Find the latest bookmaker offers available across all uk gambling sites www.bets.zone Read the reviews and compare sites to quickly discover the perfect account for you.
Home » قصہ » امن میلہ ۔۔۔۔۔۔۔۔ حمید عزیز آبادی

امن میلہ ۔۔۔۔۔۔۔۔ حمید عزیز آبادی

اِلّہ مل آتا جنگ جیھڑہ نا سبب آن سیال تون لٹّوئی اسُّون، سیال ئِ کہِیی گمرو میھڑا و مرکہ کننگ نا پبّی او متّا ماری ئس ہم کرین، ولے سیال ننے داسکان تڈّا تِننگ اف ، د ا جیھڑہ دا خاطرآن ہم زےادہ چِیڑ اَلک کہ داکان مُست اِلّہ نا نیا م تائیکو آ مارخیر نا ذی آن بے بالا، رسم دُود آتے لتاڑیسہ سیال ئِ اسہ وار پدا
شَم شُوح کرے ۔ہراکہ قومی و قبائلی زند و بود ئٹ و تول بش ٹی اسہ بھاز بھلُّو معےار ئس گوندینگک ۔
سیال اخّس کہ نَزور مرے دا ہم اونا زُوم اُست ٹی مدام ہَندی مریک، سیال نا خلُیس آن ای وَدّ کم اِرا ہفتہ نائے تینا گونڈ اِنگا حویلی ٹی دزگیر۔۔۔ مُونی انت مریک۔۔؟ اندا بڈّو ٹی اَختہ مون کنا شیِف تین تون تینٹ شہا ٹہ۔۔۔ وخت ئس کہ مون ئِ بُڑزا کریٹ تو پیرہ آدین کنا کِیب آ سلوک اَس،۔ اونا مون نا کِرنچ آتے ٹی تد دور ئنا داستان ئس اودیم اَس، اونا غلغلو مروکا خنک ساڑی آ وخت ئنا گواہی ئِ تِسُّرہ او تینا دُو ئے کنا کاٹم آ تخنگ تون کنے آن چِست مننگ نا خواست ئِ کرے ، کنا بش مننگ تون او کنا دُو ٹی ہلسا کنے تین تون تُد کرے۔
پیرہ۔۔۔۔ کنے نی سوب تون وختی ہرانگ دننگ اُس۔۔۔؟ کنے آن دا سوج ئِ چِست کننگ نا جِیرت ہم موکل کریسُس، ولے او کنا گیِمروکا دروشم ئِ خوانسہ کنا سوج نا ورندی ٹی پارے۔ ملو۔۔۔۔۔! ای نے منہ ساعت ئسے کِن دا پُرغم آ زمانہ نا گِرپانچ مروکا زندبود، دا بُوز پدّام کروکا چَپ و چاگڑد وَ تین پہ تین نا کست او کاڑ آتےان اسُل مُر اسہ اندنو زمانہ سے تون درستی راستی کرفِنگ کِن دننگُٹ ہراڑے مہرو مریبت ، سَنت و سیوت وَ تین پہ تین تون رواداری نا زیبا غا دُروشم مدام برجائے۔ اوڑے غریب تو موجودئے، مگر غریبی معیارئس پاننگ پک ، ہراڑئے غریبی معیارئس مف ہموڑئے غریب ئِ غریبی نا احساس و گمان ہم مفک۔
ای نے ہمو ہَند آ دننگُٹ ہراڑئے دتر، لٹ و بیر ساڑی تو ارئے ولے جنگ جیھڑہ غاتے ٹی چُنا نیاڑی، سیّد ، پیر و مُرشد آن بیدس قرآن پاک نا عزّت و شر ف اِنسانی جان مال آن وَدّ قیمتی ئِ۔ نن ہمو جاءآ ہِننگ اُن ہراڑئے زِند و مرک ، خوشی و شاد کامیِک تو اریر، مگر بجّار و سرگشت، پڑس او پوڑی نا سوگو آ قانود تینا دُراغ دُروشم تون تالان ئِ۔
پیرہ آدین تینا دستار نا مول تون تینا نیم گِلوتہ غا خن تے پاک کرسا افسوز تو کتّو۔۔۔ مگر بھاز مونجھائی اَٹ بلے۔۔۔ بلے۔۔۔ پارساچھُپ کرئے۔ اونا آڑسندہ ٹی ہِنوکا وخت ئنا دور باری، ساڑی حالیت آتا حقیقت درشان اَس۔ ساعت سے نا چھپی آن گڈ ای اسہ سوج ئس چِست کننگ نا سگّھ ئِ ودی کرسا تینا نِزور آ توار تون ہرفِنگ نا خواست ئِ کریٹ ۔
