Find the latest bookmaker offers available across all uk gambling sites www.bets.zone Read the reviews and compare sites to quickly discover the perfect account for you.
Home » حال حوال » ماما عبداللہ جان جمالدینی ۔۔۔ نوشت۔ عبدالغنی بلوچ

ماما عبداللہ جان جمالدینی ۔۔۔ نوشت۔ عبدالغنی بلوچ

ِ دو شمبے نا دے (24اکتوبر 2016) آ یانزدہ بجہ غا بلوچستان نا پنی آ زنتکار، ادیب و صحافی ایماندار ماما عبداللہ جان جمالدینی نا یات اٹ بلوچ اسٹوڈنٹس ایکشن کمیٹی نا پارہ غان اسے سیمینار ئس اڈ ہلک ہراٹی بلوچی و براہوئی نا ادبی زانتکار وشاعر اک بشخ الکور۔ اسٹیج نا زمہ واری تے ڈاکٹر عمران دوئی کرسہ سیمینار نا برجاکرسہ ماما عبداللہ نا یات اٹ اسے شعر ئس پارے اوکان گڈ براہوئی ناشاعر، ادیب ڈاکٹر لیاقت سنی صاحبے تینا خیالاتاتے تالان کننگ کے سٹیج آ خوائفے۔
ڈاکٹر لیاقت سنی صاحب تینا تران اٹ پارے دنیا ٹی ہزارا بندغاک بریرہ ولے ہمو بندغاتا پنک زندہ سلیرہ ہراتا اسے نظریہ ئس مرے اوتا شاگرد اتا اوتا ہمو نظریہ ئے مونی دیرہ۔ نوشکی ہمو خوش قسمتاجاگہے ہراڑے گل خان نصیر،آزات جمالدینی، ماما عبداللہ جمالدینی کونو عظیم اننگا ہستی ودی مسونو۔ مامانا نظریہ سیوت، مہر مریبت و راج نا شونی کن اسے گچینو کڑدار اسے۔ دانا کڑد نا برجائی داسکان سلوکے ہرادے نن اینو دا پروگرامے اڈ تروکا طالب علم آتیٹی خننگ اون۔ ماما نا نظریہ فلاسفی پارہ غا مضبوط ئس و داسہ داطالب علم آک پین مضبوط کیرہ۔ ولے ماما تینا زند اٹ ارٹمیکو خن براہوئی زباناداخہ خیال کتو۔
داکان گڈ آزاد جمالدینی تینا تران اٹ پارے بابا عبداللہ جان جمالدینی گل خان نصیر، بابا خیر بخش مری،نواب اکبر بگٹی و شہید فدا تون ہم راہ مسونے۔ ماما قندیل بلوچ صباء دشتیاری ڈاکٹر شاہ محمد مری نا استاد ہم مسونے۔ بلوچ قوم نا پنی آ زنتکار آزات جمالدینی نا ایلم مسونے۔آزاد جمالدینی مستی تران کرسہ پارے کہ ای بابا تون اوار اسوٹ پاریٹ بابا دعا کر ای ہم نے آنبار او ادیب ئس جوڑ مریو تو بابا پارے اخہ نے جوانو ادیب ئس جوڑ مروئی ئے۔نے گل خان نصیر جوڑ مروئی ءِ۔ بابا نوشکی ٹی بزغر و مظلوم مزدور تا ویل و سختی تے مُر کرے۔کنے دا پنتے تس پارے کہ نے عطا شاد جوڑ مروئی اے نے سید ہاشمی جوڑ مروئی اے۔
داکان گڈ سیمیار ان تران کننگ کن ڈاکٹر عطاء اللہ بزنجو سٹیج آ بس تینا خیال آتے تالان کرسہ پارے اینو نا دا گچین آ سیمینار ءِ اڈ تروکا بلوچ اسٹوڈنٹس ایکشن کمیٹی نا کماش و ایلو باسکاتے مبارکبادی ایتیوہ۔ ‘‘خواجہ تران کرسہ پارے ماما زند اٹ ادب، صحافت،استاد نا کڑد آتے جوان وڑ اٹ پورہ کرے۔ ماما نظریاتی و فکری سوچاتے مستی درے و فکری عملی جدوجہد ئے برجا تخا۔1950ء اٹ لٹ خانہ نا بنیاد ے تخا نظریاتی سنگتا آتیتون اوار مرسہ راج اٹ گچینو پن ئس دوئی کرے۔زند نا آخری کو بشخ آتیٹی فالج نا بیماری تون مون ترسہ پدی سلتو سیاسی میدان آ سلیس۔
