Find the latest bookmaker offers available across all uk gambling sites www.bets.zone Read the reviews and compare sites to quickly discover the perfect account for you.
Home » پوھوزانت » ملا فاضل ماں لیمارکیٹا ۔۔۔ ذوالفقار علی زلفی

ملا فاضل ماں لیمارکیٹا ۔۔۔ ذوالفقار علی زلفی

شام کنگ ءَ رند من کوپے چاہ دیما کت ٹیلی وژنئے چینل جیو نیوز ءِ سرا کت…حامد میر ئے پروگرام کیپیٹل ٹاک بوگاات۔۔۔سیاستدانانی ککار و جگّا ات ،سہ کس اِت انت , سہیں یک دگری آ دزو ڈنگ گوشگا اِت انت۔۔۔من اے ڈرامہ بازی ومیڈیا ئے ریٹنگ پالیسی سرا جیڑان اتاں اناگاہ موبائلئے توارا منی دلگوش وتی نیمگا ترّینت۔۔۔اے منی سنگت رزاق سربازی ئے فون اَت…من فون چست کت۔۔۔
“ھاں واجہ , چے کنگ ئے؟” رزاق ئے توار اتک…
“کیپیٹل ٹاک چارگ اوں”…
“سوچ کیپیٹل ٹاکا, جلدی جلدی بیا لیمارکیٹا ادا وت کیپیٹل ٹاک انت”
“چیا زاناں , چے بوگ انت؟”…
“بس تو بیا یار , جلدی بیا”…
من اشتاپ اشتاپا چاہ وارت , دراتکاں…چنگ چی رکشہ گپت وتا لیمارکیٹ ئے چاھے ھوٹلا سر کت…ھوٹل ئے ڈنا سڑک ئے سرا ٹیبل جتگ اَت , دراھیں ٹیبل پْر اِت انت…
اے ھوٹل یک وھدے لالا منیر ئے نندگئے جاہ بوتگ , لالا سر شپا اتکگ داں شپ ئے ادار دو آ ھمدا دیوان ئے کتگ ۔پمشکا لالا ئے شھادتا رند بی ایس او ئے ورنایاں لیمارکیٹ ئے چوکہ نام شھید لالا منیر ایر کت بلے اے نام جاہ نہ کپت۔۔۔چوناہیا اے ھوٹل بازیں مردمانی جاہ بوتگ چوشکہ لالا لعل بخش رند , لالا ئے دیوان ھمک شپ اے ھوٹلا برجاہ بوتگ اَنت…لالا بیچارگ زند ئے گڈی روچاں ویل چیئر ئے سرا بوتگ…لہتیں ہندو ورنایاں لالا وتی ھمراہ آورتگ پدا یک پہ یکا مردم چوں بینگئے مکسکا پْلّیں لالا ئے سرا مچ بوتگاں۔۔۔سیاست , لبزانک , مذہب , فلسفہ , چاگرد ھرچ بنگپ ئے سرا دراجیں گپ و تران بوتگ۔۔۔لالا آ وت باز گپ نہ جتگ گیشتر دگرانی گوش ئے داشتگ۔۔۔
من ھوٹلہ رسگا رند مدیمی جاگاہئے سرا چمشانک دات , چاراں رزاق , جمیل امام و حیدر ناز وت مہ وت نشتگ و گپا اِت انت۔۔۔من ھمایانی نیمگا شتاں…دروت و درھباتا رند من رزاق جست کت “ھاں باریں چے قصہ انت؟”۔۔۔انگت گپ منی دپا اَت کہ “سلام علیکم” ئے توار ا مارا درستان دگہ نیمگے برت…آ زاھد بارکزئی اَت , زاھدئے ھمراہ یک کماشے اَت…کماشے گندگا من پاد اتکاں “چونے واجہ؟” من کماشئے نیمگا دست ٹھل کت بلے کماشا منا اصل حساب نہ کت او نشت…
منی دیم چوں الّوکئے شلوارا کپت۔۔۔دروت و درھباتا رند زاھدا پجار ئے اگدہ وتی سرا زرت…
“اے واجہ رزاق سربازی انت , ندکار انت , حالتاکانی تہا نبیس ایت , یک وھدے بلوچی چینل وش ءَ کارا بوتگ , واجہ لبزانکئے سرا صاحبِ نظر انت”۔۔۔
“اے واجہ جمیل امام انت , بلوچی ماھتاک سچکانئے شونکار انت , مئے باز سرپدیں سنگت انت”۔۔۔
“اے واجہ بلوچی زبانئے آزمانک کار انت , واجہ ئے نام حیدر ناز انت , اے ھم باز وانوکیں سنگت انت”۔۔۔
“اے واجہ ذو۔۔۔..” زاھد ئے توار کماشا پروشت…
“بس بس ایشی آ من زاناں , اے آشوبی انت” کماشا تژن جت…
زاھدا بچکند اِت , من نزانت چے بکناں پمشکا ارو برو عینک کشت و پھک کت…
