Find the latest bookmaker offers available across all uk gambling sites www.bets.zone Read the reviews and compare sites to quickly discover the perfect account for you.
Home » پوھوزانت » میر گل خان نصیر بحیثیت سوشلسٹ ۔۔۔ حمیدعزیزآبادی

میر گل خان نصیر بحیثیت سوشلسٹ ۔۔۔ حمیدعزیزآبادی

ہراتم کنے میرگل خان نصیر نا باروٹ نوشتہ کننگ نا پاننگا تو ای دا سرپند مسُّوٹ ” آماچ ادبی دیوان “ کنا نِزور آ کوپہ غاتا کوہِ آماچ نا خاسا اسہ تیوی او باریم ئس تخا۔ وخت ئس کہ ای میر صاحب نا زند و بود ، فن و شخصیت نا جاچ ئِ ہلنگ نا کوشست ئِ کریٹ ، تو اونا زند نا کہیی شابیت آ سرحال آک کنے تاریخ نا پنہ غاتا تالان نظر بسُّر، یقین اَٹ کن کِہ دا مشکل مس کہ ای میر گل خان نصیر ئِ اسہ بے مٹ ءُ محقق تاریخ نویس ئس نوشتہ کیو ، یا اسہ مرد مجاہد صحافی ئس۔۔؟ کن کہ دا ہم بیخی مشکل مس کہ ای اودے زالم قوت آتا خلاف اسہ مزاحمتی او شاعر ئس پاﺅ، یا اودے راج وقوم نا نبض آتیان واخب اسہ عوامی ءُ ادیب ئس سرپند مریو، یا سیاست نا پُر پِت آ کسر اٹ اسہ انقلابی ءُ راہشون ئسے نا دروشم اٹ ہُریو۔۔؟
تاریخ نا پنہ غاک دا گواہی ئِ ہم ایترہ کہ میر گل خان نصیر اسہ قوم پرست، وطن دوست و انسان دوست ءُ راہنما ئسے آن بیدس سوشلسٹ فکرو نظریہ نا ہم خواجہ اس۔ دا کُل ئِ سرحال آتا خُوڑتی اٹ جاچ ئِ ہلنگ آن پد دا حقیقت مون بریک کہ گُل خان سوشلسٹ فکرو نظریہ تون مدام ہمسفر اس۔
دا حقیقت خل ئنا زی آ چشخ ئِ کہ اسہ نیشنلسٹ ئسے کِن اسہ گچینو سوشلسٹ ئسے نا مننگ بیخی الّمی ئِ ، ولے شرط دادئے کہ او نیشنلسٹ شاﺅنزم ئِ لتّاڑسہ قومی جہُد تون اوار طبقاتی جہُدِ نظریہ نا ہم پورو وڑئٹ پابند مرئے، یقینا اندا وڑئٹ میر گُل خان نصیر ہم قومی و طبقاتی جدوجہد آ مکمل یقین تخاکہ۔
پنی آ زانت کار کامریڈ لینن سیکولر پسند و سوشلسٹ فکرو نظریہ غا جِک سلنگ آن باوجود ہم او روسی قومی روایات و ثقافت تون نہ بیرہ اُستِ حُب اٹ است خواہی تخاکہ ، بلکہ اونا زند و بودنا گجغ آک ہم روسی زند و ثقافت تون ساندہ گنڈوک اسُّرہ ، واہم او طبقاتی جدو جہد تون اوار اوار شاﺅنزم نا خلاف سنگر کریسُس۔1) (
کامریڈ لینن پائک کہ ہر قوم و راج ٹی جمہوری و سوشلسٹ کڑدہ غاتا مننگ اسہ الّمی او گپ ئسے، ہموراج شونداری نا کنڈ آ گام گیج کے یا کپ، ولے ہر راج ٹی لُٹ پُل نا گواچی مروکا بندغاک مدام ساڑی او اوفتا بزّگی آ زند ئنا ساڑی حالیت آک راج ٹی جمہوری و سوشلسٹ نظریہ غا تے ودی کننگ نا سبب مریرہ ۔ 2))
