Find the latest bookmaker offers available across all uk gambling sites www.bets.zone Read the reviews and compare sites to quickly discover the perfect account for you.
Home » پوھوزانت » جوانسال بگٹی ۔۔۔ از غلام نبی ساجد بزدار

جوانسال بگٹی ۔۔۔ از غلام نبی ساجد بزدار

نوذدہمی صدی چھےکڑی بزاں آخری ساہاں گرئغےں، انگرےز وثار نوخی برجاہ کنغیں کہ 1885 سالا بگٹی راجِ ٹکرے، ہےژوانڑیں لافا جوانسال بگٹی بیثہ ۔ اے ہماں بار ی انت کہ انگرےز ہ غلامی ئے لوپھ داں بلوچ راجِ گڑدنا سر بیغاث۔ سلےمان کوہے بزدارانی حان بندے زوراخےں ٹکر، چو گوئزورئے دانہے ڈولا شتو بے گواہ بیغاث۔
وذ جوانسال گوشیث © ©: 1893 بلوچ قومئے خان ، خدائےداد خان بندی کنغ بیثہ تہ آں وختاں من ےہ پھشک توخا، دنتان بورےنوخےں چکے ثاں۔ اے حساوا جوانسالہ ودی بیغہ سال1885-84 اےں۔ دانی جوانسال مشغاِث کہ مکہےں ماث زےاں بیثی۔ ڈاڈی آ وثی نواسغ گوں نازاں لولی آں پالثة روذےنتہ۔ لولی تہا شف پھذی پہراں دعا لوٹھثی:
”اﷲ منی بچا سئے شے نصیو کھن، حج، لج، او سےمی مےل مچھی آں جوائےں ٹونک“
آمین اےں وختے اث ، جوانسالہ زیندا اے کلےں ٹونک پےلو بیثغا ں۔ جوانسالہ خانوادہ شے دو سے پیڑی ئَ مذہبی خانوادہ ئِ اث۔
ہو دا! بےائے کہ جوانسالہ شاعری او زیندے پےرا بلوں ئُ دانکے پہ شاعری باروا عرض کنوں ۔زانت کار زہر مہ گر انت کہ من کسئائےں دفا مزےں ٹونکے مہ کھناں۔ بل گنوکاں کھے داشتہ کنت۔ ©© ” سچار سولی سرا ملامانی آبرو انت“
مئے مزنےں ڈکھ اےش انت کہ ما دانی مشرقی اومغربی لہجہ عذاواں شے درا نےاتکغوں۔ زانت کار ونکد کار دُراہ شاعری و ادبہ کچ و وےتراں گوں حواساں کنت، بل پھے شاعری آ ےک حواسے کہ آنہی ئَ احساس( مارشت) گشنت ، کیل وکچ کنگئَ کارمرز کنغ لوٹیث۔
مناں ےک برے سفرے وہداں دکاندارےں گوں بیثہ، من آں مڑدے تب زانت ، بلے وتی تبا ہم مجبور بیثو مزےں وختے پھذا من آں مڑدا شےرے اش کنائےتہ، مڑ د زہر گپہ ، گوشیث مناں گوں سیث ، نقصانہ ٹونکاں کھن، کئی کرا زر بازےں ، زر جوڑےنغے طریقہ چے انت، اے حبراں کھن مناں گوں شاعریاچے کار؟ او آخرا مناں معافی لوٹھغی بیة۔
مئے دور باری ئے بازےں نقاد دہ چھڑو دنکاندار انت۔
نی اے گشگ کہ راست چے اےں؟ نیکی تھاں مُرگے نام اےں؟ انصاف کہ ہر کسی گرا وتی وتی اےں ۔ (چھے بھا کرزیث) نےکی وبدیئِ ہر ملک و ہر جاگہئَ ہر چاگردا وتی وتی کچ و کیل انت۔