پیرہ۔۔۔! اگر کس ئس خیر ئنا ذِی آ اسہ وار پدا بے ہکّل آن سیال سے آ دُو ہرفے، تو اونا ڈُو انت مننگ کیک۔۔۔؟ او ڈُو دار ۔۔ اونا باوہ ڈُو دار۔۔ پیرہ آدین تینا جوزہ غاتا واگ ئِ چِکّسہ مہر نا دَنگ آ بس پارئے، ملو۔۔۔! دا تو چَٹ لغور نامڑد و بے غیرت نا کڑد کسب ئِ ،کہ او خیر و ایمنی ئِ بے بالِنگ تون اوار سیال آ بے ہکّل آن جلو کے۔۔ او مون مُستی تینا ہیت ئِ برجا تخسا پارئے دُننگا لغور بے معیار آ بندغ ئِ نہ بیرہ تمن کروئی ئِ ، بلکہ اودئے تِیوی راج ٹی ریہنگنگ نا حق ہم اف ، جرگہ نا فیصلہ نا رِدئٹ اودئے چٹّی پُر کننگ آن بِیدس خلق آن ہمپوئی مریک۔
ای دا ہیت آتے بِننگ تون تینا تِیوی بُت ٹی مِش نا مُٹ ئس مسُّٹ۔
وخت و پاس پیشیم نا کنڈ آ روان اَس، ننا سفر تینا گڈِیکو پڑاو¿ آ سر مننگ اَٹ سرسوب مس۔
سرسوز آ مَش نا دیامان ٹی گواڑِخ آک تینا خیسُن آ گُد ے تالان کریسُس، وخت ئس کہ پُدین آ چِرک چِکّا کہ تو سمسُوک، گواری درنے، و پیہُن پھُلّی نا گند و زباد تین تون تینٹ گوازی کریسا ہتم ئِ وسمی نا کلہُو تِسُّرہ، مَش او دیامان اَٹ گون، خت آپڑس و شیِشار نا پینگُن آ درخت آتا پاناد ئٹ چشمہ او چکُّل نا دِی تے آ ککو و سِیسُو تا وَلّک خوش او گل بال اَسُّرہ ، کُھر و بزگل نا گار گگلّہ ، میژدار تا ڈِر او شُوکار ، زگر آ ورنا تا مَل او خل خسّنگ، گون سے نا سیخا ٹی گڑدی مسِن تا دہیرہ تون اوار شعر و باگُل آن مُچّا دیامان خوشنگ اَس، وخت ئس کہ مَش نا بُڑزی آ نِگہ تمّا تو مَش نا ٹول آ شوان ئس تولوک گِرو خلسا تینے دا مَش او دیامان خزم او خواجہ سرپند مسّکہ، اندن لگّا کہ دا امن مِیلہ کِن قدرت آسمان آن جنت نا ٹکّر ئس دا مَش او دیامان اَٹ تالان کرینے،کنے یخین مس کہ پیرہ آدین ہرا ہیت آتے کن تون کریسُس اونا ہیت آک گواچنی نا گواہی ئِ تننگ او۔
پیرہ آدین کنے آن موکل کننگ آن مُست کنے ہمو ہفت اِنگا گدان آتے نشان تِس ہرا کہ دیامان نا راستی کو کنڈآن اسہ آوار او ہَند ئسے آ بش اَسُّر، ہرا گدان کہ شش گدان آن مچّہ سِستہ بش ئِ او میر رودین نا ئے، ہراکہ خلق نا بھلّا ئے ۔ پیرہ اندا ہیت آ تے کننگ تون کنے آن موکل کرئے ۔ تاکہ او مَش نا توک اٹ اودیم متویسُس ہمو تم اِسکان کنا خنک اوڑا سخت اَسُّر۔
ای بِسٹ میر رودین نا گدان نا نیمہ غا سر الکُٹ، اونا زنڈ اِنگا گدان آن اندن لگّا کہ ، کہ او گواچنی خلق ئنا کماش ئِ ۔ دا اونا کماشی نا دا کمال ئِ کہ تیوی خلق ٹی امن و ایمنی، مہرو مُریبت ، سَنّت و سِیوت نا گچین آ دود آتا حکمرانی ئِ۔