داکان گڈ تلار نا شونکار عبدالرازق ابابکی تینا خیال آتا درشانی ءِ کرسہ پارے بی ایس او نا کمک اٹ بھازاک پوئی میدان اٹ دڑینگار۔ اندان دا ورنا تا نیام اٹ راج نا زانتکار شاعراتا باورٹ معلومداری ودی کرے۔دانا بنیاد ئے ڈاکٹر سلیم کرد ماما جمالدینی تخار۔ ماما ادب نا پارہ گچینو کاریم کرے تینا قومے اسٹ کرسہ اودے ونڈ مننگ کن التو۔سی او پنچ سال نا ناجوڑی آن باوجود تینا قوم نا خذمتے برجا تخا۔زند اٹ بلوچ قوم نا شونی کن قربانی تس تینا نوکری ئے ہم الّا۔اینو نا بایدے ماما نا دا جہانان رخصت مننگ آ اونا ہمو فکر و فلسفہ ئے مونی دین۔
پروفیسر سنگت رفیق بلوچ تینا خیال آتا درشانی اٹ پارے ماما استاد، صحافی، مصنف، ادیب و کہی گچینا کاریم تا خواجہ پاننگیک۔ماما اسے گچینو نوشتونک ئس اس۔ او تینا زند اٹ بلوچ قوم نا خاطر آن تحصیلدار نا نوکری ئے الا۔ماما تینا نظریہ ٹی مزدور تون اوار سوشلزم، کمیونزمے دوست تخا۔
پڑو نا شونکار خواجہ سعید نور تینا تران اٹ پارے ماما عبداللہ جمالدینی نا ادب نا پارہ غا گچینو کڑد و خذمت اسے۔ لٹ خانہ دانا اسے سوبُر او مثال ئسے۔لٹ خانہ ٹی منہ پین زنتکار ہم اسُر دنکہ گل خان نصیر، عبدالکریم شورش۔ دانا خوش نصیبا باسکاک اسٹ گل خان نصیر ایلو ماما عبداللہ جمالدینی ئس۔ افسوس نا ہیت دادے کہ اینو ننا نیام اٹ گڑاس راج نا زانتکاراتا پن استان ہننگ او دنکہ حسین عنقا، غلام محمد شاہوانی۔ نن تینا راج نا گچینا شخصیاتاتا باروٹ خوانن و اوتا فکر سوچے مستی دین۔ اینو ننے ادبی حوالہ غا کاریم کرسہ سائنسی حوالہ غا ہم کاریم کروئی اے دا پارہ غا کاریم بھاز کم مسونے ۔ نن تینا گچینا زانتکار، ادیب، فلاسفر آتا فکر سوچے پین سوبر کین۔
داکان پد جیئند جمالدینی ماما نا زند نا راج و قوم کن خذمتاتا ذی گونڈو تران ئس کرے۔
بلوچ اسٹوڈنٹس ایکشن کمیٹی نا کماش رشید کریم بلوچ تینا تران اٹ ماما جمالدینی نا فکر و سوچے مونی دننگ کن خوانندہ گل ئے اگاہ کرے پارے کہ راج ئس ہمو وختاشون الیک ہرا وختااونا ورناک خوانندہ غاک اوتا فکر ے مستی دیرہ۔ اینو بلوچ قوم نا ورناک ہم تینا ہیرو، زانتکار، دانشور و شاعر اتا کسر ارائی مرسہ تعلیمی میدان اٹ اوتا سوچ و فکر ئے پین سُوبر کیننگ او۔
پروگرام نا آخر اٹ بلوچ اسٹوڈنٹس ایکشن کمیٹی یونیورسٹی یونٹ نا سیکریٹری مہمان تا منت واری ئے ادا کرسہ پارے کہ ای اینو تینا قوم ناسٹیج آ تولوکاادیب، شاعر، زانتکار و استاد و سیمیناراٹ بشخ الوکا ورنا تا است نا حب اٹ منت وار اوٹ۔ سیمینار اٹ بشخ السہ ننا ورنا تا است بڈی ئے کریر۔

Check Also

jan-17-front-small-title

یونیورسٹی آف بلوچستان

بلوچی ڈیپارٹمنٹ جامعہ بلوچستانا شعبہ بلوچی ہر سالا ادیباں لائف اچیومنٹ ایوارڈ دات ۔ اے ...

Leave a Reply

Your email address will not be published. Required fields are marked *