انسان و دومی ساہدارانی تہا مزنےں فرق دہ ہمےش اےں کہ انساناتہذےبہ مزلاں رواں بیغا پھیشہ وتی ذات ِ پھجواری نےاما دل گوش داتہ۔
شاعر حذائی خاصےں مخلوقے ےا ناں۔ شاعر عامےں نفع سیث تولوخےں مڑدم انت ےا ناں؟ اے ٹونک مزنےں پٹ و پولے لوٹ انت ، مئےں وسی کارے نئےں۔
سارتر گشیث کہ خالقِ لوز ےا تہ گوں واجہ حذا ٹہیث ےا گوں شاعراں۔ ددئےں تخلیق کنت و وتی خلق کُثغےں مخلوقا دوست دار انت۔
ہو دا ! راستےں کہ شاعر وتی اندرے جذبگاں درشان کنغہ ہنرا زانت، او دومی مردم نہ زاناں۔اے زانت شاعراں شے دومی نادیثغےں طاقتے آ دست کفیث ےا وثار استےں نےش؟ اے سوالانی پسو داں دام راشاں کسا داث نخثہ۔
سقراط گشیث:
” آں قدرت کہ شاعرا دز کپیت، چھڑا ہنرے تہ نئےں۔ اے ےک الہامی طاقتے کہ شاعرے سرا پاکےں طاقتانی ساہگےں، شاعر نرم دل و بال گروخےں ےک مقدسےں ہستی اے۔ شاعر سرا الہامی طاقتانی دست اےر بیث و آنہی ئِ وتی حواس پیلویا مہتل مہ بنت ، آں ہچ تخلیق کت نہ کت۔ واجہےں حذا شاعرانی دماغاں مہتل کنت و شہ آہاں پےغمبرانی کاراں گیڑت“
ہمے ٹونکاں افلاطون چوں گشیث:
” شاعری ےا زانت ےکےں خاصےں گنوکی ئے ےکے خاصےں حالتے، ہماں مردماں گوں کفیث، کہ آہانی سرا ازم ِ پری آنی ساہگ اےر کفیث۔ اے جنون آہانی نرمےں ئُ پاکےں                         روحاں ہوار بی، ےک چوشےں جذبگے پےدا کنت کہ آں روح وشےں گفتارانی بنزہ ٹہنت“
مئے بزرگےں شاعر، با با جوانسال وانندہ اےں مڑدے نےاث۔ ۔مرشی اےں دور باری آنی سکول اےجوکےشن ئُ اے دنےائے گلوبل ولےج ئِ ساحری آں شے دہ واقف نےاث۔ شاعر سرا ےونانی تصوراتی پری ئِ سا کھفتہ کہ ناں ، بل ماں شری آں زانوں کہ بلوچاں ئُ بگٹی بلوچاں ہچ وختا ساڑتےں سا نصیو تہ نویثہ پری ئِ سا چوں کفت بیث۔شاعرے زیندے گواہ آنہی پھجی مڑد دہ ہچ گواہی نہ دےاں کہ شاعر زیندا پری ئِ ، سومریئِ ےا سموئِ دہ آتکہ ےا مہرواں بیثہ۔
حضرت خضرا گوں ملاقاتے جوانسال ئِ بیثہ کہ ناں ، مئے کر ا شاہدی نےست انت۔ اے پٹ و پولی کارے ، روشے نا روشے بھڑےں مڑدے اے کارا دہ کنت ، بل منی ڈولےں بے علمےں نودربرئے وس ئَ شے درا انت۔