میر رودین کنے خننگ تون رُغدار کوپہ ٹی ،کنا کنڈآ تُرندی اَٹ مون کرے وخت ئس کہ ای اونا زنڈ اِنگا بالاد و او بالاد نا کاٹم آ خاکی آ بَھلّا دستار ئے خناٹ تو اونا ہِیم او دہشت کنے مون مستی گام کننگ نا اجازت ئِ تتو۔ او کنے حد کننگ تون کنے آن ترندی اٹ اولیکو سوج ئِ چِست کریسا پارئے۔ نمے درست کتّوٹ ، نم دیر۔۔۔؟ او کنا ورندی آن مُست بس کنا دُو ئے الک، اونا جوڑ بڑ کننگ آن مُست، جاغُن کریسا پاریٹ۔۔۔! خواجہ ای مسافر سے اُٹ۔
جوڑ بڑ کننگ تون میر رودین کنے تین تون تُد کریساگدان نا نیمہ غا سر الکُن۔ گدان ئِ حد کننگ تون میر رودین گدان ٹی ٹپّرئس تالان کننگ نا حکم ئِ جاری کرئے، دم جٹ تون شیرذال او نیاڑی ئس ٹپّر ئس شاغا، ٹپّر نا پاناد ئٹ منہ بالشت تخنگ تون تےنے راست کریسا کنے بخیر کننگ آن گڈ تینا راستی کو دُو ئنا پنجہ ئِ تینا بَھلّا آستونک ٹی اودیم کرئے، اندا اودیم آ دُو تون کنا دُو ئے الک ہرا تما آ اوکنا دُو آن دُروت ئس الک ، تو کنا اُستا آئی دُرین بس ۔
کنا اُستا کلہ بریک کہ ای ہرا تم چُنک اَسوٹہ تو آئی دُرین تینا بَھلّا آستونک اَٹ کنے پھکّہ کریکہ۔
گدان اَٹ کنے تولِفنگ آن گڈ خلق ئنا کرّی ریشی او چَلّو بروتی آ ورناک ہم ٹپّر نا زیب زینت مسُّر۔
میر رودین کنے آن کنا بننگ نا وِیدن ئِ ہرّفنگ آن مُست کنے دِیر او چُلم نا سلا ئے خلک، داخو بَھلُّو مِزّل ئس آن پد ملاسی آن ہِینار اَسُّوٹ۔ دِیر نا خواست ئِ کننگ تون رودین اسہ ُسبک او مار ئسے ہکّل ترسا پارئے۔! مہمان بیخی دم دروک خننگک، دَر خاسن ئسے نا بندوبست ئِ کر ۔ گدان اَسٹ اس ولے نیامیکو کونٹ گدان ئِ اَرا بشخ کریسُس، سُبک آ مار کونٹ ئِ بُڑزا کرئے، دم جٹ تون مِسّ ئنا تاس ئس پُر پینگُن آ خاسن آن ہِس کنا دُو ٹی تِس۔ خاسنک تینا پینگُنی نا سبب آن اسہ کش ئٹی تِنگنگ نا اجازت ئِ تتویسہ۔ ہِیج کامی اٹ خاسن تے تِنگنگ آن پد کنا بین او ملاسی تون اوار کنا دمدری ہم کنے آن موکل کرئے۔
دم کشّاس خواجہ۔۔۔! میر رودین کنے آ مون ئِ اڑسساپارئے، کنا (جی او¿ میر) کننگ تون تولوک کچاری آن خواست کرئے۔۔ لشکر خواجہ ئِ حوال کبو تیوی کچاری اوووجی۔۔ نا توار ئے چست کرےر۔ ھاں خواجہ۔۔! اِیت خیرٹ حوال ئِ تینا میر اسہ وار پدا کنے آ مون ئِ ہڑسسا پارئے۔
ای دا خاطرآن ہبّکہ او حیران مسُّٹ ، نہ کنے حوال بریک، نہ ای حوال نا دُود رِبیدہ غان بلد اُٹ۔ ای تینا اُست ئنا ہیت ئِ تینا دُوی آ ہِسوٹ، تینا خجل آ مون تون پاریٹ میر کنے حوال تِننگ بفک، کنے آ تیوی کچاری نا بِشخندہ کنا نِزور آ کوپہ غاتا افسوز نا اسہ بھاز بھلُّو باریم ئس تخا وَخ۔۔۔ کنے حوال بروسُس ۔۔؟ ای اندا بُڈّو ٹی گُم گار ٹپُّر ئٹ پُٹ پٹّاٹہ۔