اگہ نن دا رِدئٹ میر گُل خان نصیر نا کتاب ” بلوچستان کی کہانی شاعروں کی زبانی “ نا جاچ ئِ ہلین تو ننے او کتاب ٹی بلوچ راج نا ہمپ بِٹ ، راجی و قومی ثقافتی روایات نا کہیی گچین آ سرحال آک نظم نا دروشم اٹ نظر بریرہ، واہم اونا فلسفہ ِ سیاست قومی و طبقاتی جدو جہد نا مکمل آدینک ئِ۔
روشن خیالی و ترقی پسندی نا آسمان آ دا گروشک تروکا اِستار 14 مئی 1914ءٹی میر حبیب اللہ مینگل نا اُرا خلق مینگل نوشکے ٹی ودی مس۔ پنی آ زانت کار خواجہ یوسف گچکی تینا اسہ مضمون ئسے ٹی نوشتہ کیک کہ میر گل خان نصیر نا مہروان آ باوہ تینا ہمسائیہ نواب خاران آ پختونخواہ غان بروکا مہمان ، علم و دانش نا خواجہ وزیر گل خان کنڈا پور نا قابلیت و لائخی آن پبّی متاثر مرسہ تینا مار نا پن ئِ ہم گل خان تخا۔ اندا اُمیت و اڑکّا تون کہ کنا مار ہم پگہ نا دئے وزیرگل خان گنڈا پور آن بار اسہ لائخ ءُ انسان ئسے نا دروشم اٹ گچینو پِن و کڑد ئسے نا خواجہ مرئے، میر حبیب مینگل نا اندا اُمید ءُ خواہش وخت تون اوار اوار خرُّونی نا کنڈا بھاز ترندی اٹ گام گیج کرسا کرئے۔
میر گل خان نصیر تینا تعلیم نا بِنائے تینا باوہ پیرہی آ ھند خلق مینگل آن کرئے ، او تینا باوہ پیرہی آ خلق ٹی بیرہ چار جماعت اِسکان خوانا، منہ وخت کن میراحمدیارخان سکول مستونگ(موجودہ پائلٹ سکنڈری سکول) 3 ، اپوزئی سکول ژوب ٹی خواننگان گُڈ میڑک نا امتحان ئِ سنڈیمن ہائی سکول شال کوٹ آن پاس کرئے، میر گل خان نصیر نا دا چنک سنی آن اُست خواہی اس کہ ای بروکا وخت ٹی اسہ ڈاکٹر ئس مریو ۔ اندا است خوہی ئِ تین تون ہم گرنچ کرسا سال 1932 ءٹی لاہور نا نیمہ غا سر ہلک، ہراتم او لاہور اسلامیہ کالج ٹی داخل مس تو ہمو درگت آتے ٹی لاہور علم و ادب آن بیدس سیاست نا ہم پِڑ آ اسہ بھاز بھلو پِن ئس گوندنگاکہ، دا مُست سویت یونین ٹی اکتوبر 1917ءنا پرولتاریہ سوشلسٹ انقلاب نا دئے ہم ٹِک تِسوسُس ، بالشوک پارٹی لُٹ پُل نا ساڑی نظام ئِ یک پٹ کرسا خواری کش آ مخلوق نا مدت و کمک اٹ اقتدار نا خوجہ مسوسُس، ہرا نا سبب آن تیوی انسانی راج ٹی سیاسی ومعاشی شعور نا عمل بھاز جم جوش اٹ برجا اس ، یقینا دا فکری عمل نا تہوش تیوی دنیا ئے تینا پلویڑ ٹی الکوسُس، اندا پوسکنا فکرو نظریہ نا وجہ غان لاہور ہم سیاسی، ادبی و فکری بحث و تران ، کلسہ و برانز، اخبار او رسالہ غاتا شار اس ۔ ہمو دوران برصغیر ٹی مرنگی سامراج نا قوزہ گری و نو آبادیاتی نظام نا خلاف ہر نیمہ غا سیاسی شعور بیداری نا پاسُنا جوزہ غاک ہم بھاز ترندی اٹ کاٹم ارفیسُر، داکان بیدس انجمن ترقی پسند مصنفین نا ادبی تحریک ناہم بنائی دور دورہ اس، میرگل خان نصیر اسہ کنڈان انجمن ترقی پسند مصنفین مجلس و کچاری تے ٹی ساڑی مرسا کرئے ، ایلو کنڈان آجوئی پسند قوم دوست سیاسی تحریک آتے نہ بیرہ خڑکان خنا بلکہ خوڑت مشاہدہ نا عمل آم ہم تدسہ کرئے 4۔