ہو دا شاعر ے کلام مئے دستا اےں، زیند سر حال وث واجہئِ نےک نامےں مزن شانےں بچ حماد اﷲ بگٹی ئَ داثغاں انت۔ مئےں خےالاں جوانسال بگٹی ، ئُ بزدارےں شاعر علی محمد چگھا ےکےں دور ے شاعر بیثغانت۔ دوئےں شاعر قبائےلی ، سرداری، وڈےرہ شاہی ئِ ستکغےں چاگردے تہا وتی زےند گوازئنتغاں ئُ راجانی سرا قبائےلی نا روائی ئِ ہر ظلم ِ شاہد انت۔ بلوچ قبائیلی چاگرد ئِ زیند ، ڈےرہ بگٹی ئُ سنگسیلا بیث، کوہلو ئُ کاہاں ےا سلےمان کوہے بےہو ئُ بارتھی ، دراہےں ےہ ڈولا سڑاندے آماچ انت۔ دو صدی گزغا پھذا دہ زیند ہما ےہ ہندا اوشت ئِ شکار اےں۔ بلوچ معاشرتی زیندے ڈکھ و وےلان شاعر ےہ ڈولا گنداں ئُ وتی گالانی تہا درشان کنت۔ رواجانی ظلم و زوراکی، سرکار وسڑدار ہ ناروائی بلوچ مہلوق ئِ بخت اث۔
”نور چم ئِ شکیں بخت عمرہ رےا“
قبائےلی زیندے شے کلاں مزنےں پجواری ایش انت کہ آں وتی مڑدماں ہر وختا دژمنی اندرہ داریث۔ CLASH ایشی بیغے ضامن اےں۔ دومی پھلوا چھارے تہ دنےائے درائےں مہلوق او آنہانی زانت کار اے حبر سرا ہم تفاق انت کہ دژمنی، کست و سےالی، پھر وثاں دروہ، نا تفاخی انسانی صلاحیتاں برباد کنت۔ بل بلوچا چوں زےور ے ڈولا گون انت۔
جوانسال بگٹی دہ ہماں سماجے شاعرے اث کہ اوذا روز روزینی قباےئلی جھےڑو، مےڑ مرکہ، سردارے ناراضگی، او بے وسےں مڑدمے ئے نےم شفاں مےڑ زےرگ پہ وتی چک ئے ساہ پھرےزغا او ہمے شےطانی چکر ہر روشا۔۔۔
’ ’ گشاں سردارزوراخےں ، آں واژہ اےں سر و مالئے
مرکائی روغ لوٹی ، نہوری نندغے لوٹی۔
نزورےں دےن چےں چیزے آں موژےں زندگی لوٹی۔
ہمے کوہانی پچارےں ہمے کوہانی گزرانےں
”ےا ، کسے نےم شفاں لجاں گوں بند روث مرکائی، دروغےں واژہے لوغا پہ انصافے“
جوانسال بابا اے دراہےں ناروائیاں گوں اغرارئے آ گندی ، صبر وشےں بہرے ہیلا زوراوراں ہچ نہ گوشی۔ ہا، وتی ڈولےں گژنغےں ، پژدرےں مہلوقا دیندار بیغے درس دات اودیمی جہانے تھوشغاں جمع کنت۔ جوانسال کوڑی ئے جوفوآں ، بے لج و بے حےائیاں ، زوراکانی زوراوری آں گوں ہاغہےں چماں گندیث، اوہمے نتیجہ سر بیث کہ اے کلےں مرضانی علاج دینداری اومذہبی تعلیماتہ اندرا موجود انت۔ منی کار خذائی پئغام مہلوقہ سر کنغ اےں۔ زوراورانی زور اگا اوشتگ نئےں۔
کوڑی تختہ من مےذانا
منتھ و جکھثہ اژ جانا
در کھپتہ حےا گوں شانا ۔
دےمےں پے دہِ ئةُ بےوانا
گوشتہ عاجزےں جوانسالا
بےارے محمد ی اسلاما
ہندے دنےائے بے ثباتی آں چوں ظاہر کنت۔
اے دنےا دروگےں ےہ گھڑی ئے نو
قےامتئے چھوشےں پٹری ئے نو۔
بلوچ تاریخ ئُ لڈ و بوژ باروا جوانسال دہ کہنےں شاعرانی فرضی گالاں زیریث او وتی نا وسی و نا رسائی تصدیق کنت۔ وثی نواسگ ثنا اﷲ سینگارانا گشیث۔