میر رودین لشکر نا بشخندہ ئِ کنا ملامتی سرپند مس۔ تینے بالِشت نا ٹِیک آن آجو کرئے ، تینا پینگُن آ رِیش ئِ خواریفسا تینا گٹ ئِ کانگارا ، اونا گٹ ئنا کانگارِنگ نا مقصدکچاری ئِ بشخندہ کننگ آن توننگ اَس ۔ تاکہ مہمان و مہما نداری نا بے مٹّ آ رواےات آک ٹھپّی مفس۔
ساعت ئسے نا چپُّی آن پد، گُڑا خواجہ ماندہ مفیس۔۔۔؟ رودین نا پاننگ تون ای مون ئِ بُڑزا کریسا پاریٹ حیات او آسودہ مریس۔ اسہ وار پدا جوڑ بڑ ئنا اسہ مُرغنو سلسلہ ئس برجا مس۔
کنے آن وا سُوج کننگا کہ نی ہراکان بننگ اُس، نا بننگ نا وِیدن انت ئِ۔۔۔؟ میر رودین کنا ورندی نا انتظار ئے کتّو، تخوک دیر ئنا تاس ئِ بُوز آ تخا دیر ئنا منہ گلُم کُننگ آن پد تاس ئِ تخنگ تون ای پاریٹ ، خواجہ ای شاراِستان نا سے اُٹ، ای مہر مرُیبت، سَنّت و سِیوت ، تین پہ تین تون اسہ اِیلو نا رواداری و ایلمی نا پٹ پول کِن کنے داڑسکان پیرہ آدین سُہو کرئے، میر رودین بالِشت آ جوکہ تینا سِروش ئِ بالِشت ٹی جاگہ ترسا پارئے ، انت۔۔ دا نعمت آک نما شار ٹی افّس۔۔۔؟ ای اسہ مُرغنو آڑسندہ ئس کشّنگ آن پد پاریٹ، شار ٹی مہر و محبت بیرہ کتاب آتے ٹی نظر بریک، رواداری او ایلمی ذاتی مطلب نا گواچی مس، سنّت و سِیوت سہدار ئس اس کسک، کست کاڑ اُست آ تیٹ مون اِنگا گدان ئِ بش کرینے، ننا تین پہ تین نا نااتفا قی، نا ٹہنداری آن نہ بیرہ سرکار نا پنجہ نا کِیرغ آن اُن، بلکہ سرکار ننا لٹ اِنگا ورنا تے جیل او زندان اَٹ بِٹنگ تون اوار اوفتے بیگواہ کریسا اوفتا لاش تے مَش و جنگلا آتے ٹی ہم خسّک۔ رودین کنا ہیت آتے غور ئٹ بِننگ تون اونا مون غصہ ا وجوزہ غان خیِسُن ہڑسینگا، او کنے آن ننا نا اتفاقی و تین پہ تین نا بے مہری نا سبب ئِ ہریفنگ نا خواہا کر، ولے کن تون چپُّی آن بیدس پین ہچّو ورندی ئس الّو۔
میر رودین ہکّل تریسا پارئے ، ائے شاراِستان نا باتی۔۔۔! اگر نما دا ہیت آکو تو نما زند بود نم کِن باریم ئس جوڑ مسُّونے، دا غم تا باریم نا بھلّا سبب دا دئے کہ نم تینا بُن پیرہی آ گچین آ دُود آتے بَج تِسُّونرئے، ہرا نا علاج بیرہ نم تون ئِ۔
کنا خن تے آ گِڈہ جلو کننگ اَس، ای تینے سر پند مسُّوٹ کہ کنا خن تا گِّڈہی نا وجہ پینگُن آ خاسُن تا اثر ئے
پیر رودین کنا خن تا گِّڈہی ئِ پُہہ مریسا کنے پارئے نی داسا مچہ خاچ آرام کر، اوکان پد نا ن طعام ئس کینہ۔ کنکہ گون ئنا درخت ئسے نا سیخا ٹی جاگہ ئس شاغنگا ،دیامان نا پدین آ گہوش کنے خمب ٹی ہلسا کنے ہنین او تُغ ئسے نا باہوٹ کرئے۔ سرجم او تُغ ئسے آن پد ہراتم سما کریٹ تو ای تینے تینا گونڈانگا حویلی ٹی دزگیر خناٹ۔۔

Check Also

March-17 sangat front small title

یہ دنیا والے ۔۔۔ بابوعبدالرحمن کرد

(معلم۔ فروری 1951) مہ ناز ایک غریب بلوچ کی لڑکی تھی۔ وہ اکثر سنا کرتی ...

Leave a Reply

Your email address will not be published. Required fields are marked *