میرگل خان نصیر نا دا ادبی وسیاسی ماحول ٹی رُدینگ ، ترقی پسند فکرونظریہ غان دوکوپئی مننگ اسہ قدرتی ءُ ہیت ئس اس۔ او بلوچ ڈیہہ و ڈغار نا آجوئی و تینا بزّگ آ بلوچ مخلوق نا شون شرحالی کِن کانگریس نا راہشون آ تون تول بش و خُڑکی و کچاری پینگُن کرسا پوسکنو فکر ئسے تون درستی راستی مس۔
اندن او ڈاکٹر مننگ نا اڑکّا غان آجو مرسا تینا شاعری نا زرئیعہ اٹ محکوم طبقہ و تینا لُوچ و شپاد آ بلوچ قوم ٹی ترقی پسندانہ سوچ سیاسی بیداری نا نظریہ غاتے مہمیز ترسا سامراج و لُٹ پُل کروکا کڑدہ غاتا خلاف تینا جود نا باقاعدہ وڑئٹ نبائے کرئے۔
میرگل خان نصیر تینا خن تا ناجوڑی نا سبب آن تینا تعلیم ئِ نیمہ غا ہلسہ ہراتم 1934ءٹی بلوچستان آ بریک تو داڑئے میر یوسف عزیزمگسی، میر عبدالعزیز کرد آسک تینا روایتی سیاست ئِ موکل ترسا ترقی پسند سوشلسٹ فکر نظریہ تون درستی راستی مننگ تون اوار قومی وطبقاتی جدوجہد نا ہم بنائے کریسُر۔ دا ہمو دور اس کہ بلوچستان ٹی فرنگی نا زلم زوراکی نا مون انگا جمّر ہستین تالان اس، سیاست کننگ تو بھاز مُر نا ہیت ئس اس، سیاست نا پن ئِ ہم ہلنگ بھلو جرم ئس خیال کننگاکہ ، قلات نا وزیر اعظم سرشمس شاہ زلم بربریت تینا کاٹم آ مِش شاغاکہ ، بلوچ اولس غلامی نا زنجیر ٹی اختہ و جان، وطن نا سر مچارآک کاٹم ئِ تلف آ تخسہ تینا ساہ ئِ سدخہ کننگ ٹی اسُّرہ ۔ ولے ایلو کنڈان فرنگی سرکار جہُد ِ آجوئی ئِ ختم یا نزور کننگ کن گڑاس سردار آتے انعام و نوابی نا لالچ ترسا کریکہ، اوفک سرکار نا لالچ ئِ مون آ تخسہ جہدِ آجوئی نا کسر اٹ وڑ ، وڑ نا سازش آتے جِک کریر، اندا سازش آتا سبب جہدآجوئی نا بہدر آ سپائی عوامی سردار خان محمد زرکزئی شہادت نا تاس ئِ کش کیک ، اندن لمہ دہرتی نا فرزند راہشون سرمچار نورا مینگل دوران غزہ نواب خاران نا باہوٹ مننگ نا باوجود ہم خاران مِیری آن فرنگی سرکار ئِ ڈہہ تننگ اِک کہ نورامینگل تینا دمدر آ جون تون ننا قوزہ ٹی ئِ ۔ نیٹ ۔۔ نورامینگل ئِ رُوملاست فرنگی نا مُٹ ٹی تننگ اِک 5۔
