Find the latest bookmaker offers available across all uk gambling sites www.bets.zone Read the reviews and compare sites to quickly discover the perfect account for you.
Home » شیرانی رلی » بُقچے کے اندر ۔۔۔ غنی پہوال

بُقچے کے اندر ۔۔۔ غنی پہوال

حیا کی گرہ لگے بُقچے کے اندر
تم کب تک گُڈّا گُڈّی کھیلتی رہوگی
خواہشوں کی نئی نویلی دُلہن کو
رنگین دھاگوں میں لپیٹ کر
ماتھے پر ستاروں کا ٹیکہ لگاتی رہوگی
آؤ !
حقائق کے شفاف آئینے میں
جھانک کر دیکھو
کہ تمہاری روشن کناروں والی آنکھوں میں
کتنے سمندر موجزن ہیں
اور امواج کی تہوں میں
کتنے خواب گوہربن کر چمکتے ہیں
تمہیں معلوم ہے ؟
جب تمہارے خواب
میرے خوابوں میں آنکھیں موندھ کر
مجھے مجھ سے چُرا لیں گے
تب ایک محرم سایہ
دبے پاؤں تمہارے دل کے دروازے سے نکل کر
حیا کی گرہ لگے بُقچے کو
میری جھولی میں پھینک دے گا
اور خود ساحل کی ریت میں ایسے جذب ہوجائے گا
جیسے کوئی سایہ
سایوں میں ڈوب جاتا ہے
یا کوئی تارا
تاروں میں گُم ہوجاتا ہے

Check Also

jan-17-front-small-title

گوادر کے مچھیرے  ۔۔۔ سلمیٰ جیلانی

کبھی ہم مچھیرے تھے جال میں پھنسی چھوٹی مچھلیاں پانی میں واپس پھینک ان کے ...

Leave a Reply

Your email address will not be published. Required fields are marked *