منی ثنو، مئےں دل بندےں
حلبا آختغےں رندےں
اژہ میر چاکرہ چندےں
سخی نوذ بندغہ جندےں
غریب ئة گژنغہ سندےں
کلاتہ آسنےں زرہ بندےں ۔
ےہودےں ، کافرا پہ زندےں
جوانسال وتی دراہےں زیند دین و ایمانہ پچار کھنانا گوازینتہ، شاعری گالانی تہا اوےک عملی ایمانئے داعی اےں او ہمے ایمانہ نصیحت دہ کنت۔ جوانسال مئے سر شاعر چھگا بزدار ڈولا گوں ےقین و ایمانا زانیت کہ اعتبار، ساکھ، قول پالگ، وفاداری ایمانہ دومی نام انت۔ ساکھ اعتبار مرشی کہ دےو مالا ئی لوک قصہانی بہر ٹھہثغانت، اےشانی باروا چگھا گشیت۔
”ار مڑے( مردمے) زانتی گوں براوریغ ایمانا تلیث“
جوانسالہ زمانگ دہ ہماں انت کہ انگریز وثار نوخی برجا کنغےں، سنڈےمےن رےفارمہ پھذا بلوچ سردار وتی وتی رااجانی واژہ و واکدار ٹہثغانت بھڑ مڑدی بس سرکار داثغےں انگریز سرکارے وفاداری ئے سرٹیفیکےٹ ےا داں سردار دربارا ہند گرغے نام اث۔ بلوچی لج ، ملام، معےارو تورا ، وطن دوستی، ایمان ساکھ، لڈثو شے مہلوقا پھشت کثو روغ اث۔ معاشرہ ” غرض نئےں ایماں کھذا گےنڑئے درمانے رسیث“ ئِ عملی صورتئے ٹہثغاث۔
گوشتہ لجاوتی سنگتا ایمانا بےا۔۔ من روغاں تھو منی رندا لڈ بےا۔
جوانسال بگٹی است تہ مُلائے اث بل بلوچی اقدارانی زوالے ڈکھاں ماریث او ےک روشے مزےں حےراتے کنت، وختے سرےالےں بزاں ہوشمنداں پھول کُثہ ؛
” پھیرےں مرد ، بلوچ کہ اِخرےں مزےں خےراتے کنت تہ ےا پہ مُراذے آ، ےا پہ سےرے شاذہے آ ےا پہ مرکھے مراندے آ ، تئی لوغا نئے بچھے بیثہ، نئے تو سےر و آروسے کثہ، ئُ نئے ما تئی کھسے ئے خذا رکھیث زےاں بیغا سئی استوں۔ ڈا اے حےرات پہ چھے آ ؟“
جوانسالا جھٹے جواو نہ داثہ، بل نی کہ ناٹھی بیثہ تہ گوشتی۔
” ادا بلوچےں، بگٹی اےں براثاں اش کھنے! منی ےکے کہنےں دوست دارے ، سنگتے اث نام ثی وفا، ساکھ، ایمان، بلوچی لج تورا، حےا ،، آں مڑدا زےاں بیثغا باز روش بیثغانت۔ مرشی من آنہی پھاتےہہ داشتہ او حےرات کُثہ“
ہو ادا! جوانسالا تہ مرشاں شے نےم کرُنے آ پھےشہ لج ، غےرت، بلوچی تورا، ایمان و وفائے مرکہ حےرات کثو آنہی گور سویث کُثہ۔
ماضی پرستی مئے دراہےں شاعرانی روائتی کارے بیثہ۔ ےا حقی کہ گوئست جوائن اث؟ جوانسال دہ ہمے ڈکھاں ماریث۔
اولی زمانہ جوانثاں
مرد برکتانی مان ثاں
میر چاکری سیستان ثاں
میر مہذوی ارکان ثاں