میرگل خان نصیر بلوچستان نا دا خاخر دسوکا حالیت آتے ٹی میر یوسف عزیز مگسی، میر عبدالعزیز کرد آستا جہد کاروان اٹ شامل مرسا نہ بیرہ فرنگی نا خلاف توار چست کیک۔ بلکہ قومی جہد تو ن اسہ جاہ جاگیردارانہ نظام و جرگہ سسٹم نا خلاف بلوچ راج ٹی جہد ہمت، سگّھ و جیرت ، اُمید و سرسوبی نا چراغ آتے روشن کننگ تون اوار سامراجی آلہ ِ کار آتا خلاف ہم ادبی،سیاسی و صحافتی پِڑ آ عملی جدوجہد ئِ تینا زند ئنا مقصد جوڑ کرئے۔
میرگل خان نصیر جہد ِ آجوئی نا تحریک اٹ کُل آن ودیک ہمو جاگیردار طبقی نا خلاب بغاوت نا بیرک ئِ چشت کرئے ، ہراکہ جرگہ سسٹم نا زنجیر اٹ بلوچ اولس پابندِ جولان اس او راج نا خاچوکا جوزہ غاتے وگائفنگ کِن تینا قلم ئِ بادوی ترسا پائک۔
ہماری شومئی قسمت اِک تصویر ہے جرگہ
بلوچوں کو مٹانے کی یہ اِک تدبہر ہے جرگہ
اگر ٹھہریں تو سر پہ تیشہ سردار آتا ہے
اگر بھاگیں تو کیسے،؟ پاﺅں میں زنجیر ہے جرگہ
یہ جرگہ دشمن ِ آئین و قانون و شریعت ہے
ہمارئے واسطے اک دوزخی تعزیر ہے جرگہ
میرگل خان نصیر بلوچ راج ٹی جاگیردارانہ نظام ئِ بلوچ اولس نا شون و شونداری یا ردم نا مون اٹ اسہ زنڈو دیوال ئس سرپند مسکہ، انتئے کہ جاگیردارانہ نظام نا خلاف بغاوت کننگ جمہوریت و سوشلزم نا اصل روح و دروشم ئِ 1948ء ٹی میرگل خان نصیر تینا پنی آ ترانہ ” راج کرے سردار“ اٹ جاگیردارانہ نظام نا خن تہ خن تے ٹی خلسہ پائک۔
بچے روئیں نین گنوائیں
بوڑھے در در ٹھوکر کھائیں
چُھپ چُھپ مائیں نیر بہائیں
بھیک ملے نہ اُدھار۔رئے بھیا
راج کرئے سردار
ترقی پسند ادب نا منشور ہم دا پائک کہ:۔
٭ ادب بیرہ حُسن دروشم نا پیدا گیر اف، بلکہ او حقیقت نگاری نا میوہ ہم ارئے
٭ ادب بیرہ خوشی و شادکامی نا زرئیعہ اف بلکہ خیال و فکر آتا تالانی نا پِن ہم ارئے
٭ ادب نویکل اسٹ نا ودی کروک اف بلکہ راجی شعور نا اسہ گچینو ٹھیکی اس ہم ارے
٭ ادب بے سوبی و بے مرادی تا ہوغنگ اف ، بلکہ خوشی و زندہ مننگ نا تُغ تا اسہ شابیت ءُ ھندئسے
٭ادب خیر خیریت نا ہنین آ لولی تون اوار احتجاج ءُ برانز نا زوراک آ تران ہم ارے
اگہ نن ترقی پسند ادب نا آدینک ٹی میرگل خان نصیر نا شاعری ئِ ہُرن ، تو ننے اونا شاعری ٹی حقیقت نگاری نا برہم ، ترقی پسندفکرو نظریہ نا فراوانی و راجی شعور تون اوار، لُٹ پُل قوت آتا خلاف، احتجاج نا زوراک آ کوکار، انسان دوستی نا سرحال آک ہم گچینو فن و فکر ئسے تون نظر بریرہ۔ میرگل خان نصیر ترقی پسند فکر تون ہمسفر راج ٹی سیاسی شعور ئِ ودّیفنگ کِن اسہ پوسکنو سوب ئسے نا کلہوئے تننگ تون اوار تیوی راج ئِ تینا انقلابی کاروان تو ہمگام کرسہ پائک۔
سیپدہ دم ہوا عیاں
بڑھا چلا وہ کارواں
نہیں ہے خوان کا سماں