“اے واجہ ملا فاضل انت , شما زلفی ئے آرٹیکل ستکگیں بیگاہ وَ ونتگ , ھمیش انت واجہ منا گوں دوچار کپتگ مروچاں منی مھمان انت” زاھد ئے توار پدا اتک…درستاں سر سرینت…
نی من رزاقئے مول و مراد زانت کہ آ چیا گوشگ اَت بیا لیمارکیٹا ادا وت کیپیٹل ٹاک انت…من بلے سک بے وار اتاں چیا کہ کماش یکو منا چارگ اَت…ھمے دمانا بار والا آ چاہ آؤرت۔۔۔ھو راستے , زاھد بارکزئی ئے پجار ا من کناں۔۔۔.زاھد بارکزئی مئے چاگرد ئے حساس تریں مردماں چے یک اِنت , سک سرپدیں او وانندھیں مردم انت۔۔۔واجہ بارکزئی ئے پہ راج و لبزانکا دراجیں جھد انت بلے دائم وتا پشتا چیر دنت۔۔۔
“ھاں ملا چون انت کراچی” رزاقا چاھے کوپ چست کت و جست دور دات..
“شرانت , دراھیں گنوک اَنت پمشکا برابر اَنت”۔۔۔
“گنوک انت؟ چوں ملا , چون گنوک اَنت؟” اے حیدر اَت…
“اے چے چوں من نزاناں , بس گنوک اَنت”…
زاھدا دیست سنگتانی موڈ خراب بوگ انت آنہیا زوت زوت ھبر دگہ نیمگے برت “ملا تو مارا چاکر و گوھرامئے شعر ا بگوش باریں”۔۔۔
“چاکر و گوھرام پرچا , غنی نقش پرچا اناں”…
جمیل امامئے بھتئے کپگ ومئے دیم بٹّیں بوگ “چاکر مئے ھیرو انت”۔۔۔
“ھیرو ! ھیرو چی انت”۔۔۔
نی ما دراھیں یک دگری ئے دیما چاران اتیں کہ چے بگوشیں کہ ملا ئے توار پدا جکس اِت “ھاں اڑے اے ھیرو چے بلا انت؟”۔۔۔.
زاھد بارکزئیا لنکک ئے گوما عینک شر کت و آھستو آھستو گپا لگ اِت “ھیرو ھما شخصیت انت کہ آ راجی زند ئے تہا بدلی کاریت , آنہیا دیمروی دنت” سھتکے آ ھاموشی آ پد گپ ئے پدا جوڑینت “ھیرو مزنیں کارانی سوبا ابدمان بنت و پہ آیوکیں پدریچ و درور جوڑ بنت”…
“زاناں راجی زند ئے تہا بدلی آرگا راج ئے وتی کرد نیست؟” ملا ئے چم زاھد ئے سرا اِت انت…
من دؤر کت “واجہ بدلی آرگہ تہا ھرکس ئے کرد انت بلے اے جھدا راستیں نیمگا برگ , مردماں سر و سوج کنگ , آیاں جھد کنگ ئے سکین دیوک رھشون بیت , ھما رھشون ھیرو جوڑ بیت”…
“بچار ملا جان , ھنچوشکہ سید ہاشمی انت , سید مئے لبزانکئے ھیرو اِنت , آنہیا لبز بلد اڈ کتگ , سیاھگئے راست نبیسگ ئے سرا جوانیں کار کتگ , ناول نبشتگ , شعر پر بستگ” حیدر ناز ا منی گپ دیما برت۔۔۔
“لبز بلد اڈ دیگ پٹ و پول ئے کار نت کہ دگنیا ئے تہا باز کسا کتگ , اگاں پٹ و پول کنگا چے مردم ھیرو بیت گڑا فقیر شاد ھم ھیرو انت , مٹھا خان ھم او دگہ بازیں پولکار ھم ھیرو اَنت۔۔۔پش کپت سیاھگ ئے سرا کار گڑا منی دلا ضیا بلوچ ھم ھیرو انت یا بگندے سائیڈ ھیرو ببیت” ملا گپ کنان و کندان اَت۔۔۔
“واجہ منی ھیالا شما گپا سرپد نہ بوتے” جمیل اماما سر چنڈاِت…
“گڑا شما سرپد کن اِت نہ , ھیرو چی انت او پرچا زلوری انت , پدا منا اے ہم سرپد بکن اِت ھرچ ھیرو ئے زمانگئے مردم پرچا شمے نزا زیرو اَنت؟”
(روان انت)

Check Also

jan-17-front-small-title

شاہ لطیف،صوفی نہیں، یوٹوپیائی فلاسفر ۔۔۔ شاہ محمد مری

اچھے لوگ انہیں سمجھاتے رہے کہ انہیں اس سے کوئی فائدہ نہیں ہوگا ۔ کسی ...

Leave a Reply

Your email address will not be published. Required fields are marked *