جوانسال شاعری باز حداں دے آسانےں ، او ابہاماں شے پاکےں ۔ گشنت، کہ جوانسالہ شاعری ےک قرزتی ڈاتے اث۔ گال وپھیلوےں خےال دستاں بستغا غلامانی ڈدلا حاضر و سانڑی انت۔ جوانسالہ بچ گشیث۔
” جوانسال کہ ہر وختے پہ شےرے گشغا بشت تہ دہموذاں کہ شےر و دستانغ پھیلو مہ وثےں ، نغن و تام دفا نہ خثی۔ کسا گوں ٹونک دہ نہ خذی۔ اےکھا نشت و گالاں شُث ٹھاہےنانا، ےات کھنانا، چو الہامی کےفیتہ تہا گال سر چکی آ کھاتکاں لُڑانا“۔ ( مولانا نور محمد دہقانی)
جوانسال وتی وختے رےاکارےں او لافو اےں دنےا پرستےں لغوراں گوں ہکال و واہی آں گشیث،
مناں عبرتے کےث ژہ نی اےں لغوراں
گوشاں ژہ کھر نتھ ئُ چھماں ژہ کھوراں
زنڑکاٹ ئَ کھِلاں لاغاں ژہ زوراں
ےک پھونز ئُ بُر ئے تہ دہ پھونز موراں
جوانسال بگٹی یے دوست بشیر احمد ہ ماذن کہ مُڑتہ تہ جوانسالا باز ڈکھ بیثہ ، بگڑی( ماذنہ نام اےں) مرک سرا دستانغ ے جثی۔
بشیر احمد تئی نام اےں
بشیر تئی بگڑی تھام اےں؟
مُڑ تھو، پہ رستراں شام اےں
با با جوانسال بختاورےں شاعر ے اث کہ آنہی چماں مرشی جاور نئےثغاں۔ شاعرا ماذن مرکئے پرےشانی اث کہ پہ رستران شام اےں، اژما تھو جوانئے کہ تھو مرشاں بگٹی و مری بلکہ دراہےں بلوچ وطن ئِ ورنانی لاش کہ کھورانی دلا چھاب بیغانت تھو نئی ثغات۔ او اے دہ مئے مسترانی کھڑد انت کہ مار زےرغی کھفتہ۔
جوانسال دیندارےں او نواش روشغ داروخےں پےڈ ملائےں بلوچ اےں شاعرے اث۔ شاعری و مذہب اوار بیثغانت تہ جوانسالا بلوچ مخلوقئے دراہےں ڈکھانی علاج ہمے دینداری اوتقویّ لافا زانتہ۔
اے حبرا کئے نہ زانیث کہ رواجانی مذہب وملا تہ سرکار و سڑدارا زےات طاقت ور کنت، غربت و جہالت ایشی روذےناں مزن کھنت۔ اغاں قبائےلیت زندگ دارغی غےں تو راج ئَ جنگ ( clash) حالتہ دارغی بیث۔ مئے کرا زیند اوشتے آماچ اےں ۔ بس بلوچ زانت کاراں اومئے شاعرا گوں مئے زیندے ڈکھاں ہچ کار نےست اےں بس مئے آخرتہ فکرا بے حال انت۔
مئے دیندارےں شاعرا وتی وختے مستراں ہچ نہ گوشتہ۔ نواب صاحبا شے توپکے لوٹثی ۔
توپکے دے تہ دژمناں ٹھلاں۔۔۔ےا دئے جواو ا کہ حاترا بلاں۔”
نواب محراب خاں دورباری آں نواب صاحبا شاعر ٹھالہئِ ہےژوانی بگٹی ٹکرے ڈغارگلے زور بڑتہ۔ شاعرا ہچ نہ گوشتہ، کھڑدے سالا رندا ہمے ڈغارا شے بنوے جوانسالا داثی۔جوانسالا دہ دراہےں دینداریااوبلوچی غیرت وتورا پھجی ئَ ڈغار گرغا ”ناہ“ نخثہ۔ پھذا ہےژوانی ٹکرا گوں شاعرا دل گرانی کثو وتی ڈغار واپس گفتہ۔