صبو و جام پھوڑ کر
نشاط وعیش چھوڑکر
شجاع و شہسوار بن
دلیر جان نثار بن
جوان کامکار بن
عدو پہ برق بار بن
جلا کے ان کو خاک کر
وطن کو ان سے پاک کر
قبائے رسم چاک کر
نہ خوف کر نہ باک کر
لگا نشانہ تاک کر
یہ لات کو منات کو
میرگل خان نصیر نا شنبلاخ پنی آ کتاب 1960ء نا ایب کیب ٹی چھاپ مریک ، اونا جاچ ئِ ہلنگ آن دامعلوم مریک کہ او کتاب ٹی گوریلا جنگ آتا امنّائی تون اسہ جاہ وطن دوستی، مزدور دوستی، شوان و بزغر آتا سفت و ستا غان بیدس مارکس و لینن نا کار و کڑد نا ہم سفت آک قلم بند او۔
ہراتم 1978ءٹی اوغانستان اٹ قومی جمہوری انقلاب نا دئے ٹِک تِس ، تو شنبلاخ نا کِہیی انقلابی و مزاحمتی آ نظم آک ریڈیو اوغانستان آن گچین آ ساز و زیمل تون شینک مرسہ کریرہ 7))
1948ءٹی میرگل خان نصیر نا چھاپ مروکا کتاب ” شپ گروک “ ٹی سیاسی ، معاشی لُٹ پُل نا سامراجی سازش آتا سرحال تون اوار قومی جدوکہد نا پاسن آ جوزہ غاک ہم اسہ زیباﺅ دروشم ئسے اٹ درشان او، یقینا دا کتاب سامراج نا ماس چٹ آتے گہس ہم ساچتو، بدنام زمانہ ایوبی امریت کتاب ئِ تینا قوزہ ٹی کرسہ ، دا نا خوان و تخنگ آ پابندی نا حکم ئِ جاری کرے۔
” بلوچستان کی کہانی شاعروں کی زبانی “ میرگل خان نصیر دا کتاب ئِ 1968ءاٹ دوران اسیری ساہیوال زندان ٹی نوشتہ کرینے ، ود کم 9 سال آ پد بلوشی اکیڈمی شینک مس، دا کتاب ٹی بلوچ قومی ثقافت و گچین آ روایات آتا اسہ آفاقی ءُ رِد و بند ئس مون آ بریک۔
” گرند “ دا کتاب ہم دوران زندان1971ءٹی نوشت مسُّونے ، گرند نا تیوی شاعری ہم سامراج دشمنی، جاگیردارانہ سسٹم تون بغاوت و سوشلزم فکرونظریہ نا بِسٹ گواہی ئِ ایتک۔
”بلوچی رزمیہ شاعری “ دا کتاب 1979 ٹی شینک مریک دا کتاب ہم جیل و زندان تون اوار لِکّھنگانے، دا کتاب ٹی جنگی حکمت عملی نا گچین آ سرحال آک ساڑی او۔
” ھون ئِ گوانگ “ دا کتان ئِ ہم ایلو کتاب آ تیان بار دا عزاز ہم دوئی ئِ کہ او ہم مچھ و حیدرآباد جیل نا مون انگا کوٹھی تہ ٹی نوشتہ مسُّونے
” گلگال “ میرگل خان نصیر نا دا شاعری نا کتاب ئِ کہ دا نا پیش لوز میر غوث بخش بزنجو نا مبارک آ قلم ٹی نوشتہ مسُّونے۔
” مشہد نا جنگ نامہ “ خانِ معظم ولی آ نوری نصیر ؒخان نا دلیری، جنگی حکمت عملی، دانائی ، عدل و انصاف و اونا قومی کارنامہ غاتیان میرگل خان نصیر بیخی متاثر مرسہ تینا پن ٹی تخلص نا جاگہ غا ” نصیر “ پن ئِ اوار کریسُس، یقینا دا اونا عقیدت مندی و دوستی نا پاشنگا ثبوت ئِ۔
