم و کتاب ئے نصیحت ورہبند، گیر آرتغنت ۔ گوادرا پہ نوشکی سینگھارغا مری اے لوٹائینتہ۔ مکرانا، رخشانہ توصیفا سلیمان لوٹائینتہ ۔ ماما عبداللہ جانا مکران، رخشان او سلیمان یک جا کثؤ یک چھتہ شیرا نندینتغنت ۔۔۔۔۔ اے تہ بازیں سوالانی جوابیں۔ اے تہ کل سوالانی جوابیں۔

Check Also

March-17 sangat front small title

گوادر، ادب اور سمندر۔۔۔ فاطمہ حسن

گوادر جو کبھی اپنے خوب صورت، پُرسکون ساحلِ سمندر کی وجہ سے پہچانا جاتا تھا، ...

Leave a Reply

Your email address will not be published. Required fields are marked *