روشے کہ عقلا زہر کھذا
گڑتھو عقلا سار کھذا
زہرا ولاےت وھار کُثہ
بابا جوانسالا بلوچ مہلوق ئِ دےمی جہانے زحم رہا (پل سراط) گوازینگئے فکر است اث۔ بل وتی براثانی گڑدنا زوراکانی زحما چماں گندغاث وتی شاعریا آنہاں نرمےں نصیحتاں سوا ہچ نہ گوشتی۔
مئے بازےں زانتکار پٹ و پولی وےلے آ بغےر گشیث کہ بابا جوانسال صوفی شاعرے اث۔ بَل ناہ چوشا دہ نئےں۔ کہ صوفی و ملا ئے تہا فرق کنگ مہ ویث۔
ہماں مالداری، ہماں زمینداری و ننگار کنگ، سردار داثغےں گریوےں ڈغار ئے واژہی جوڑا بندغ، مال ومڈی باز کنغ۔۔۔۔۔
انسانہ اندری جہد و سفر وثی ذاتئے پھیلو کنغ پھلوا شوہازےں۔ عشق ، انسانی شرفے پھجواری اےں۔ شاعری تو ہماں گہہ ترےں کہ زنیدے دروشماں چےٹیث زےبدار کنت۔ گوں وتی امےدو نرمےں زیملاں روحہ بھانزراں بشکیث۔دورےں دلے درماں نہ کنت آں زیند چے؟
جوانسال زیندا مار ہچ سومری وسموئِ دہ گندغا نےاتکہ، او نئے تہ عشقیہ شاعری اے۔مئے دیندارےں شاعر زوراورےں سردارے اگا چو باز نرمےں او بھلائےں ( شریفےں) بلوچے ڈولا وتی لوغے حےر لوٹیث۔ اے شاعر شے روائتی حذا او رواجانی سڑداریا باغی ئِ تو نئےں۔
بَل ناہ! اے دراہےں پےرا وتی ہندا پھذا دہ جونسال شاعری اور اقدار دوستی بے مٹ اےں۔ اے دور باری آں ملائےت وتی ڈئنڑےں صورتہ مئے دےما اےں۔ بَل آں زمانہ ئے گزر ہمےش ات۔ منی ڈولےں کمزورےں او ۔
جی حذا پاکا رنگ و اسراراں
عبرت آں کھے تئی قدرتی کاراں
ےہ شف و روشانی برو آراں
باروا چھرنت ہر دوں چھےار پہراں
لکھنڑاھار ہڑ دوں کوفغاں زواراں
(کرام الکاتبےن)
بے زکواة ئی ئَ محض مُڑداراں
چھاپ زئی اےں من رب اخباراں
گند نواں زےرے دوزخہ داراں
ہو دا ! ہمے عبراتاں کھنانا او پاکےں حذائے اسرارانی پچاراں کھنانا، جوانسال بگٹی سال1966 چھےکڑی روشاں 25 دسمبر ئِ شفا اے دروخےں کوڑی اشتو شتہ۔ اﷲ پاک ایمانا بشکیثی آمین۔
کتابےات
۱۔ بابا جوانسال بگٹی، از حماد اﷲ بگٹی
۲۔ ہشکےں رکھ سوز بنت، اﷲبشک بزدار    ۳۔ ہمے عشق لکھےں   ، اﷲبشک بزدار
۴۔ بالواں روک کتہ تماشاےے، امیر دوست
۵۔ اشتو مناں روحےں فرار، سےد خاں بزدار

Check Also

jan-17-front-small-title

شاہ لطیف،صوفی نہیں، یوٹوپیائی فلاسفر ۔۔۔ شاہ محمد مری

اچھے لوگ انہیں سمجھاتے رہے کہ انہیں اس سے کوئی فائدہ نہیں ہوگا ۔ کسی ...

Leave a Reply

Your email address will not be published. Required fields are marked *