میرگل خان نصیر مشہد نا جنگ نامہ کتاب ئِ نوری نصیرؒ نا پن آ کرینے، دا کتاب صد پنہ غا تالان ئِ ، ہرا ٹی نوری نا دلیری و بہادری ، دانائی و حکمت عملی تون اوار مشہد نا جنگی داستان ہم بیان کننگانے ، میرگل خان نصیر کتاب نا پیش لوز ٹی نوشتہ کیک ” ہرا وخت ای ہشت میکو جماعت ٹی خواناٹہ تو دا جنگی داستان ئِ بٹے خان مینگل آن بِنگُسٹ ، ای اندا داستان ئِ نوٹ کرسہ شاعری نا دروشم تِسوٹ۔
پنی آ ترقی لوز گِر کامریڈ شاہ محمد مری پائک کہ میرگل خان نصیر شاہ نامہ فردوسی نا وڑئٹ بلوچ تاریخ ئِ شاعری نا دروش اٹ اتنگ خواسہ کہ ہرا کہ دا اونا اولیکو کوشست ئس، دا کتاب 1981ءٹی براہوئی اکیڈمی نا نیمہ غان چھاپ مس ، میر صاحب نا دا براھوئی زبان اٹ اولیکو کتاب ئِ۔
میرگل خان نصیر نا براہوئی شاعری نا بابت اٹ براہوئی و بلوچی نا پنی آ محقق، خواجہ اثیر عبدالقادر شاہوانی تینا پٹ پولی جاچے برجا تخانے، امیت ئِ کہ خواجی اثیر نا پٹ پولی کوشست سعسوبی نا کنڈا گام گیج کرو۔ 8
” سرِوادیِ سینا “ میرگل خان نصیر تینا ہم فکر آ سنگت، اردو نا پنی آ ترقی پسند شاعر و ادیب فیض احمد فیض نا کتاب سروادیِ سینا ئِ بلوچی زبان ا ٹ بدل کرینے۔ ہرا 1982ء ٹی قلات پبلیشرز کوئٹہ غان چھاپ مریک۔
” بلوچستان قدیم اور جدید تاریخ کی روشنی میں “ دا کتاب 1977 ءٹی حیدرآباد جیل ٹی نوشتہ مریک، سال 1982ءٹی نساءٹریڈرز کوئٹہ غان شینک مریک۔
میرگل خان نصیر نا شاعری نا جاچ ئِ ہلنگ آن پد دا حقیقت مون آ بریک کہ او انت ئس کہ شاعری نوشتہ کرینے ، او شاعریک جیل و زندان تیٹ نوشتہ مرسہ مسونو، ہرا کہ او تینا فکر و نظریہ تون وفا کننگ نا کُل آن بھلا ثبوت ئِ۔ میر صاحب نا تیوی زند اصول پرستی و ترقی پسندی نا سیاست اٹ تدیسہ7دسمبر 1983ءٹی دا کوڑی آن موکل کرئے۔
    کتاب آک
1۔ قومی سوال اور مارکسی بین القوامی، ٹنڈگرانٹ پنہ نمبر 104
2 ۔ قومی سوال اور مارکسی بین القوامی(، ٹنڈگرانٹ) پنہ نمبر75
3۔ یاد رفتگان  ( صلاح الدین مینگل )پنہ نمبر43
4۔ کاروان کے ساتھی  ( شاہ محمد مری) پنہ نمبر 2
5۔بلوچستان میں سرداری نظام (عبداللہ جان جمالدینی)
6۔میرگل خان نصیر  ( شاہ محمد مری ) پنہ نمبر99
7۔ میرگل خان نصیر  ( شاہ محمد مری ) پنہ نمبر50
8۔ ہفتئی تلار شمارہ نمبر 18 تا24 اکتوبر2014

Check Also

March-17 sangat front small title

گوادر، ادب اور سمندر۔۔۔ فاطمہ حسن

گوادر جو کبھی اپنے خوب صورت، پُرسکون ساحلِ سمندر کی وجہ سے پہچانا جاتا تھا، ...

Leave a Reply

Your email address will not be published. Required fields are marked *